ئه‌رێ كورد به‌رهه‌ڤه بۆ ده‌وله‌تێ؟
ده‌وله‌ت ئێك ژ خه‌ون و هیڤیێن درێژێن مرۆڤێ تاكێ كورد بوویه، ب دریژاهیا دیرۆكێ و هه‌تا ئه‌ڤرۆ قوربانێ و به‌رخودانێ دكه‌ن، بۆ هندێ ڤێ ئارمانجێ بجه بینن، ئه‌ڤه بیست و سێ سال ده‌رفه‌ت ل به‌ر ده‌ستێ بزاڤا سیاسیا كوردستانی دایه، بۆ هندێ پێگه‌ه و بنسترا ئاڤاهیێ ده‌وله‌تا كوردستانێ دانن، به‌لێ ب مخابنی ڤه، هه‌تا نوكه بزاڤا سیاسیا كوردستانێ، پێنگاڤێن پراكتیكێ و بوێرانه د ڤی واری دا وه‌كو پێدڤی نه‌ئاڤێتینه، جاران ژێ بوویه جهێ ره‌خنه گرتن وگله‌یێن مه‌زن، چ ل سه‌ر ئاستێ ناڤخوه‌یا كوردستانێ ب هه‌می ته‌خ وتوێژێن خوه‌ڤه، چ ل سه‌ر ئاستێ نیڤده‌وله‌تی و دوست و هه‌ڤالبه‌ند و پشتگیریت بزاڤا سیاسیا مه، كو د ڤێ ده‌مێ درێژ ل سه‌ر ئاستێ ناڤخوه وداموده‌زگه‌هینكرنا سیسته‌مێ ده‌وله‌تی، وه‌كو پێویست نه‌هاتیه كرن، به‌لكو گه‌له‌ك جاران ول گه‌له‌ك قۆناغان ژی هه‌ره‌شه ومه‌ترسی ژی بوویه، لسه‌ر بنیاتنانا ده‌وله‌تا كوردستانێ، بۆ ڤێ ئارمانجێ ژێ پارت و هێزیێن سیاسێن كوردستانێ، جاران په‌یاما ئێكگرتن و ئێكرێزیێ ژی نه‌بوویه، كو پێگڤه ناڤه‌ند وسیسته‌مێ بنیاتنانا ئاڤاهییا ده‌وله‌تا كوردستانێ ئاڤا بكه‌ن، و به‌رژه‌وه‌ندیێن پارتایه‌تی چه‌كه‌كێ كۆژه‌ك بوویه ل سه‌ر ئێكرێزییا گه‌لێ كوردستانێ بۆ ئاڤاكرنا ده‌وله‌تێ. نامه‌یا جه‌نابێ سه‌رۆك بارزانی و نه‌ئاماده‌یا هند لایه‌نان، گرژی ل دووڤ خوه ئیناین، گرۆڤێ زێندی و نوو نه، بۆ وێ حزباتییا به‌رته‌نگ یاكو گه‌له‌ك بۆیه‌ر وروودانێن نه‌خوازیار و دلته‌زین ژی ب سه‌رێ ملله‌تێ كورد و پرسا ده‌ستهه‌لاتدارییا وێ، یا ڤان 23 سالان په‌یدابوویه، ئه‌گه‌ر و هوكارێ سه‌ره‌كی ئه‌ڤ حزبایه‌تییا به‌رته‌نگ وكوژن ده بوویه، هنداكریه دامده‌زگایێن ده‌وله‌تا كوردی بهێنه ئاڤاكرن كارابن، به‌لكو گه‌له‌ك جاران ژی هه‌ره‌شه ومه‌ترسی ژی بوویه، ل سه‌ر ئارامی و سه‌قامگیرییا كوردستانێ ئه‌ڤه ژ لایه‌كێ ڤه، ژلایه‌كێ دیڤه هه‌می گاڤان دوژمنێن گه‌لێ كوردستانێ، ئانكو فاكته‌رێ ده‌ره‌كی ئه‌گه‌ره‌ك بوویه وكاریگه‌ریا خوه راسته‌وخوه ل سه‌ر بزاڤا سیاسیا كوردستانێ هه‌بوویه. نامه‌یا حه‌فت خالییا جه‌نابێ سه‌روك بارزانی، بۆ وزاره‌تا پێشمه‌رگه‌ی ل سه‌ر ئێكگرتنا رێكخستنا پێشمه‌گه‌یێ كوردستانێ، ستوونا هه‌ره گرنگ و مه‌زنا ئاڤاهییا ده‌وله‌تا كوردستانێ یه، ئه‌ڤه نه پێنگاڤا ئیكێ یه بۆ ده‌وله‌تێ، به‌لكو ئێك ژ وان پێنگاڤێن گرنگ وفه‌ر بۆ بهێنه هاڤێتن و ئه‌گه‌ر كورد ئه‌ڤرۆ د هشیاربن ده‌لیڤه لباره، وسه‌ره‌رای ئه‌و به‌رهنگاری ومه‌ترسیێن هه‌ین. پشتی شه‌رێ داعش ل كوردستانێ ده‌ستپێكری و سه‌ركه‌فتنێن مه‌زنێن پێشمه‌رگه‌یی ب پالپشتییا چڤاكێ نیڤده‌وله‌تی و مرۆڤایه‌تیێ ڤه، ب گشتی ل سه‌ر داعش و تیرورێ، ده‌لیڤه‌یه‌كا ب هێز ره‌خسایه بۆ هندێ ده‌وله‌تا كوردستانێ نێزیك ببیت و سنۆریێن نێڤنه‌ته‌وه‌یی بهێنه ژ ناڤبرن و روخاندن و نه‌خشێ رۆژهه‌لاتا ناڤێن بهێت گوهۆرێن و ل سه‌ر ڤێ چه‌ندێ ژێ، گه‌له‌ك كه‌سایه‌تی و ناڤه‌ندێن سیاسی و نێڤده‌وله‌تی و بیرمه‌ندێن جیهانێ داینه خوه‌یاكرن كو ئه‌ڤ شه‌ڕه ژ بۆ ژناڤبرنا رێكه‌فتنا سایكس پیكۆیه، كو ئه‌ڤ سنووره ل سه‌ر ده‌ستێن ده‌وله‌تێن زلهێزین جیهانێ، یێن وی سه‌رده‌می هاتینه دانان، بیێ پرس و ئیرادا ڤان ملله‌تان به‌لكو كورد زه‌ره‌ر مه‌نده‌كێ مه‌زن وسه‌ره‌كیێ ڤێ رێكه‌فتنێ بوویه. ئه‌ڤرۆ پشتی بوورینا سه‌د سالان ل سه‌ر ڤێ رێكه‌فتنێ، كو دهێته ده‌ستڤه‌دان ل رویێ پراكتیكیڤه ،ئه‌ڤه ژی بێگۆمان ئێك ژ هه‌می ئومێدێت مه كوردان بوویه،كو ئه‌ڤ سنوورێن ب زووری هاتینه دروست كرن بهێنه ژناڤبرن، هه‌روه‌سا ل سه‌ر ئاستی نیڤده‌وله‌تێ ژی په‌یوه‌ندیێن بهێز هاتینه دروستكرن و سه‌رۆكێ هه‌رێمێ به‌رێز مه‌سعود بارزانی، ل خورتكرن وراگرتن و پێشه‌ڤه‌برنا ڤان په‌یوه‌ندیان، ل سه‌ر ئاستێ جیهانی پێنگاڤێن گه‌له‌ك باش هاڤێتینه و رۆله‌كێ مه‌زن ژی گێرایه، د ئێكده‌نگی و ئێكرێزیا ناڤ مالا كوردی دا، كو ئه‌ڤ ژی دبنه فاكته‌رێن ب هێز، بۆ بجهئینانا هیڤی و ئۆمیدێن مه كوردان، بۆ ئاڤاكرنا ده‌وله‌تا كوردی یا سه‌ربخوه.
