ئهرێ پێدڤیه ژ توركیا بترسین؟
ژ بهر ئهو كاودان و ناپاكی یێن دیرۆكى كو ژ ئالیێن وهڵاتێن داگیركهرێن كوردستانێ ب سهرێ نهتهوهیا كورد ئیناى ب تایبهت ڕێكهفتنا جهزائیر كو د ناڤبهرا شاهێ ئیرانێ و دهسهڵاتدارێن بهغدا هاتیه واژووكرن ل دژى نهتهوهیا كورد، نها ژى د ههر بزاڤهك و لڤینهكا ڤان وڵاتاندا ههمى دهمان گۆمان بۆ كوردان چێدبیت و ب رهشبینى و مهترسیدار ل سهر دۆزا كوردى ل پهیوهندى و دۆستاتیا وان دنێرن، د ڕاستیدا ههمى دهمان ههمى وهڵات و حزب و بزاڤێن سیاسى ل ههمى جیهانێ ل دووڤ بهرژهوهندیێن ئارمانجێن خوه سهرهدهریێ ل گهل واقعى دكهن، لهوما یا گرنگ ئهوه كو كورد بزاڤێ بكهن د ستراتیژییهتا خوه یا سیاسى و ئابوورى و سهربازى..هتد خوهدى سیاسهتهكێ بن كو وهڵاتێن دیتر ناچار ببن كو پابهند بن ب پهیوهندى و دوستایهتیێ د گهل كوردستانێ و ناپاكى كرن ل كوردان باجهكا مهزن ل دووڤ دا بهێت، بۆ نموونه چێكرنا لۆبى یێن بهێز ب تایبهت لۆبى یێن بازرگانى، وهڵاتهكێ مینا ئیسرائیل كو ژمارا نێشتهجێبۆیێن وێ نێزیكى ههشت ملیۆن كهسانه، ب رێیا لۆبى یێن خوه یێن زانستى و ئابوورى و سیاسى كونترۆلهكا مهزن ل سهر گهلهك لایهنێن جیهانى یێن كرى و گهلهك جاران ئاراستهیێن سیاسهتا وڵاتێن مهزن دگوهڕیت.
گهلۆ كورد چهند شیاینه خوهدى لۆبى بن و وڵاتهكێ مینا توركیا ناچار بكهن كو سهرهدهرییهكا مرۆڤانه و ساخلهم ل گهل كوردستانێ بكهن؟، بێ گۆمان چهند خاڵهكێن ههین كو جهێ سهرنجێنهو كوردستانا باشور یێ گههاندیه قووناغهكێ كو مینا ژمارهیهكا سیاسى و ئابوورى یا گرنگ ل دهڤهرێ بهێته خاندن، ههرێما كوردستانێ شیا باوهریێ ب توركیا بئینیت كو رێكهفتنهكا درێژخایهنا پێنجى ساڵى د گهل توركیا دا ئیمزا بكهت و نهفتا خوه ل سهر ئاخا توركیا دا تێبپهڕینیت بۆ بازارێن جیهانێ، و سالانه چهندین ملیارد دۆلار ئالوگۆڕی یێن بازرگانى د ناڤبهرا ههرێما كوردستانێ و ولاتێ توركیا دا چێكرن، ههروهسا سهدان كۆمپانیایێن توركیا ل كوردستانێ كار دكهن، ئهڤ چهندێن مه بهحس لێ كرى لۆبى یێن گرنگ یێن ئابوورینه كو د ناڤبهرا كوردستانێ و توركیا دا هاتینه بجه كرن كو نها ههرێما كوردستانێ بۆ توركیا سهرچاوهیهكێ ئابوورییه و ئهلتهرناتیڤ ب ساناهى نینن.
لایهنهكێ دیكه كو توركیا و ههرێما كوردستانێ پێكڤه گرێ ددهت و ب ساناهى توركیا نهشێت دژایهتیا ههرێما كوردستانێ بكهت، گرنگیدانا ولاتێن ئهورۆپا و ئهمریكا یه بۆ كوردستانێ، ب دیتنا من ل دووڤ ئهو هێمایێن راستهوخوه و ناڕاستهخوه دهێنه ههستپێكرن، وهلاتێن زلهێزێن جیهانێ دخوازن ئیسلاما سیاسى و توندوتیژ و ئهو ولاتێن پۆلیسی و گرنگى یێ ب چهكێن گران و سهربازى ددهن لاواز بكهن، هندهك ژ وان وهلاتێن كو ئارمانجا وهلاتێن زلهێزن، سووریا و عیراق و ئیرانن، ژ بۆ لاوازكرن و دابهشكرنا ڤان وهلاتان ل پاشهڕوژێ كورد باشترین میكانزمن و باشۆرێ كوردستانێ مینا بیناتێ وێ میكانزمێ یه كو دبیته كارتهكا مهزن ل سهر ڤان وهلاتێن ناڤهاتى كو د دهمێ پێدڤی دا دهولهتا باشورێ كوردستانێ یا پاشهروژێ پشتگیرییا چێبوونا دهوڵهتێن دیكه یێن كوردى بكهت و ژلایێ زلهێزان پشتگیرى لێ بهێته كرن و دووماهیێ ل ئێك پارچهیا ئیرانێ و سووریا ژى بئینن، ههروهسا ههرێما كوردستانێ مینا ههڤپهیمانهكێ سهربازى یێ گرنگ بۆ وهلاتێن رۆژئاڤا ل دژى شهرێ تیرۆرێ هاته نیاسین، سهرچاوهیهكێ گرنگێ وزهیه د پاشهڕۆژێ دا، ههروهسا ب تنێ پارچهیه ل رۆژههڵاتا ناڤهڕاست د دهمهكێ كێمدا شیان باشترین ئهزموونێ دیمۆكراسی ل سهر ئاستێ دهڤهرێ وێنه بكهن، خالهكا دیتر یا گرنگ ئهوه ئهمریكى و ئهورۆپى ههست دكهن كورد نهتهوهیهكا ئیسلامینه لێ ب گشتى ل گهل توندوتیژیا ئیسلامى نینن و میانروونه ل گهل ئایین پهرستێن دیتر دا، ئهڤ چهنده فاكتهرێن سهرهكینه كو توركیا مینا وهلاتهك كو شارهزا و بسپۆران رۆلێ د ڕێڤهبهریا وێدا ههى، ههست دكهن پێدڤیه سهرهدهریێ ل گهل ههرێما كوردستانێ بكهن و ئێدى ئهڤ پارچهیه ل وى سنۆرى یا دهركهفتى بشێن ژناڤ ببهن، واته سهرهدهرى د گهل دا كرن باشترین چارهسهرى یا دیتى، ژ بهرڤێ چهندێ ب دیتنا من توركیا مینا وهلاتهك كو پڕانیا بهرژهوهندیێن وێ ل گهل وهلاتێن رۆژئاڤا دا ههڤ دگرن، ب ساناهى دژایهتیا ههرێما كورستانێ ناكهت، ژ بهر كو بهروڤاژى ڤێ چهندێ باجهكا گرانتر ژ ههبوونا دهوڵهتهكا كوردى دێ قوربانى كهت.
