ئه‌مریكا و رۆسیا دخوازن پێكڤه قه‌یرانا سووریێ چاره‌سه‌ر بكه‌ن
ئه‌ڤرۆ:
د چه‌ند رۆژێن بۆری دا به‌رپرسێن ئه‌مریكا و رۆسیا ل دۆر پاشه‌رۆژا سووریێ كۆمبووینه و د كۆمبوونێ دا هه‌ر دو ئالیان به‌حسێ هندێ كرینه كو دڤێت قه‌یرانا نها ل سووریێ بهێته چاره‌سه‌ركرن و هه‌ر دو ئالیان بریار داینه كو ب رێیا دو لیژنێن تایبه‌ت پێكڤه كار بكه‌ن.
ل گۆر راپۆرته‌كا رۆژناما ئیندێپێندێنت یا بریتانی د چه‌ند رۆژێن بۆری دا به‌رپرسێن ئه‌مریكا و رۆسیا ل دۆر چاره‌سه‌ركرنا قه‌یرانا سووریێ كۆمبووینه و د كۆمبوونێ دا هه‌ر دو ئالیان به‌حسێ هندێ كرینه كو دڤێت پێكڤه قه‌یرانا نها ل سووریێ چاره‌سه‌ر بكه‌ن، چونكو هه‌تا قه‌یرانا سووریێ نه‌هێته چاره‌سه‌ركرن دێ گه‌له‌ك ئالۆزیێن دی ل رۆژهه‌لاتا ناڤین په‌یدا بن و ئه‌و یه‌ك دێ كارتێكرنا خوه ل هه‌موو جیهانێ كه‌ت و دڤێت ئه‌مریكا و رۆسیا پێكڤه ل سه‌ر نه‌خشه‌كێ بۆ چاره‌سه‌ركرنا قه‌یرانا نها ل سووریێ كار بكه‌ن، به‌رپرسێن ئه‌مریكا د كۆمبوونێ دا دیار كرینه كو دڤێت به‌ری هه‌ر تشته‌كێ داعش و رێكخراوێن دی یێن تیرۆرستی ل سووریێ ژناڤ بچن، چونكو نها داعش بهێز كه‌فتیه و دشێت جاره‌كا دی ده‌ست ب كریارێن تیرۆرستی ل سووریێ و ده‌ڤه‌رێن دی بكه‌ت، ژ بۆ چاره‌سه‌ركرنا قه‌یرانا سووریێ د پێنگاڤا ئێكێ دا دڤێت داعش و گرۆپێن دی یێن تیرۆرستی ل سووریێ بهێنه ژناڤبرن.
هه‌مان رۆژنامێ ئه‌و یه‌ك ژی دیار كریه كو به‌رپرسێن رۆسیا دیار كرینه شه‌رێ ل دژی تیرۆرێ ل سووریێ گه‌له‌ك گرنگه و دڤێت هه‌موو ئالی د چارچۆڤێ به‌رنامه‌كێ هه‌ڤپشك دا پێكڤه شه‌رێ تیرۆرێ بكه‌ن، لێ د هه‌مان ده‌می دا دڤێت ئه‌مریكا ژی هه‌موو هێزێن خوه ژ باكورێ سووریێ ڤه‌كێشیت، لێ به‌رپرسێن ئه‌مریكا دیار كرینه كو ئه‌و جارێ هێزێن خوه ڤه‌ناكێشن، چونكو ره‌وشا سووریێ گه‌له‌ك ئالۆزه و هه‌بوونا ئه‌مریكا ل سووریێ بۆ ئارامیا وی وه‌لاتی گه‌له‌ك گرنگه و دڤێت رۆسیا ژی پشته‌ڤانیێ ل ئارامیا نها ل سووریێ بكه‌ت، چونكو ده‌مێ ئه‌مریكا هێزێن خوه ژ باكورێ سووریێ ڤه‌كێشیت دێ توركیا، گرۆپێن سه‌ر ب توركیا و هه‌روه‌سا رێكخراوێن دی یێن تیرۆرستی ده‌ست ب ئێرشێن نوو كه‌ن و ئه‌و یه‌ك دێ بیته ئه‌گه‌رێ هندێ ره‌وشا سووریێ ب تایبه‌تی ژی باكورێ وی وه‌لاتی پتر ئالۆز بیت.
چاڤدێرێن سیاسی ژی دیار دكه‌ن كو ئه‌مریكا و رۆسیا ل دۆر چه‌ندین خالێن گرنگ و ستراتیژی سه‌باره‌ت ب پاشه‌رۆژا سووریێ رێككه‌فتینه و هه‌ر دو وه‌لات ژی گه‌هشتینه ڤێ باوه‌ریێ كو دڤێت توركیا هه‌موو هێزێن خوه ژ باكورێ سووریێ ڤه‌كێشیت و ئێدی ده‌ستێوه‌ردانێ د كاروبارێن ناڤخوه‌یی یێ سووریێ دا نه‌كه‌ت، چونكو پشته‌ڤانیا توركیا بۆ گرۆپێن چه‌كدار ئێكه ژ وان خالێن گرنگ كو بوویه ئه‌گه‌رێ ئالۆزبوونا ره‌وشا ناڤخوه‌یی یا سووریێ و دڤێت ئێدی توركیا ژی ده‌ستان ژ پشته‌ڤانیا گرۆپێن چه‌كدار به‌رده‌ت و رێزێ ل ئیرادا خه‌لكێ سووریێ بگریت.
ل گۆر باوه‌ریا چاڤدێرێن سیاسی رۆسیا ژی وه‌كو به‌رێ ل دژی مافێن ره‌وا یێن گه‌لێ كورد ل سووریێ نینه، هه‌روه‌سا ئه‌مریكا ژی ل دژی هندێ نینه كو كورد و رژێما به‌شاری پێكڤه ب رێیا دانوستاندنان بگه‌هنه رێككه‌فتنه‌كێ كو مافێن كوردان د چارچۆڤێ دستووره‌كێ نوو ل سووریێ دا بهێته گه‌ره‌نتیكرن، لێ توركیا ژ هندێ دترسیت هه‌كه كورد ل سووریێ بهێز بكه‌ڤن و بگه‌هنه مافێن خوه ئه‌و یه‌ك دێ كارتێكرنا خوه ل كوردێن توركیا ژی كه‌ت، ژ به‌ر هندێ ژی نها توركیا ب هه‌موو ره‌نگه‌كێ كار دكه‌ت دا كو رژێما به‌شاری ل گه‌ل كوردان دانوستاندنان نه‌كه‌ت.
