ئه‌زا خوه د كۆمێ دا نه‌په‌رچقینن
سدقی هرۆری
ئه‌ز تێناگه‌هم كا چما ده‌مێ مرۆڤ به‌حسێ خوه وه‌ك تاكه‌كه‌س و فه‌رد دكت ئه‌ز و منێ ب كار نائینت و خوه وه‌ك كۆم ب ناڤ دكت.
ئه‌ڤ ده‌مه‌كێ درێژه بالا من بێهتر د مه‌دیایا باشوورێ وه‌لاتی دا كه‌تیه سه‌ر وێ چه‌ندێ، ژ بۆ نموونه ده‌مێ كو نڤیسكاره‌ك نڤیسه‌كا خوه د ڕۆژنامه یان كۆڤاره‌كێ دا به‌لاڤ دكت و به‌حسێ وێ چه‌ندێ دكت، دبێژت نڤیسه‌كا (مه) ل فلان ده‌رێ هاتیه به‌لاڤكرن. ئه‌و ب خوه نڤیس یا وی ب خوه، ب ته‌نێ یه، یا تا‌كه‌كی یه، نه یا گه‌له‌ك كه‌سانه، لێ ئه‌و خوه د وێ ڕه‌وشێ دا وه‌ك كۆم ب ناڤ دكت.
نه به‌س ئه‌ڤ، لێ دێ ژ بۆ نموونه بینی كه‌سه‌ك ب ته‌نا سه‌رێ خوه چوویه سه‌ره‌دانا كه‌سه‌كی یان كه‌سه‌ك هاتیه سه‌ره‌دانا وی یان وێ و دێ ل وێ ده‌رێ ژی بینی ئه‌و خوه وه‌ك (ئه‌م) دیار دكت و دبێژت (ئه‌م) چوون سه‌ره‌دانا فلان كه‌سی یان فلان كه‌س هات سه‌ره‌دانا (مه).
ئه‌رێ چ ئارێشه د وێ دا هه‌یه كو مرۆڤ ڕاستیێ ببێژت و ژ ئه‌زا خوه شه‌رم نه‌كت و وێ، وه‌ك هه‌یی ب ئه‌ز ب ناڤ بكت. بۆ چ مرۆڤ بسته‌هـ ناكت و باوه‌ریێ ب خوه نائینت و ببێژت ئه‌ز چووم سه‌ره‌دانا فلانه كه‌سی یان نڤیسه‌كا من د فلانه جهی دا هات به‌لاڤ كرن. ئه‌رێ گه‌لۆ د ڤێ دا پرسگرێكه‌كا مه یا ده‌روونی هه‌یه كو ئه‌م خوه ب ئه‌مكرن و مه‌كرنێ هێژاتر، بلندتر و مه‌زنتر ژ ئه‌زێ دبینن!
ما وه‌ختێ هنده‌ك كه‌سێن به‌رپرسیار و ده‌ستهلاتدار ژ خوه نه‌گرن د به‌حسكرنا خوه دا، وه‌ك كه‌س، ئه‌زێ ب لێڤ بكم، ب وی ڕه‌نگی هه‌ول ددن یێ به‌رانبه‌ر نه‌چار بكن، ب زمانێ كۆمێ ل وان ڤه‌گێرت، چما ئه‌م دێ بدن دوو وان و دێ زمانێ خوه خوه خوه‌هر بكن و ئه‌زێ ژێ بمه‌حینن!
ئه‌م هه‌می دزانن كو جڤاك ژ تاكه‌كه‌سان، ژ فه‌ردان پێك دهێت و فه‌ردێن ئازاد و باوه‌ری ب خوه هه‌یی جڤاكه‌كا ئازاد و باوه‌ری ب خوه بوویی چێدكن. گه‌لۆ ما نه دورستتره كو تشت و حاله‌ت وه‌ك خوه و وه‌ك هه‌یی بهێن ب ناڤ كرن. ئه‌ز ب خوه دبینم كو پێدڤی یه ئه‌م ئه‌زا خوه ئازاد بكن و وێ د كۆمێ دا نه‌خه‌ندقینن و بسته‌هـ بكن وه‌ك باب و كالان ببێژن (ئه‌ز) و (من) و ڕێ نه‌دن ئه‌و د كۆمێ دا وه‌ندا ببت. تاك تاكه و كۆم كۆمه و جهناڤێن كه‌سی ژی د كورمانجیێ دا زه‌لال و دیارن.
