ئه‌لمانیا و فره‌نسا هۆشداریێ دده‌نه ئیرانێ
ئه‌ڤرۆ:
پشتی كو ئیرانێ ئێك ژ گرتیێن خوه‌نیشادانێن ڤێ دووماهیێ ل سێداره دا هه‌ر یه‌ك ژ وه‌لاتێن فره‌نسا و ئه‌لمانیا ب توندی هۆشداری دانه ئیرانێ و داخواز كرن كو ئیران گرتیێن ڤێ دووماهیێ ل سێداره نه‌ده‌ت و هه‌موو گرتیان ژی ئازاد بكه‌ت.
وه‌زاره‌تا ده‌رڤه یا فره‌نسا راگه‌هاند كو ئیران نه‌شێت ب سێداره‌دانێ خه‌لكێ ژ داخوازیێن خوه یێن بۆ ئازادیێ بێ هێڤی بكه‌ت و دڤێت ئیران رێزێ ل داخوازیێن خوه‌نیشاده‌ران بگریت و ب جهێ سێداره‌دانێ دڤێت گۆهداریا وان بهێته كرن.
وه‌زاره‌تا ده‌رڤه یا ئه‌لمانیا ژی ب توندی هۆشداری دا ئیرانێ و راگه‌هاند هه‌كه ئیران ل سه‌ر هه‌لوه‌ستێ خوه یێ نها به‌رده‌وام بیت و گرتیان سێداره بده‌ت ئه‌و دێ سزایێن گه‌له‌ك توند ل سه‌ر ئیرانێ سه‌پینن.
وه‌زاره‌تا ده‌رڤه یا كه‌نه‌دا ژی راگه‌هاند كو وان سزایێن نوو ل سه‌ر ٢٢ به‌رپرسێن ئیرانێ سه‌پاندینه و هه‌كه ئیران رێزێ ل مافێن مرۆڤی نه‌گریت و گرتیان ئازاد نه‌كه‌ت دێ سزایێن دژوارتر ل سه‌ر ئیرانێ سه‌پینن.
