ئه‌لمانیا به‌رهه‌ڤ نینه‌ چه‌كان بده‌ته‌ ئۆكرانیایێ

ئه‌ڤرۆ:

به‌رپرسه‌كێ حوكمه‌تا ئه‌لمانیا راگه‌هاند كو وان نه‌ڤێت جارێ چه‌كێن پێشكه‌فتی و مودێرن بده‌نه‌ ئۆكرانیایێ و دڤێت وه‌لاتێن دی یێن ئێكه‌تیا ئۆرۆپا ژی پێداچوونێ د هه‌ڤكاریێن خوه‌ یێن سه‌ربازی بۆ ئۆكرانیایێ دا بكه‌ن، چونكو هه‌كه‌ دانا چه‌كان ب ره‌نگێ نها بۆ ئۆكرانیایێ به‌رده‌وام بیت ئه‌و یه‌ك دێ وه‌سا كه‌ت كو رۆسیا ئۆرۆپا بكه‌ته‌ ئارمانجا ئێرشێن خوه‌ و بێگومان دێ مه‌ترسیێن مه‌زن بۆ ئاسایشا وه‌لاتێن ئێكه‌تیا ئۆرۆپا دروست بن و باشتره‌ جارێ وه‌لاتێن دی یێن ئۆرۆپی ژی چه‌كان نه‌ده‌نه‌ ئۆكرانیایێ.

هه‌مان به‌رپرسی ئه‌و یه‌ك ژی دیار كریه‌ كو بابه‌تێ دانا چه‌كان بۆ ئۆكرانیایێ دڤێت د چارچۆڤێ هه‌ڤپه‌یمانیا ناتۆیێ دا بهێته‌ ئێكلاكرن و ژ به‌ر هندێ ژی ئه‌لمانیا بریار دایه‌ جارێ چه‌كێن مودێرن و پێشكه‌فتی نه‌ده‌ته‌ ئۆكرانیایێ.

وه‌زیرێ ده‌رڤه‌ یێ ئۆكرانیایێ ژی ب توندی نه‌رازیبوونێ خوه‌ ل هه‌مبه‌ر هه‌لوه‌ستێ ئه‌لمانیا دیار كر و راگه‌هاند كو رۆسیا ل ئۆكرانیایێ كۆمكۆژیان دكه‌ت و هه‌لوه‌ستێ ئه‌لمانیا ژی هه‌لوه‌سته‌ك خرابه‌ و ب چو ره‌نگه‌كێ ناهێته‌ قه‌بوولكرن و دڤێت وه‌لاتێن دی یێن ئێكه‌تیا ئۆرۆپا ب توندی هه‌لوه‌ستێ ئه‌لمانیا شه‌رمزار بكه‌ن.

کۆمێنتا تە