ئه‌مریكا دو په‌یامێن گرنگ داینه رێڤه‌به‌ریا خوه‌سه‌ر
به‌دران چیا ئێك ژ به‌رپرسێن رێڤه‌به‌ریا خوه‌سه‌ر یا رۆژئاڤایێ كوردستانێ بۆ رۆژناما ئارتی گه‌رچه‌ك راگه‌هاند كو حه‌فتیا بۆری شانده‌ك ژ به‌رپرسێن وه‌زاره‌تا ده‌رڤه و به‌ره‌ڤانیێ یا ئه‌مریكا سه‌ره‌دانا رۆژئاڤایێ كوردستانێ كرن و ل گه‌ل به‌رپرسێن هێزێن سووریا دیموكرات و رێڤه‌به‌ریا خوه‌سه‌ر كۆمبوون و د كۆمبوونێ دا به‌رپرسێن ئه‌مریكا دو په‌یامێن گرنگ دانه كوردێن سووریێ.
ل دۆر په‌یامێن ئه‌مریكا ژی ناڤهاتی راگه‌هاند كو به‌رپرسێن ئه‌مریكا بۆ وان دیار كرینه كو ئه‌و دێ ل رۆژئاڤایێ كوردستانێ و باكورێ سووریێ مینن و وان ده‌ڤه‌ران چۆل ناكه‌ن و هه‌روه‌سا بۆ وان دیار كرینه كو شه‌رێ ل دژی داعشێ گه‌له‌ك گرنگه و د چارچۆڤێ شه‌رێ ل دژی داعشێ دا ژی ئه‌مریكا به‌رهه‌ڤه به‌رده‌وام هاریكاریا هێزێن سووریا دیموكرات بكه‌ت و ژ بۆ ئاڤه‌دانیا ده‌ڤه‌رێن كو ژ به‌ر شه‌ری ژی وێران بووینه ئه‌مریكا دێ هاریكاریا رێڤه‌به‌ریا خوه‌سه‌ر كه‌ت.
به‌دران چیا ئه‌و یه‌ك ژی دیار كر كو هه‌لویستێ ئه‌مریكا ل دۆر پێشڤه‌چوونێن ل رۆژئاڤایێ كوردستانێ گه‌له‌ك باشه و نها شاندێ وه‌زاره‌تا ده‌رڤه یا ئه‌مریكا كار بۆ رێككه‌فتنا هه‌ر دو جڤاتێن كوردی یێن رۆژئاڤایێ كوردستانێ دكه‌ن، چونكو ئه‌مریكا وه‌سا دبینیت هه‌تا كورد ئاریشێن د ناڤبه‌را خوه دا چاره‌سه‌ر نه‌كه‌ن نه‌شێن كاریگه‌ریه‌كا مه‌زن ل پاشه‌رۆژا سووریێ بكه‌ن.
