ئه‌مریكا و پڕانیا وه‌لاتێن ئورۆپا چه‌كێن پێشكه‌فتی دده‌نه ئۆكرانیا
ئه‌ڤرۆ:
به‌رپرسه‌كێ وه‌زاره‌تا ده‌رڤه یا ئه‌مریكا راگه‌هاند كو وان بریار داینه ب كۆژمێ ٤٥٠ ملیۆن دۆلاران چه‌كێن پێشكه‌فتی بده‌نه ئۆكرانیا و هه‌روه‌سا سه‌رۆكێ ئه‌مریكا پرۆژه‌یه‌ك ئاماده كریه كو تێدا به‌حسێ هندێ هاتیه كرن پتر ژ چار ملیارد دۆلاران هاریكاریا ئۆكرانیا بهێته كرن، چونكو بابه‌تێ ئۆكرانیا بوویه مه‌ترسیه‌كا گه‌له‌ك مه‌زن بۆ ئورۆپا و ژ به‌ر هندێ ژی ئه‌مریكا بریار دایه ب هه‌موو ره‌نگه‌كێ هاریكاریا وی وه‌لاتی بكه‌ت دا ئۆكرانیا بشێت ل هه‌مبه‌ر ئێرشێن رۆسیا خوه بپارێزیت.
ل ئالیێ دی هه‌ر یه‌ك ژ وه‌لاتێن هۆله‌ندا، ئه‌لمانیا، سوید فنله‌ندا، ئوسترالیا و گه‌له‌ك وه‌لاتێن دی یێن ئورۆپی ژی دیار كرن كو وان ده‌ست ب هنارتنا چه‌كان بۆ ئۆكرانیا كرینه و دێ به‌رده‌وام هاریكاریا وی وه‌لاتی كه‌ن.
وه‌زاره‌تا به‌رگریێ یا بریتانیا ژی دوهی راگه‌هاند هه‌كه رۆسیا به‌حسێ بكارئینانا چه‌كێن ئه‌تۆمی بكه‌ت ئه‌و ژی وه‌كو بریتانیا دێ به‌رسڤا رۆسیا ده‌ن، چونكو بابه‌تێ چه‌كێن ئه‌تۆمی دێ جیهانێ تووشی كاره‌ساتێن مه‌زن كه‌ت، لێ هه‌كه پۆتینی بڤێت وه‌سا گه‌فان ل ئورۆپا و وه‌لاتێن دی بكه‌ت دڤێت ب هه‌مان ره‌نگی به‌رسڤا پۆتینی بهێته دان.
چاڤدێرێن سیاسی ژی دیار دكه‌ن كو پشتی ئۆكرانیا شیا ل هه‌مبه‌ر ئێرشێن رۆسیا به‌رخوه‌دانه‌كا باش بكه‌ت ئه‌و یه‌ك كارتێكرنا خوه ل هه‌لوه‌ستێ ئه‌مریكا و هه‌موو وه‌لاتێن ئێكه‌تیا ئورۆپا كریه، هه‌كه چه‌كێن پێشكه‌فتی بكه‌ڤنه ده‌ستێ له‌شكرێ ئۆكرانیا ئه‌و دێ شێن دربێن كوژه‌ك ل له‌شكرێ رۆسیا بده‌ن، ژ به‌ر هندێ ژی پۆتین نها ژ هنارتنا چه‌كان بۆ ئۆكرانیا گه‌له‌ك دلگرانه و به‌ری دو رۆژان گه‌فا بكارئینانا چه‌كێن ئه‌تۆمی كربوو.
ل ئالیێ دی دوهی شاندێن هه‌ر دو وه‌لاتێن رۆسیا و ئۆكرانیا كۆمبوون و به‌ری كۆمبوونێ ژی سه‌رۆكێ ئۆكرانیا داخواز ژ وه‌لاتێن ئێكه‌تیا ئورۆپا كر كو هه‌ر زوو كار بۆ هندێ بكه‌ن دا ئۆكرانیا ببیته ئه‌نداما ئێكه‌تیا ئورۆپا و پرانیا به‌رپرسێن ئورۆپا ژی پشته‌ڤانیێ ل هندێ دكه‌ن كو ئۆكرانیا ببیته ئه‌نداما ئێكه‌تیا ئورۆپا.
