ئه‌كره‌م كێسته‌یی: هه‌تا نوكه من پتری (50) هزار ته‌نیران داناینه
دهۆك، شاكر ئه‌تروشی:
ئه‌كره‌م سلێمان حه‌سه‌ن كێسته‌یی ، ولاتیه‌كێ خه‌لكێ دهۆكێ یه، ژ دایكبوویێ سالا (1965) یه، ل ده‌ستپێكا سالێن هه‌شتێیان ل به‌ر ده‌ستێ بابێ خوه فێری دانانا ته‌نیران بوویه و ب گۆتنا وی هه‌تا نوكه وی پتری (50) هزار ته‌نیران بۆ ناپێژی و خوارنگه‌هان ل چه‌ندین پارێزگه‌هێن ئیراقێ داناینه و دو كۆڕێن خوه ژی فێری ڤی كاری كرینه.
ئه‌كره‌م، د دیداره‌كێ دا بۆ رۆژناما ئه‌ڤرۆ گۆت: ده‌مێ ژیێ من دوازده سال بابێ من ته‌نیر د دانان ئه‌ز هنده‌ك جاران دچوومه به‌ر ده‌ستێ وی، پشتی ئه‌ز باش فێربوویم ل سالا 1988 من سه‌ربه‌خوه كاركر و هه‌تا نوكه یێ به‌رده‌وامم و هژمارا دروست ل به‌ر ده‌ستێ من نینه به‌س ئه‌ز دشێم بێژم هه‌تا نوكه پتری (50) هزار ته‌نیران من داناینه، پتریا وان بۆ ناپێژیان بووینه و هنده‌ك ژی بۆ خوارنگه‌هانه و ل ناپێژی و خوارنگه‌هێن سه‌نته‌رێ دهۆكێ پتریا وان كارێ منن، هه‌روه‌سا ئه‌زچوویمه چه‌ندین پارێزگه‌هێن ئیراقێ من ل وێرێ ژی ته‌نیر داناینه، ژوانا ل (موسل و به‌غدا و رمادی سامه‌را) و چه‌ندین جهێن دی، بۆ زانین به‌رێ ته‌نیر بۆمه ژ موسل دهاتن، لێ نوكه ژ كه‌ركووكێ دهێت و ئاخا وان یا تایبه‌ته، ئانكو هه‌موو ئاخ ب كێر چێكرنا ته‌نیران ناهێن.
ل دووماهیێ گۆت: هه‌موو كه‌س نه‌شێن ته‌نیران ب دانن، چنكو زیره‌كی و شاره‌زای پێ دڤێت و ئه‌ز دو هه‌تا سێ رۆژان دشێم ته‌نیرا بۆ نانپیژیه‌كێ دانم، به‌ری نوكه د حه‌فتیه‌كێ من (12) ته‌نیر د دانان و من دو كۆرێن خوه ژی فێری ڤی كاری كرینه هنده‌ك جاران ئه‌و ژی هاریكاریا من دكه‌ن.
