ئه‌ز و ئه‌نفال
عه‌بدلرحمان خشخاشی
زارۆكه‌ك بووم
د پشكوژا ژیێ خوه دا
كه‌فتیمه به‌ر لهمشتا ره‌ڤێ و
خه‌ونێن من یێن زارۆكینیێ
هه‌می پێچان و
د گه‌ل خوه برن
ل ئێڤاریه‌كا دامای
ب زكه‌كێ برسی و د گه‌ل
هنده‌ك مرۆڤێن
بێ سه‌ر و بێهن هلمای
كه‌فتینه رێ و
بووینه ژڤانێن شه‌ڤێ
شه‌ڤ چ شه‌ڤ بوو!!
لوورێنا گورگا
قێریێن زارۆكا
نالینێن پیره‌ژن و پیره‌كالا
سمفۆنی و ئاوازا وێ شه‌ڤێ بوو
پێ ژ ترسا یێن دره‌جفن
چاڤ ل ئاسمانی زیق و ڕك ماینه
دل ژ قه‌هرێ كه‌لین و لێ بوركانه
هناڤ سۆتن
دێ بێی قه‌لیا ل سه‌ر په‌لانه
من بهیست
ده‌نگه‌ك ژ وێڤه تێتن
لاڤا دكه‌ت: یاااااره‌ب
مرن خه‌لاته بێتن
لێ قه‌ده‌ر تمام نه‌بوو
وێ شه‌ڤێ
خه‌نووكه مالا مه بوو*
ترس و برس
دیوارێن خانیێ مه‌بوون
ده‌ردو خه‌مێن گران
خوارن و ڤه‌خوارنا
هه‌ر چار دانێن مه بوون
مرۆڤایه‌تیێ ژ ره‌نگێ مه شه‌رم دكر
شه‌ڤێ دل نه‌دهێلا
مه د ناڤ تارایا خوه داوه‌رپێچیت
چ دیمه‌نن!!!
زارۆك ل پێش چاڤێن دایكا
یێ خاترا خوه دخوازن
باب یێ د دلێ خوه دا دقرقچیت
خوه‌زیا بۆ چنیه‌كێ نانی
ژ بۆ زارۆێن خوه رادهێلیت
لێ هه‌ر بێ هۆده‌بوو
خوشیا رۆژێ ژی
ره‌ڤا مه بوو
چادره‌كا كه‌ر دریای و
ئاڤ و پاریه‌ك نانی
هیڤی و خوه‌زیا مه بوو
*خه‌نوكه :گونده‌كه ل كوردستانا باكور
