ئه‌میر عه‌لی:دهۆكێ وه‌كو باژێره‌كێ بچووك كارڤه‌دانێن مه‌زن ل ئاستێ جیهانێ د وارێ سینه‌مایی دا دروستكرینه
دهۆك، نه‌وزاد هلۆری
گه‌را هه‌شتێ یا فلمه فیسته‌ڤالا دهۆك یا نیڤده‌وله‌تی نێزیكێ ده‌مێ خوه دبیت و كومه‌كا فلمێن نافخوه و بیانی دێ هێنه نیشادان و بۆ ده‌مێ حه‌فتیه‌كێ دێ به‌رده‌وام بیت.
ئه‌میر عه‌لی، سه‌رۆكێ وێ فیسته‌ڤالێ دیاركر كو ئه‌ڤ فیسته‌ڤاله به‌رهه‌مێ مانیدبوونا گه‌نجێن دهۆكێ یه و خوشحالین كو به‌رهه‌ڤیێن باش هاتینه كرن و ئومێدا مه ئه‌وه كو ل هه‌موو سالان فیسته‌ڤال یا به‌رده‌وام بیت.
ناڤهاتی گۆت: ڤێ فیسته‌ڤالێ گه‌له‌ك ئارمانج هه‌نه، ژوانا دروستكرنا روویه‌كێ گرنگ یێ شارستانی بۆ باژێرێ دهۆكێ ژ روویێ هونه‌ری، كلتۆری و ره‌وشه‌نبیری په‌یدا بكه‌ین كو هه‌ماهه‌نگی د ناڤبه‌را سینه‌ماكارێن نافخوه و بیانی په‌یدا بیت، دیسان ئارمانجه‌كا دی ئه‌وه كو زه‌مینه‌یه‌كێ بۆ گه‌نجان په‌یدا بكه‌ین ب تایبه‌تی وان كه‌سان یێن كو دخوازن به‌رهه‌م و شیانێن خوه ده‌ربێخن و نیشا جڤاكی بده‌ن، هه‌ر دیسان ئارمانجه‌كا دی ئه‌وه كو كه‌رتێ ئابووری و گه‌شتوگۆزاری ڤه‌وژینیت ژبه‌ركو هژماره‌كا زۆر یا سینه‌ماكار و وه‌لاتیان كوم دبن و تێكه‌لیێن زۆر دروست دبن،
كو دهۆك وه‌كو باژێره‌كێ بچووك كارڤه‌دانێن مه‌زن ل ئاستێ جیهانێ د وارێ سینه‌مایی دا دروستكرینه و ئه‌گه‌رێ سه‌ره‌كی یا گیروبوونا فلمه فیسته‌ڤالێ دزڤریت بۆ به‌لاڤبوونا كۆرۆنایێ، له‌ورا مه خواست كو رێنمایێن حوكمه‌تا هه‌رێما كوردستانێ بجه بینین و خه‌لكی ژی هان بده‌ین كو گیانێ وان سلامه‌ت بیت، دیسان ژ ێوارێ كوردستان و ئیراقێ و هه‌لبژارتنێن چریا ئێكێ یا ئه‌ڤ ساله ژی ئێك بوو ژ ئه‌گه‌ره‌كێ كو فیسته‌ڤال گیرۆ بیت، ئه‌م سوپاسیا وان هه‌موو وان كه‌سان دكه‌ین كو بزاڤ كری فیسته‌ڤال یا به‌رده‌وام بیت و ئومێدا مه ئه‌وه بشێن ب سه‌ركه‌فتیانه ئه‌نجام بده‌ین، دیسان پرۆژه‌كێ گرنگ بناڤێ نوو هات كو دێ گرنگیێ ب شیانێن وان كه‌سان ده‌ت یێن بخوازن فمان و كارێن هونه‌ری ئه‌نجام بده‌ن، تێدا دهێنه فێركرن و پێگه‌هاندن و راهێنان دا ب تایبه‌تی ب رێیا ورگ شوپا و دێ نێزیكێ 30 كه‌سان فێركه‌ن كو بشێن كارێن جوان بكه‌ن و كارێن وان ببنه به‌رهه‌م بۆ فلمه فیسته‌ڤالا دهۆك یا نیڤده‌وله‌تی ل گه‌رێن بهێت دا.
محه‌مه‌د ئاكاش، راوێژكارێ فلمه فیسته‌ڤالێ ژی دیاركر كو مژارا سه‌ره‌كی یا فیسته‌ڤالێ ژینگه‌هه و گۆت نێزیكێ هزار فلمان گه‌هشتینه فلمه فیسته‌ڤالێ و نێزیكێ 600 فلمان هاتینه دیتن، نێزیكێ 60 فلم یێن بیانی هاتینه ده‌ستنیشانكرن، دیسان هنده‌ك فلمێن هه‌ره گرنگ ل جیهانێ هاتینه ده‌ستنیشانكرن كو ژلایێ ده‌رهێنه‌رێن بیانی ل كوردستانێ و دهۆكێ هاتینه چێكرن، دیسان وه‌لاتێ ئه‌ڤغانستانێ ئێكه ژ مژار و فۆكسێن فیسته‌ڤالێ ژبه‌ركو كوردستان و ئه‌فغانستان نێزیكێ ئێكن و هه‌ردوو ئالی تووشی شه‌رێن دژی تیرورێ بووینه، هژماره‌كا فلمێن وه‌لاتێن هه‌ڤسوو ژلایێ توركیا و ئیرانی هاتینه چێكرن به‌لێ مژارێن وان و زمان ژی ل سه‌ر كوردی یه له‌وا هاتینه ژێگرتن و سێ فلم هاتینه ده‌ستنیشانكرن بۆ ده‌ستپێكا فلمه فیسته‌ڤالێ و ل حه‌فتیا بهێت ئه‌ڤ چه‌نده دێ ئێكلا بیت
مه‌سعود عارف، ژ راگه‌هاندنا فلمه فیسته‌ڤالێ دیاركر كو پشكا فلمێن كوردی هه‌ڤركیه‌كا بهێز یا فیسته‌ڤالێ یه و هه‌ر ئێك ژ فلمێن (بێخاك، خاكێ پیس، دانسا عه‌لی و زینێ، پاراستنا برایی، زالاڤا، كۆچبه‌رێ بچووك، سه‌دیق و پلنگ) وه‌كو فلمێن دریژ پشكدارن، دیسان به‌لگه فلم ژی هه‌ر ئێك ژ فلمێن (نانێ پیروز، كیسه‌له، حه‌سه‌ن كێف، چیچكێن كۆچبه‌ر، جاسمێ جه‌لیل، سیپانۆ) بخوڤه دگرن، دیسان كورته فلم ژی هه‌ر ئێك ژ فلمێن (حه‌فت سه‌نفونی، ئه‌ڤێ دی، ئایشا، شینتل، ژوور، ده‌نگێ دناڤ پشتی بارانێ) بخوڤه دگرن.
