ئه‌ز (( فه‌ریناز خه‌سره‌وانی )) دناسم !!
گه‌لۆ ئه‌ڤ ڕوَژهه‌ڵاتا مه‌یا ناڤین، ئانكو حوكمڕانیه‌تا وێ، زوَرا سه‌یر و ئه‌نتیكه‌یه، هه‌كه تو ئازادی و دیمۆكراسیه‌ت و مافێن تاكه‌كه‌سی و ئازادیا هزروبیر و ڕاده‌ربڕینێ بخوازی، یان تو بخوازی به‌رگریێ ل هه‌بوون و كه‌سایه‌تیا خوه بكه‌ی، پێدڤیه تو خوَه بكوژی یان خوه بشه‌وتینی و گیان و له‌شێ خوه ژ ده‌ستبده‌ی. باشترین نموونه و گڕوڤه و به‌لگه ژی (محه‌مه‌د البوعه‌زیزێ) تونسێ و (فه‌ریناز خه‌سره‌وانی) یا ڕوَژهه‌ڵاتا كوردستانێ نه. ئه‌ڤ دو كه‌سه ڕوَژهه‌ڵاتی بوون، لێ به‌لێ ژ ئالیێ نه‌ته‌وایه‌تیڤه ژ هه‌ڤ جودابوون و گه‌له‌ك جودایێن دن ژی د ناڤبه‌را هه‌ردویاندا هه‌نه و هه‌بوون. (فه‌ریناز خه‌سره‌وانی)، په‌روه‌رده‌یا خێزانه‌كا ده‌ست كورت و هه‌ژار و كاسبكار، ده‌رچوویا په‌یمانگه‌ها كوَمپیوته‌ر و ژیێ وێ ( 26 ) ساڵ، پێخه‌مه‌ت هاریكاری و ده‌ستگرتنا خێزانا خوه یا هه‌ژار و خوه به‌رهه‌ڤكرن بوَ ژیانه‌كا نوو خێزانداریێ، نه‌چار ده‌ست ب كارێ خزمه‌تگوزاریێ و كارگه‌ریێ ل ئۆتێلا ( تارا ) ل مه‌هابادێ كر و ڕوَژانه ل دووڤ ده‌م و ده‌مژمێرێن ده‌ستنیشانكری كارێ خوه ئه‌نجامددا. پشتی كو كه‌سه‌كێ دڤیا ده‌ستدرێژیا سێكسی ل سه‌ر نامووسا وێ بكه‌ت، كو پڕانیا لایه‌ن و ژێده‌رێن پێزانین و راِگه‌هاندنێ خوه یا كر كو ئه‌وكه‌س یێ گرێدایی بوو ب ده‌زگه‌هێن ئه‌وله‌ویێن ده‌ستهه‌ڵاتا ئیرانێ، لێ (فه‌ریناز) ێ د ده‌مێ ڕه‌ڤینا خوه دا به‌ر ب نهو ما چارێ یا ئوَتێلێ، ته‌نێ هه‌ڵبژارده‌یا خوَه كوشتنێ ل به‌رده‌ست مابوو، له‌وا ژبوَ پاڕاستنا كه‌سایه‌تی و كه‌ڕامه‌ت و شه‌ڕه‌ف و نامووسا خوه، ئه‌و ڕێك هه‌لبژارت. ئێدی ( مه‌هاباد ) وه‌كی جوگرافیایه‌ك سیاسی و دیروَكی ژ بۆ گه‌لێ مه‌یێ كورد و كه‌چا كورد (فه‌رینازخه‌سره‌وانی) وه‌كی ڕوودان و قوربانی، بوونه گرنگترین دیكوَمێنت ل سه‌ر زێده‌گاڤی و پێشێلكرنا مافێن گه‌لێ كورد ل ڕوَژهه‌لاتا كوردستانێ و مافێن ژنان، ژ لایێ كوَمارا ئیسلامیا ئیرانێ. پشتی بۆرینا ( 70 ) ساڵان ل سه‌ر سێداره‌دانا پێشه‌وا ( قازی محه‌مه‌د ) ل (چارچرا) یا (مه‌هاباد) ێ ریسوابوونا ڕژێما شاهه‌نشاهی، جاره‌كا دن (فه‌ریناز) ێ سیسته‌مه‌كێ جیاوازێ دن یێ حوكمڕانیا هه‌ر هه‌مان ده‌وله‌تێ شه‌رمه‌زاركر، سه‌رباری جوداهیا دیروَك و زه‌مه‌ن و ڕوودانێ. كێشه و كریزا دیموكراسییه‌تێ ل ئیرانا ئیسلامییا شیعه مه‌زهه‌ب و وویلایه‌ت فه‌قیه، نه‌ته‌نێ كێشه‌یا ئیرانیایه، به‌لكو یا بوویه ریسكه‌ك جیهانی. ئیران ده‌وله‌ته‌ك ووزه‌دار و ئه‌توَم سازه، یابوویه جه‌مسه‌رگه‌راییه‌ك ژبوَ ئاڵوَزیێن ئیروَ و لایه‌نه‌كێ گرنگه د سه‌ركردایه‌تیكرنا شه‌ڕ و قه‌یرانێن ده‌ڤه‌رێ، نه‌خاسمه پشتی به‌رفره‌هبوونا رووبه‌رێ هیلالا شیعه‌یان. ژ ئالیه‌ك دن هێشتا حوبرێ رێكه‌فتنا (جنێف 5+1) هشك نه‌بوویه، زێده‌تر ژ 80 ئه‌ندام په‌رله‌مانێن ئیرانێ پرَوَژه یاسایه‌ك پێشنیازی سه‌روَكایه‌تیا په‌رله‌مانێ خوَه كریه ژبوَ ڕاوه‌ستاندنا گه‌نگه‌شه‌ێن ئه‌توَمی ل گه‌ل ئه‌مریكا و به‌رده‌وابوون دگه‌ل هه‌رشه‌ش ئه‌ندامێن دن، ب مه‌ره‌ما چێكرنا گڤاشتنێن سیاسی و له‌شكری ل سه‌ر ئه‌مریكا. ڤێجا بۆ مه كوردان زوَرا گرنگه ده‌رك ب وێ ڕاستیێ بكه‌ین كو مه‌هابادا سه‌رده‌مێ قازی محه‌مه‌د نه هه‌ر ئه‌و مه‌هاباده یا ئیروَ سه‌رده‌مێ ( فه‌ریناز خه‌سره‌وانی) و ئه‌مریكا (ئوَباما) ی نه یا سه‌ردمێ ( رێگان و كیسنجه‌ر) یه. یا ژ هه‌میان گرنگتر ژی ئه‌وه پشتی بورینا ( 800 ) ساڵان ب سه‌ر ئێكه‌مین كوَمپییاله و رێكه‌فتنامه‌یا چاره‌سه‌ركرنا كریزا دیمۆكراسی و سیسته‌مێ سه‌روَكایه‌تیێ ل جیهانێ كول ساڵا 1215ێ زاینیدا هاتیه واژووكرن ب ناڤێ (ماگناكارتا)، هه‌تا نها ژی سه‌رتاسه‌ری جیهانێ د قه‌یرانا دیمۆكراسییه‌تێ دا دژیت.
