ئه‌رێ پا كی دێ خه‌لكێ ده‌ڤه‌رێن مه قه‌ره‌بۆ كه‌ت؟
ل ڤان رۆژان هێشتا دو تۆپێن فرۆكان ب وان شكێران نه‌كه‌ڤتین، جامێران ل مۆنیكایێن خوه سووار بوون و به‌ر ب وان جهان ڤه چوون و ل سه‌ر جاددا قێڕی به‌رێ خوه دانه وان دۆل و چیا و ل گه‌ل وی سرۆشتی ژی چه‌ند وێنه‌یه‌كێن فه‌یسبووكێ گرتن و پاشی هاتنه به‌ر مایكێن ته‌له‌ڤزۆنان و گۆتن دێ زیانڤێكه‌ڤتیان قه‌ره‌بۆ كه‌ین.
جارێ خۆزی ئه‌و شیابوون چه‌ند كه‌سه‌كان قه‌ربۆ بكه‌ن، لێ من نه باوه‌ره، ب تنێ وانژی خۆش گۆت، ڤێجا كا دێ ئه‌ڤ ئاخڤتنه ژی ل كیڤه بنه ئه‌رشیف؟.
یا من ڤیایی بێژم، ئه‌ڤه پتر ژ پێنجی سالانه، ده‌ڤه‌رێن مه دهێنه سۆتن و بومبه‌بارانكرن و خه‌لكێ وێ هاتیه ده‌ربه‌ده‌ر و ره‌زیل كرن و ب هزاران شه‌هیدان خوینا خوه بۆ رێتیی یه، لێ مه چ قه‌ربۆ نه‌دیتی یه و كه‌سێ ژی نه‌گۆتی یه دێ هه‌وه قه‌ربۆ كه‌ین، یان هه‌ر چ نه‌بیت دێ هه‌ول ده‌ین هه‌وه ژی وه‌كۆ عه‌ره‌به‌كێ قه‌ربۆ بكه‌ین.
ده‌ڤه‌را نێروه و رێكان و دۆسكیان و چه‌ند ده‌ڤه‌ره‌كێن دی، پشتی سالا 1975ێ وه‌ره، هاتینه چۆلكرن و خه‌لكێ وێ به‌ر ب وه‌لاتێن ئیران و توركیا ده‌ربه‌ده‌ر بووینه و هنده‌ك ژی ل هنده‌ك كۆمه‌لگه‌هان ئاكنجی ببوون.
ژ هنگی وه‌ره و هه‌تا نها ئه‌م ئاواره و ده‌ربه‌ده‌ری كۆلانێن خه‌لكی نه و تا نها مه گوندێ باب و باپیران نه‌دیتی یه، مه ژ داهاتێ وێ نه‌خواری یه و نه‌ڤه‌خواری یه، هه‌تا قه‌ده‌غه‌یه ئه‌م ب سه‌ره‌دان ژی بچینه وێرێ. ئه‌ڤجا هه‌كه بپرسین، كی دێ قه‌ربۆیا پتر ژ پێنجی سالێن كرێداریا مه ده‌ت كۆ كرێدارێن فارس و توركان بووین؟ و تا نهاژی كریدارێن خه‌لكێ خوه‌ینه، كی دێ قه‌ربۆیا چاندنا مه، په‌زێن مه، ئاڤ و ئاخا مه، داروبه‌رێن مه، ئازادی یا مه و. .. . هتد ده‌ت؟!.
ئه‌م وی سه‌رده‌می ئاواره بووین و هه‌تا نها ژی ئاواره‌ینه، ب هزاران كه‌سان تا نها ماینه بێ خانی كۆ تێڤه بژین و هه‌ر كرێدارن، نه مه ره‌زه و نه مه په‌زه و نه كانی و نه رووبار، خوه بۆ ده‌مێن گه‌ریانه‌كێ ژی دڤیا ب پاره ل جهێن خه‌لكێ دیتر ل بن داره‌كێ رووینین، خه‌لكی هه‌موویان جهێن خوه په‌رجان كرن و ئه‌م ژی ل جاددا قێری نه‌شێین ده‌ركه‌ڤین و خوه ل سه‌ر جاددا قێری ژی هه‌ر پۆلیس یێ مه ب تنێ سزا دده‌ن.
هه‌ر چه‌نده ده‌م نه یێ هندێ یه ئه‌م داخوازا قه‌ربۆیێ بكه‌ین و ئه‌م باش دزانین نها وه‌لات د چ سه‌روبه‌ر دایه و دێ رێزێ ل وه‌لاتێ خوه گرین، چونكۆ ئه‌ڤ وه‌لاته ب خوینا مه هاتیه ئاڤدان و گه‌هشتی یه ڤێ قووناغێ، لێ نه‌چار بووم نها ڤی بابه‌تی بنڤیسم.
ئه‌م نه حه‌سوودین كو خه‌لكه‌ك بهێته قه‌ربۆكرن و ره‌نگه مافێ خه‌لكی بیت، لێ بلا وه‌ها نه‌زانن كو خه‌لكێ دی یێ نڤستی یه و چ نزانن، به‌لكو تا نها مه سه‌روه‌ریا كوردستانێ ب پله ئێك دیتی یه و رێز ل ڤان ده‌ستكه‌فتنان گرتی یه. به‌س مه گۆت دا بیرا وان بهێته مه و هه‌كه دونیایه هنده‌ك هاتنه قه‌ربۆ كرن و تشته‌ك ب سه‌ر مه‌نجه‌لێ دا چوو، ئه‌ڤجا بلا هزرا ڤان ده‌ڤه‌ران ژی بكه‌ن. ئه‌و ژی هه‌كه وانا ژی چ گه‌شتێن ده‌رڤه یان چوونا حه‌جێ ل به‌ر نه‌بیت.
