ئه‌مریكا سه‌ربازێن خوە ژ عێراقێ ڤەد‌كێشیت
ئەڤرۆ نیوز ، تۆڤی:
هەڤپەیمانێن رۆژئاڤایی ل بنگەهێن هەڤپەیمانیا نێڤدەولەتی ب سەرۆكاتیا ئەمریكا بۆ شەرێ داعش ل عێراقێ دووپات دكەن،کو ئەمریكا دەست ب كێمكرنا هێزێن خوە ل عێراقێ كریە،پشتی ئەوێ شكەستنا مەزن ب سەر تیرۆریستان دا ئینای و ل تەماما ڤێ دەڤەرێ تێک شکاندین.
وان ژێدەران گوتیە، سەربازێن ئەمریكا چەك و كەلوپەلێن خوە یێن سەربازی ل عێراقێ ڤەدگوهێزنە ئەفغانستانێ و ئەركێن وان دهێنە ڤەگوهاستن بۆ وەلاتێ ئەفغانستانێ،هەتا نوکە ب دەهان سەربازێن ئەمریكی ب شێوێ رۆژانە عێراقێ بجه دهێلن،هەروەسا دەستپێکا ڤەكێشانا سەربازێن ئەمریكی ل عێراقێ ل حەفتیا بوری دەست پێ كریە.
دو بەرپرسێن عێراقی بۆ ئەسیوشەیتد پرێس راگەهاندیە،کو هەڤپەیمانێن نێڤدەولەتی بۆ روو ب رووبوونا داعش ب سەرۆكاتیا ئەمریكا، گەهشتینە رێككەفتنێ ل گەل هەموویان بۆ كێمكرنا هێزێن ئەمریكا ل عێراقێ،پشتی کو ل نەهی دیسەمبەرێ بەغدا شكەستن ل سەر تیرۆریستێن داعشێ راگەهاندی.
ئەسیۆشەیتد پرێس بەلاڤەکریە، کو ل بنگەهێن سەربازی یێن بەغدا جموجۆلا هێزێن ئەمریكی ب چری دەست پێ كریە، ب تەمامی ئاخفتنێن وان هەر دو بەرپرسێن عێراقی د واقعی بووینە و جموجۆلا دناڤا بنگەهان دا وان زانیاریان پشت راست دکەن،یێن کو بەحسێ ڤەكشانا سەربازین ئەمریكا ل عێراقێ دكەن.
وان ژێدەران هیچ زانیاریەک دەربارەی هژمارا وان سەربازان ئاشكرا نەكریە،یێن کو ژ عێراق ڤەكێشاین، بەلێ ل 2014 پشتی هاتنا داعشێ بۆ عێراقێ، ئەمریكا هژمارا سەربازێن خوە ل عێراقێ زێدە كر بوون، بۆ پێنج هزار سەربازان ب فەرمی رێژا سەربازێن خوە بلند کربوون،بەلێ ئامارێن نەفەرمی دبێژن،کو هژمارا سەربازێن ئەمریكا ل عێراقێ گەیشتینە 10 هزاران، ئەركێ وان سەربازان مەشق و راهێنان بوون ب هێزێن عێراقی و پێشكێشكرنا راوێژیا سەربازی،هەروەسا كۆمكرنا زانیاریێن هەوالگێری و هەماهەنگیا شەرێ دژی داعشێ بوو.
