ئه‌لبۆم وه‌كو ناسناڤه‌كی یه بۆ سترانبێژی
دهۆك، زنار تۆڤی:
سترانبێژ عه‌لی ژیان، كو خه‌لكێ بینگۆلێ یه ل باكۆرێ كوردستانێ و ئه‌ڤه چه‌ندین ساله ل وه‌لاتێ ئه‌لمانیا دژیت، د دیداره‌كێ دا بۆ رۆژناما ئه‌ڤرۆ دیاركر كو ل سالا 1992 وی ده‌ست ب گۆتنا سترانان كریه و هه‌تا نوكه یێ به‌رده‌وامه، ئه‌و دناڤ مالباته‌كا هونه‌ری دا مه‌زن بوویه و ڤێ چه‌ندێ وه‌كریه كو ئه‌و ژی ببیته سترانبێژ، هه‌روه‌سا وی چار ئه‌لبۆم ل گه‌ل كۆما ئاگرێ ژیان چێكرینه، دیسان ل سالا بۆری ئه‌لبۆما خوه یا ئێكێ ب ناڤێ (ئارین میركان) به‌لاڤكریه، كو ژ دوازده سترانان پێك دهات، پرانیا وان سترانان یێن هه‌لبه‌ستڤان وه‌زیر ده‌میری بووینه
ناڤهاتی گۆت: نوكه ئه‌ز مژوولی چێكرنا سترانه‌كا نوومه ب ناڤێ( ژ ته دوورم وه‌لات) ل ڤان نێزیكان دێ به‌لاڤ كه‌م هه‌ر چه‌نده نوكه سه‌رده‌مێ چێكرنا ئه‌لبۆمان نه‌مایه، لێ دیسان ژی چێكرنا ئه‌لبۆمێ وه‌كو ناسناڤه‌كێ یه بۆ سترانبێژی، ژبه‌ر ڤێ چه‌ندێ دێ وه‌كو مێژوویه‌كێ بۆ مرۆڤی مینیت، له‌وما من ل به‌ره د سالا بهێت دا ئه‌لبۆمه‌كا دی چێكه‌م، د هه‌مان ده‌مدا ئه‌ز كارێن خوه یێن هونه‌ری ل كه‌نالێ خوه یێ یووتۆبی به‌لاڤ دكه‌م.
ل دووماهیێ گۆت: ژبه‌ركو نوكه ره‌وشا باكۆرێ كوردستانێ ژلایێ سیاسی ڤه نه‌یا باشه له‌ورا ئه‌م نه‌شێین ئاهه‌نگ و كۆنسێرتان بگێرین و سانسۆر ل سه‌ر سترانێن كوردی هه‌یه، پۆلیس دووڤچوونا كارێن مه یێن هونه‌ری دكه‌ن، هه‌روه‌سا ئه‌م ژی وان ئێش و ئازارێن ب سه‌رێ گه‌لێ مه دهێن دكه‌ینه ستران، له‌وما هه‌كه هونه‌رمه‌ند وان ده‌رد و ئیشێن دناڤ ملله‌تێ مه دا كه‌نه ستران، ئێدی هونه‌رێ وان چو بهایێ خوه نامینیت، ب ڤی ره‌نگی ئه‌و دبنه سترانبێژ و نابنه هونه‌رمه‌ند، دیسان گه‌له‌ك ژ وان گه‌نجێن نوكه سترنان دبێژن، ئه‌و دخوازن ناڤدار ببن و سترانێن كه‌ڤن دبێژن، لێ ئه‌و نه‌شێن بببنه هونه‌رمه‌ند و ب تنێ ئه‌و دبنه سترانبێژ چونكی ئه‌و نه‌شێن ئافراندنێ د هونه‌ری دا بكه‌ن، هه‌روه‌سا ئه‌و سترانان ژبۆ ب ده‌ستڤه‌ئینانا پاره‌ی دبێژن.
