ئه‌رێ كوردستان دێ بیته تێشكێ شێری ل رۆژهه‌لاتا ناڤه‌راست؟
ئه‌ڤه پرسیارا شرۆڤه‌كار و چاڤدێرێن سیاسی یه یێن ناڤه‌ندێن ده‌وله‌تێن جیهانا ئازاد ل سه‌ر بارودۆخێ سیاسی و ئه‌زموونا تازه یا دیمۆكراسی ئه‌وا هه‌رێما كوردستانێ هه‌یی وه هه‌روه‌سا ل سه‌ر ئه‌دائا ستراتیجیه‌ت و سیاسه‌تا نه‌رم وه ده‌وله‌تمه‌داریا (سه‌روك بارزانی).
له‌ورا میدیایێن ده‌وله‌تا فره‌نسا كو ئێكه ژ ده‌وله‌تێن زلهێزێن جیهانێ د ریپۆرتاژه‌كێ دا ب ئاشكه‌رایی وه‌لاما ڤێ پرسیارێ دده‌ت و دبێژیت: به‌لێ ئه‌ڤرۆ ئه‌و هه‌رێما (مسعود بارزانی) سه‌رۆكاتیا وێ دكه‌ت تێشكه‌پڵنگه و یێ مه‌زن دبیت ل چیایێن رۆژهه‌لاتا ناڤه‌راست دا و ژبه‌ر وێَ پێشڤه‌چوونا به‌رده‌وام و ب له‌ز و مه‌زن د وارێ گه‌شه‌كرن و پێشڤه‌چوونا ئابووری و ئاسایش و ئارامیا به‌رقه‌رار ئه‌وا ل هه‌رێما كوردستانێ هه‌یی و ڤێ پێشكه‌ڤتنێ میناك دكه‌ن ل گه‌ل پێشكه‌فتنا وه‌لاتێن (سه‌نگافۆره و تایوان و كۆریا باشۆر)، یا ئاشكه‌رایه كو ئه‌ڤ وه‌لاته ژی ژ رێزبه‌ندا ده‌وله‌تێن تازه پێگه‌هشتینه و ئه‌و ژی ب له‌ز پێشكه‌ڤتن ب تایبه‌تی ژ لایێ ئابووری ڤه، له‌ورا ئه‌ڤرۆ ژی جیهانا ئازاد ب هووری چاڤدێریا سیسته‌مێ سیاسی یێ هه‌رێما كوردستانێ دكه‌ن كو یا پێكهاتیه ژ موزائیكه‌كا سیاسی و سیسته‌مه‌كێ دیمۆكراسی و رێز ل ڤی سیسته‌مێ سیاسی دهێته گرتن ژ لایێ ناڤه‌ندێن ده‌وله‌تێن هه‌ڤپه‌یمان ڤه و سه‌ره‌رایی ڤێ چه‌ندێ ژی كوردستان یا بوویه ره‌شماله‌كا مه‌زن و بوویه جهێ ڤه‌حه‌ویانا هه‌ژماره‌كا زۆر ژ لێقه‌ومی و ئاواره‌یان كو ژ گه‌له‌ك نه‌ته‌وه‌و ئاین و مه‌زهه‌بان پێكدهێن و هه‌موو ل بن ڤێ ره‌شمالێ ڤه جهێ وان كرینه، ئه‌وێن ژ ترسا كریارێن تیرۆرێ جه و مالێن خوه هێلاین و قه‌ستا ده‌ڤه‌رێن كوردستانێ كرین، ژ به‌ر كو وه‌لاته‌كێ ئارامه و هزرا توند ره‌ویێ د ناڤ دا پێش ناكه‌ڤیت و مه‌زن نابیت هه‌ر وه‌سا كوردستان ئێكه‌م وه‌لاته ل سه‌ر ئاستێ وه‌لاتێن رۆژهه‌لاتا ناڤه‌راست كو تۆڤێ تیرۆرێ د ناڤ ئاخا وێ دا شین نابیت و به‌ری ناگریت. سه‌ره‌رای نه‌بوونا هزرا توند ره‌ویێ د ناڤ ملله‌تێ كورد دا ب درێژاهیا ده‌مێ شۆره‌شێن كوردستانێ گه‌لێ كورد تووشی گه‌له‌ك ده‌رده‌سه‌ری و ماڵوێرانیێَ و تیرۆرا ده‌وله‌تی بوویه ل سه‌ر ده‌ستێن داگیركه‌رێن كوردستانێ ب تایبه‌تی ب ده‌ستێن رژێما به‌عسا ژناڤچووی، بۆ نموونه ل سه‌ردمێ شۆره‌شا ئیلۆنا مه‌زن ل سالێن حه‌فتیاندا كو (بارزانیێ نه‌مر) سه‌ركرداتیا وێ دكر و ل گه‌رمه گه‌رما دان و ستاندنان بوو د ناڤبه‌را سه‌ركرداتیا شۆره‌شێ و رژێما به‌عس دا، ل وی ده‌می رژێمێ ب ده‌لیڤه زانی و هه‌ولا تیرۆركرنا سه‌رۆك (بارزانی) دا، لێ ل وێ جارێ ژ ی شكر بۆ خودێ ده‌وله‌تا تیرۆرێ شكه‌ستن ئینا و وه‌كو هه‌موو جاران ئارمانجا وان ب كه‌ڤری كه‌فت، لێ سه‌ره‌رای ڤی كارێ تیرۆرستی و درندانه ملله‌تێ كورد و سه‌ركرداتیا شۆره‌شێ كارڤه‌دان نه‌بوون ل دژی وان و نه‌كه‌فتنه د چه‌په‌رێ توڵه‌ڤه‌كرنێ دا دژی ملله‌تێ عه‌ره‌بان، لێ ل هه‌ر ده‌م و قووناغه‌كا دوژمنی هێرش ئینابیته ل سه‌ر ئاخا كوردستانێ، كه‌سێ كورد ب مه‌ردانه و مێرخاسی به‌ره‌ڤانی یا ژ وه‌لاتێ خوه كری بێی كو په‌نایێ ببه‌ته به‌ر رێكارێن تیرۆرێ، له‌ورا ئه‌ڤرۆ سه‌ركرده‌یا سیاسیا كودستانێ و هێزا پێشمه‌رگه‌ی ل سه‌ر ئاستێ جیهانێ وه‌كو هێزه‌كا ئازادیخواز و خودان ناسناما مرۆڤاتیێ دهێته نیاسین و ئه‌ڤ سه‌ره‌ده‌ریه و كلتوورێ مرۆڤاییێ ژ ی د كه‌ڤندا د ناڤ شۆره‌شێن كوردستانێ دا هه‌ر هه‌بوویه و هه‌تا نوكه ژی یا به‌رده‌وامه، واته ژ به‌ر ڤی كه‌لتوورێ ئازادیخوازیێ و مرۆڤ دۆستیێ و پێشكه‌ڤتنێ، ئه‌ڤرۆ جیهانا ئازاد یا ئینایه سه‌ر هێلا به‌ره‌ڤانیكرنێ ژ ملله‌تێ كوردستانێ دژی هێزا ده‌وله‌تا تیرۆرستیا چه‌رخێ تاریێ، هه‌روه‌سا كوردستان یا بوویه هێلا سۆر ل ده‌ف ده‌وله‌تێن هه‌ڤپه‌یمان بۆ هه‌ر دوژمن كاریه‌كا بهێته سه‌ر گه‌ل و وه‌لاتێ وێ، له‌ورا دوژمنێن داخ ب دلچاڤ نارابن ب پێشكه‌فتنا كوردستانێ و ئه‌ڤه ژی قه‌ده‌را مه‌یه وه‌كو ملله‌ت كو جیۆپۆلیتیكا كوردستانێ پشكه‌ك بوویه ژ ڤێ ده‌ڤه‌رێ، ئه‌و ده‌ڤه‌را پری ئارێشه و كوشتار و شه‌ڕ تێدا به‌رفره‌ه بووی و یا ئاشكه‌رایه كو ئه‌ڤ شه‌ڕێ ئیسلاما توندره‌وا سه‌له‌فیا تاری ل ڤێ قووناغێ دا كو هیچ ئاینده‌یه‌كێ رۆهن و جهه‌كێ ئاشكه‌را بۆ وان نینه و ب تنێ ئه‌نجامێ وێ بوویه ئه‌ڤ كوشتن و ده‌ربه‌ده‌ری و كاره‌سات و وێرانكاری یه یا ب سه‌رێ ملله‌تێ مه ئینای و ئه‌ڤ كاره‌ساته دهێته پێشچاڤێن مه وه‌كو وی شه‌ڕێ (30) سالی یێ سه‌دێ هه‌ڤدێ یه ئه‌وێ ل ئه‌ورۆپا به‌رفره‌ه بووی و كاره‌ساتێن مه‌زن ب سه‌رێ خه‌لكێ وێ هاتین و كو هه‌تا نوكه ژی شوونوارێن وی شه‌ڕێ كاره‌ستبار ل هنده‌ك موزه‌خانه‌یێن جیهانی دا یێ پاراستیه.
