ئه‌سه‌د به‌رهه‌ڤه ل گه‌ل كوردێن رۆژئاڤایێ كوردستانێ ده‌ست ب دانوستاندنان بكه‌ت
ب، سه‌رجان مه‌حمود:
د ئاستێ نێڤده‌وله‌تی دا ده‌ست ب بزاڤه‌كا نوو بۆ چاره‌سه‌ركرنا قه‌یرانا سووریێ هاتیه كرن، رۆسیا و ئه‌مریكا ژی پشته‌ڤانیێ ل ده‌ستپێكرنا قۆناغه‌كا نوو یا دانوستاندنان د ناڤبه‌را كوردان و رژێما به‌شاری دا دكه‌ن و دهێته چاڤه‌رێكرن كو ل مه‌ها ١٠ یا ئه‌ڤساله ب پشكداریا نوونه‌رێن ئه‌مریكا و رۆسیا كورد و رژێما به‌شاری ل شامێ ده‌ست ب دانوستاندنان بكه‌ن.
پشتی كو نوونه‌رێ تایبه‌ت یێ به‌شار ئه‌سه‌دێ سه‌رۆكێ رژێما سووریێ سه‌ره‌دانا ئه‌مریكا كر و ل گه‌ل به‌رپرسێن وه‌زاره‌تا ده‌رڤه یا ئه‌مریكا كۆمبوویی ل ئالیێ دی شانده‌كێ رێڤه‌به‌ریا خوه‌سه‌ر یا رۆژئاڤایێ كوردستانێ ژی ل گه‌ل به‌رپرسێن وه‌زاره‌تا ده‌رڤه یا رۆسیا كۆمبوو و هه‌ر دو ئالی خوه ئاماده دكه‌ن ژ نوو ڤه ده‌ست ب دانوستاندنان بكه‌ن و دهێته چاڤه‌رێ كرن د ده‌ستپێكا هه‌یڤا ده‌ه یا ئه‌ڤساله دا هه‌ر دو ئالی ل دیمه‌شقێ ب ئاماده‌بوونا نوونه‌رێن ئه‌مریكا و رۆسیا ده‌ست ب دانوستاندنێن فه‌رمی بكه‌ن.
د ڤێ مژارێ دا به‌شار ئه‌سه‌د سه‌رۆكێ رژێما سووریێ د كۆمبوونا جڤاتا نوو یا وه‌زیران دا راگه‌هاند كو ئه‌و خوه ئاماده دكه‌ن ریفۆرمێن به‌ری شه‌رێ ناڤخوه‌یی ل سووریێ دوباره زندی بكه‌ن و گاڤ ب گاڤ بۆ باشتركرنا ره‌وشا سیاسی و زێده‌كرنا ده‌ستهه‌لاتێن هه‌رێمی ئانكۆ جڤاتا پارێزگه‌هان دا ریفۆرمێن پێدڤی ئه‌نجام بده‌ن و گۆت: (پتر ژ ده‌ه سالانه مه ب هه‌موو هێزا خوه یا سه‌ربازی، سیاسی و جڤاكی شه‌ر بۆ پاراستنا ئێك پارچه‌ییا ئاخا وه‌لاتێ خوه كر و سه‌ركه‌ڤتنا دووماهیێ ژی گه‌له‌ك نێزیك بوویه و دڤێت بۆ ئاڤه‌دانكرنا وه‌لاتێ خوه ژی ئێدی ده‌ست ب خه‌باته‌كا به‌رفره‌ه بكه‌ین و ژ به‌ر هندێ ژی دڤێت هه‌ر ژ نها ڤه ئه‌م خوه بۆ قۆناغه‌كا نوو یا ئاڤه‌دانیێ و گه‌شه‌پێدانا ئابووری و باشتركرنا ره‌وشا ژیانا وه‌لاتیان به‌رهه‌ڤ بكه‌ین).
به‌شار ئه‌سه‌د سه‌رۆكێ رژێما سووریێ هه‌روه‌سا راگه‌هاند ژی كو سووریێ ب هه‌موو نه‌ته‌وه، ئۆل و باوه‌ریێن جودا ڤه ئێك جڤاكه و بۆ پاراستنا مافێن هه‌ر كه‌سه‌كێ چ پێدڤی بكه‌ت دێ هێته كرن و گۆت: (ئه‌م ئاماده‌ینه ل گه‌ل هه‌ر ئالیه‌كێ هه‌ڤدیتنان بكه‌ین دا كو ره‌وشا وه‌لاتێ خوه ئاسایی بكه‌ین و جاره‌كا دی ئێكگرتنا وه‌لاتێ خوه راگه‌هینین و كورد ژی پشكه‌كا گرنگ یا جڤاكێ سووریێ نه و د رۆژێن دا‌هاتی دا بۆ ئێكگرتنه‌كا ب هێز دێ گه‌له‌ك پێنگاڤێن باش و ئه‌رینێ هێنه ئاڤێتن و ئه‌م بۆ ڤێ یه‌كێ ژی كار دكه‌ین، چونكو مه دڤێت ب پشكداریا هه‌موو ئالیان ئاریشێن هه‌ی پێكڤه چاره‌سه‌ر بكه‌ین).
ل گۆر زانیاریێن ئه‌ڤرۆ هه‌ر د ڤێ مژارێ دا ئالیێ كوردی ژی به‌رهه‌ڤیا خوه بۆ ده‌ستپێكرنا دانوستاندنان ل گه‌ل حوكمه‌تا سووریێ دیار كرینه و خالا هه‌ری گرنگ بۆ كوردان ئه‌و بوو كو ده‌ستهه‌لات ب تنێ ل دیمه‌شقێ كۆم نه‌بیت و حوكمه‌ته‌كا ب هێز یا ناڤه‌ندی نه‌بیت و خوه‌سه‌ریا رۆژئاڤا و باكورێ سووریێ ب فه‌رمی بهێته قه‌بوول كرن و دستووره‌كێ نوو یێ كو مافێن هه‌ر ئالیه‌كێ تێدا پاراستی بیت بهێته ئاماده‌كرن و بۆ ڤێ یه‌كێ ئاخڤتنێن به‌شار ئه‌سه‌دی د ده‌ربارێ ئه‌نجامدانا ریفۆرمان دا وه‌ك پێنگاڤه‌كا ئه‌رێنی بۆ ده‌ستپێكرنا دانوستاندنان دهێته بناڤكرن.
چاڤدێرێن سیاسی یێن رۆژئاڤایێ كوردستانێ ژی دیار دكه‌ن كو به‌ری هه‌ر تشته‌كێ دڤێت هه‌ر دو جڤاتێن كوردی یێن رۆژئاڤایێ كوردستانێ هه‌موو ئاریشێن د ناڤبه‌را خوه دا چاره‌سه‌ر بكه‌ن و پێكڤه به‌رێ خوه بده‌نه شامێ و ل گه‌ل رژێما به‌شاری ده‌ست ب دانوستاندنان بكه‌ن، چونكو وی ده‌می دێ پێگه‌هێ كوردان گه‌له‌ك بهێزتر بیت.
