ئه‌مریكا و یونان ل ده‌ریا سپی بنگه‌هێن سه‌ربازی ئاڤا دكه‌ن
ب، سه‌رجان مه‌حمود:
نیكۆس پاناگیۆتۆپۆلۆس وه‌زیرێ به‌رگریێ یێ یونانێ د داخۆیانیه‌كێ دا راگه‌هاند كو د ناڤبه‌را توركیا و لیبیا دا ل سه‌ر وزێ په‌یمانێن دوور ژ قانوونێن نێڤده‌وله‌تی هاتینه ئیمزا كرن و گۆت: (په‌یمانا د ناڤبه‌را توركیا و لیبیا دا ل ده‌ریا سپی ب ته‌مامی ل دژی قانوونێن نێڤده‌وله‌تیه و په‌یمانا وزێ یا د ناڤبه‌را وان دا ل دژی به‌رژه‌وه‌ندیێن وه‌لاتێن دی یێن ل ده‌ریا سپی یه و ل هه‌مبه‌ر وێ به‌رسڤا مه و وه‌لاتێن هه‌ڤپه‌یمان ژی هه‌یه و ئه‌م رێ ناده‌ین توركیا مه‌ترسیێ بۆ مه و وه‌لاتێن دی دروست بكه‌ت).
ناڤهاتی هه‌روه‌سا راگه‌هاند كو توركیا مه‌ترسیێ بۆ ئارامیا ده‌ریا سپی دروست دكه‌ت و بزاڤێن توركیا ب چو ره‌نگه‌كێ ناهێنه قه‌بوول كرن و به‌ری نها مه و ئه‌مریكا هۆشداری ژی داینه توركیا، لێ مخابن هه‌تا نها ژی توركیا ل سه‌ر هه‌لوه‌ستێ خوه به‌رده‌وامه و ژ بۆ هندێ ژی مه و ئه‌مریكا ده‌ست ب ئاڤاكرنا بنگه‌هه‌كێ سه‌ربازی ل ده‌ریا سپی كریه و پێدڤی بیت دێ بنگه‌هێن دی ژی هێنه ئاڤاكرن.
