ئه‌ز و ئیسماعیل تاهر و راستڤه‌كرنا رێنڤێسا كرمانجى
سه‌دیق حه‌جى وه‌لى به‌روارى
سه‌رێ هه‌یڤا تیرمه‌هێ بوو، من ڤیا سه‌ره‌دانا په‌رتوكخانا به‌درخانیان بكه‌م، دا هنده‌ك ژێده‌رێن تایبه‌تى فه‌رخ و ستیێ ببینم، پاشى من گۆت؛ دا سلاڤه‌كێ ل كاك ئیسماعیل بكه‌م ، ئه‌ڤه ده‌مه‌كێ درێژه، من نه نه‌دیتى، ئه‌ز ژى چوومه ژوورێ، و مه سلاڤ و سوحبه‌ت كرن، پاشى وى پرسیارا جڤاتا زمانزانێن كورد ژ من كر و گۆت؛ پا شولێ هه‌وه چاوه‌یه؟ و هه‌وه چ پرۆژه هه‌نه، نینن، من گۆت؛ مه دو پرۆژه یێن به‌رهه‌ڤكرین، ئێك: ئه‌تله‌سا ئاخڤتنا كرمانجى (فۆنۆلۆجیجا زاركێ به‌هدینان)، هه‌ر چه‌ند پارچه‌ك من ب ناڤێ “ئه‌تله‌سا ئاخفتنا دهۆك و ده‌وروبه‌رێن دهۆك”، من ل سالا 2010 د گۆڤارا په‌یڤێ دا یا به‌لاڤكرى، به‌لێ مه دڤیت وه‌ك په‌رتوك به‌رفه‌ره‌هتر به‌لاڤبكه‌ین. دو: پرۆژێ راستڤه‌كرنا رێنڤێسا زارێ كرمانجى، ره‌حمه‌تى گۆت: پرۆگرامێ هه‌وه یى راستڤه‌كرنا رێنڤسا كرمانجى یێ چاوه‌یه؟ رێزبازا راسڤه‌كرنێ هه‌وه چاوه به‌رهه‌ڤكریه؟
من گۆت؛ مه نێزیكى (270) پرسیارا یێن داناى، و دێ ئه‌ڤێن زمانزانێن ده‌ڤه‌رێ، و كه‌سانێن كارگێرى یێن په‌یوه‌ندیدار دێ كۆم بن، دێ ل وان په‌یڤه پرسیارا نێرن و ره‌ئیێ خوه ده‌ن، و پاشى گه‌نگه‌شا دووماهیێ دێ هێته ئه‌نجامدان، و وه‌ك په‌رتوك دێ چاپكه‌ین و ل سه‌ر داموده‌زهێن میرى هێته به‌لاڤه‌كرنێ. ڤێجا من بۆ راڤه‌كر و گۆهێ خوه دایێ، و پاشى گۆت؛ گۆت؛ ب راستى ئه‌ڤه دێ خزمه‌تێ كه‌ت، گه‌له‌ك كه‌ته ئاقلێ من (ژیرێ من). ئه‌زێ دگه‌ل ڤى پرۆژه‌یمه، نێزكى (2 ـ 3) كۆم بوون و خه‌له‌كێن T.V دڤێن، به‌لێ یا گرنگ، ئه‌م پیرۆزیا ئیدارێ وه‌رگرین، تشتێ كارگێرى به‌رێ خوه نه‌ده‌تێ، جهێ خوه ناگریت. من گۆت؛ راسته. وى گۆت؛ پا دا كاك ئیحسان ئامێدى ببینین، ئه‌م چووین، ئیحسان یێ ئاماده نه‌بوو، مه كاك خۆشناڤ دیت، و ئه‌حمه‌د ئه‌بدولا ژى ل نك وى بوو، ئیسماعیل، به‌حسێ ڤى پرۆژه‌ى بۆ كرن، من ژى پیچه‌كێ بۆ دركاند، كاك خۆشناڤ گۆت؛ ئه‌ز قه‌نج دبینم. به‌لێ كاك ئیحسان ژى ببینن. رۆژا پاشتر، ئه‌ز چووم، من تێله‌فۆنا ئیسماعیل كر، گۆت ئه‌ز نوكه پیچه‌كێ بشوولم، من گۆت؛ پا ئه‌زێ ده‌ركه‌تیم، ئه‌ز بتنێ دێ چم بینم، گۆت بلا، كه‌یفاته‌یه. من ژى كاك ئیحسان دیت. وى ژى جوامێرى گۆت؛ گه‌له‌ك باشه، و ئه‌م پێدڤینه. ئه‌ز دێَ تێله‌فۆنا رێڤه‌به‌رى ره‌وشه‌نبیرى یێ گشتى ژى كه‌م،” كاك ئه‌میر عه‌لى”. پاشتى هینگێ من بۆ كاك ئیسماعیل گۆت؛ سه‌یدایێ ئیحسان، یێ هاریكار بوو، و وى بۆ مه تێله‌فونا رێڤه‌به‌رێ گشتى ژى كر. ئیسماعیل گۆت؛ سه‌به‌هى سپێدێ سه‌عه‌ت ده‌هێ وه‌ره، دێ سه‌ره‌دانا گه‌له‌كان كه‌ین. رۆژا پاشتر ئه‌م چووین، مه سه‌یدایێ “ئه‌میر عه‌لى” رێڤه‌به‌رێ گشتى دیت، وى ژى جوامێرى گۆت؛ ئه‌م دهاریكارین. ئیسماعسل گۆت؛ دا سه‌رۆكێ جڤاتا دهۆك”به‌رێز فه‌هیم عه‌بدولاى ژى ببینین”، تێله‌فۆنا وى كر، وى گۆت؛ كه‌ره‌مكه‌م. ئه‌م چووینه نك وى. هه‌مان سه‌حبه‌ت و بابه‌ت مه بۆ كرن، وى ژى جوامێرى گۆت، ئه‌ڤا پێدڤیه، رێنڤێس ببیته ئێك. ئه‌م ده‌ركه‌تین، ئیسمایل گۆت، دابچین سه‌رۆكێ زانكۆیێ و رێڤه‌رێن په‌روه‌ردێ ژى ببینین. من گۆت، سه‌یدایێ ئیسماعیل، مه هێژ وه‌ختێ ماى، مانێ جڤانێ مه، ته گۆتیه، پێجشه‌مبێ 15/7/2021، دێ یه‌كه‌م كۆم بیت، دێ روونین. ئه‌ڤه هێژ چه‌ند رۆژێن ماین، رۆژ ( 13- 14) دێ وان ئاگه‌هداركه‌ین، دا هه‌ما ئێكجارى بیت، چێتره. ره‌حه‌مه‌تى گۆت راسته. پا دابچینه دائیرێ (په‌رتۆكخانێ). من گه‌هانده وێرێ، من گۆتێ كاك ئیسماعیل، ئه‌ڤه ده‌ست نڤێسه و (270) پرسیارن، ئه‌ڤه دفته‌ر ف ته، تو بده‌ف فه‌رمانبه‌ره‌كى بلا چاپ بكه‌ت. ئه‌زێ مژویلم، ئه‌ز ناگه‌هم، گۆت نێ مه كه‌س نینه ل په‌رتۆكخانێ چاپێ بكه‌ت، من گۆت؛ پا ئه‌زێ ب راڤه‌كرنا قورئانێ ڤه مژویلم، ئه‌ز ناگه‌هم چاپكه‌م، جوامێرى گۆت؛ بلا ئه‌و ژى خه‌ما من بیت. 11 هه‌یڤێ من گۆت؛ سوبه‌هى دێ ئیسماعیل بینم، ژڤانێ مه نێزیك بوو، ئه‌و بوو خودێ ژێ رازى بیت، ل 12/7/2021 ئه‌مرێ خودێ كر، پرۆژه و ژڤانا مه ژى پاشكه‌فت و مایه راوه‌ستاى، هه‌تا ئه‌م رێكه‌كا دى بۆ دبینین.
