ئه‌م نه‌شێن ره‌خنێ ل كارێن هونه‌ری یێن ئێك بگرین
زنار تۆڤی:
ئه‌كته‌ر و شانۆكار به‌ریتان ئه‌ردال، خه‌لكێ باژێرێ ئامه‌دێ یه ل باكوورێ كوردستانێ، د دیداره‌كێ دا بۆ رۆژناما ئه‌ڤرۆ دیار كر: ئه‌ڤه پتری 22 سالانه ئه‌ز كارێ شانۆیی و ئه‌كته‌ریێ دكه‌م، هه‌تا نوكه من پشكداری د چه‌ندین شانۆگه‌ریان و فلمێن سینه‌مایی و هژماره‌كا درامایێن كوردی و توركی دا كریه، نوكه ژی ئه‌ز كار دناڤا چه‌ندین كارێن شانۆیی و درامایێ و سینه‌ما توركی دا دكه‌م، هه‌روه‌سا من پشكداری د دراما نازدار دا كریه، كو ب زمانێ كوردی هاتیه چێكرن و ل سه‌ر شاشا ته‌ره‌ته كوردی هاتیه وه‌شاندن، پاشی من پشكداری د هنده‌ك درامان دا كریه، كو ل چه‌ندین تیڤیێن توركی دا هاتینه وه‌شاندن كار كریه، د وان فلم و كاران دا من رۆلێن سه‌ره‌كی گێراینه.
ناڤهاتی گۆت ژی: ل باكوورێ كوردستانێ شانۆ د ره‌وشه‌كا نه‌باش دایه، هێشتا ئه‌م نه‌شیاینه زمانه‌كێ وه‌سا چێكه‌ین، كو ئه‌م بێژین ئه‌ڤه زمانێ شانۆیا كوردی یه، هێشتا زمان نینه، له‌وما د ئالیێ شانۆیا كوردی دا ئه‌م نه‌شیاینه سه‌ربكه‌ڤین، هه‌ر چه‌نده ئه‌م وه‌ك ئه‌كته‌ر و شانۆكارێن كورد ل باكورێ كوردستانێ نه گه‌له‌كین، به‌لێ هه‌ڤركی دناڤبه‌را مه دا هه‌یه و ئه‌م حه‌ز ناكه‌ین كه‌س پێشبكه‌ڤیت، چونكی ئه‌م ب تنێ ب چاڤه‌كێ به‌ری خۆ دده‌ینه هونه‌ری.
به‌ریتانی گۆت ژی: د نوكه دا مه پێدڤی ب ره‌خنێ و دانوستاندنێ هه‌یه، ژ پێخه‌مه‌ت ئه‌م د وارێ هونه‌ری دا پێشبكه‌ڤین و ئه‌و ئاسته‌نگێن ل پێشیا مه هه‌ین و دیار بكه‌ین و خۆ ژێ ده‌رباز بكه‌ین، به‌لێ مخابن، هه‌كه ئه‌م ره‌خنێ ل به‌رهه‌مه‌كێ هونه‌ری بكه‌ین، داكو كارێ وی باشتر بیت، ئه‌و دێ مه ب خائین ل قه‌له‌مده‌ت، له‌وما ئه‌م نه‌وێرین ره‌خنێ ل كارێن ئێكدو بگرین، هه‌ر چه‌نده مه پێدڤی ب كارێ ره‌خنێ هه‌یه و هه‌موو كارێن هونه‌ری ب ره‌خنێ پێشدكه‌ڤن، دڤێت ئه‌م ل چاره‌سه‌ریان بگه‌رین و هونه‌رێ خۆ پێشبێخین، دیسان زمان و ده‌ڤۆكا مه وه‌كی یا باشورێ كوردستانێ یه، له‌وما ئه‌ز دبێژمن بۆچی هونه‌رمه‌ندێن كورد یێن باكورێ كوردستانێ پشكداریێ د كارێن هونه‌ری یێن باشورێ كوردستانێ دا ناكه‌ن و به‌رۆڤاژی یێن باشور ژی پشكداریێ د كارێن هونه‌ری و درامایێ و سینه‌مایێ دا د یێن باكور دا ناكه‌ن، چونكی مه هه‌ردویان وه‌كو ئێك ئێش و ئازار و چاند و كلتۆر هه‌نه، بۆچی ئه‌م پشته‌ڤانیا ئێكدۆ ناكه‌ین؟، بۆچی ئه‌م ژ ئێك دووركه‌فتینه، ئه‌ز دبێژم ئه‌م خۆ بخۆ، سنووران چێدكه‌ین، دڤێت ئه‌م ڤان سنووران راكه‌ین و نه‌هێلین، دڤێت ئه‌م وه‌كو هونه‌رمه‌ند ڤان سنووران ژ دل و مه‌ژییێ خۆ بینینه‌ده‌ر. ئه‌و چه‌ند ژی دیاركر: د نوكه ئه‌ز ده‌بارا خۆ ب كارێ هونه‌ری دكه‌م و ئه‌ز دناڤا كارێن هونه‌ری دا كاردكه‌م و ئه‌ز نه‌چارم دناڤا هونه‌رێ بیانی دا كار دكه‌م و ئه‌ڤ چه‌نده بۆ من ب خۆ ژی كاره‌كێ گرانه، به‌لێ ئه‌ز ڤی كاری دكه‌م، هه‌روه‌سا دڤێت ئه‌م هه‌موو سینه‌ماكار و ئه‌كته‌رێن كورد ل هه‌ر چار پارچێن كوردستانێ پێكڤه هه‌ڤكاریا ئێك بكه‌ین و پێكڤه ژبۆ سه‌ركه‌ڤتنا هونه‌رێ كوردی كاربكه‌ین.
