ئه‌لمانیا پشته‌ڤانیێ ل هونه‌رمه‌ندێن كورد دكه‌ت
هه‌له‌بجه، عه‌زیز هه‌ورامی:
ئه‌نا ئسبۆلیكه، رێڤه‌به‌را په‌یمانگه‌ها گۆتب ل ئیراقێ، د دیداره‌كێ دا بۆ رۆژناما ئه‌ڤرۆ گۆت: مه هه‌رده‌م پشته‌ڤانیا خوه بۆ هونه‌رمه‌ندێن كورد دیاركریه و ئه‌م د به‌رهه‌ڤین هاریكاریا وان بكه‌ین ژبۆ گێڕانا كۆنسێرتان ب تایبه‌ت ژی ل باژێرێن هه‌رێما كوردستانێ.
ناڤهاتیێ گۆت: ئه‌م ل سه‌ر سێ ته‌وه‌ران كاردكه‌ین، یێ ئێكێ فێربوونا زمانێ ئه‌لمانێ و یێ دویێ پشته‌ڤانیا هونه‌رمه‌ندان و ته‌وه‌رێ سێی ژی كو بۆمه گه‌له‌كێ گرنگه پێشڤه‌برن و مۆكمكرنا په‌یوه‌ندیان دناڤبه‌را وه‌لاتێ ئه‌لمانیا و هه‌رێما كوردستانێ، بۆ زانین دوارێ هونه‌ری دا مه پێنگاڤێن باش هاڤێتینه و مه دڤێت زێده‌تر هاریكاریا هونه‌رمه‌ندێن كورد بكه‌ین، ب تایبه‌ت ژی سترانبێژان ژبۆ رێكخستنا ئاهه‌نگ و كۆنسێرتێن هونه‌ری، هه‌روه‌سا مه دڤێت هونه‌رمه‌ندێن كوردستانێ و یێن ئیراقێ بگه‌هینه ئێك و ئاهه‌نگێن هه‌ڤپشك بۆ بگێڕین و به‌ری نوكه مه چه‌ند ئاهه‌نگ ل دهۆك و هه‌له‌بجه گێڕاینه، بۆ زانین باره‌گایێ مه یێ سه‌ره‌كی یێ ل هه‌ولێرێ و مه پرۆژه‌ك هه‌یه ب ناڤێ ( هێلینا هونه‌رمه‌ندان) هه‌تا نوكه گه‌له‌ك هونه‌رمه‌ندان سه‌ره‌دانا مه كرینه و پرۆژێن خوه یێن هونه‌ری پێشكێشی مه كرینه و مه هاریكاریا وان كریه، و نوكه ژی ده‌رگه‌هێ مه یێ ڤه‌كری یه و هه‌ر هونه‌رمه‌نده‌كێ ب پرۆژه‌كێ باشڤه بهێته ده‌ف مه ئه‌م دێ رازی بین و هاریكاریا وان كه‌ین.
