ئه‌م هه‌می ته‌رمین, لێ كێمه‌ك ژ مه هۆش هه‌نه.
ژێگر ئه‌ره‌دنی
شانۆگه‌ریا هه‌شێن ته‌رمه‌كێ ژ نڤیسینا هێرڤی بلوش, ژ ده‌رهێنانا سه‌رحان ئه‌حمه‌د, ئێك ژ لاشانۆگه‌ریێن سه‌ندیكا هونه‌رمه‌ندێن كوردستانێ تایێ دهوكێ بوو, ل هۆلا محه‌مه‌د عارفێ جزیری هات بوو نمایشكرن, من دڤێت ب ڤێ گۆتنا دوستوفیسكی ده‌ستپێ بكه‌م ده‌ما دبێژیت”ئه‌م زیندی نه بێ ژیان و مری نه بێ مرن”, دشێم بێژم یا شانۆگه‌ریێ دڤییا بێژیت دڤێ گۆتنێ ژی دا گه‌له‌ك هه‌بوو, یا من دڤێت ده‌رباره‌ی باخڤم, و یا من ژێ وه‌رگرتی دیاربكم, هه‌ر چه‌نده گه‌له‌ك هه‌ڤالان گازنده هه‌بوون كو زێده یا گرتی بوو, و دڤێت پیچه‌ك دگه‌ل كه‌لتۆرێ مه گونجای با, یا من دڤێت بێژم ئه‌و شانۆگه‌ری ل سه‌ر هه‌ر مرۆڤه‌كێ دگونجیت, ما زێده‌تر دێ گونجاندن چاوابیت, یا دیاركری ئه‌و بوو كو ئه‌م هه‌می به‌نده‌یێن هاتنه‌كێ نه، دبیت ئه‌و هاتن چ جاران روینه‌ده‌ت, كودوی هێله‌كا بازنه‌ی دروست كریه و دهه‌مان ده‌م دا ده‌ركه‌ڤتن ژ وێ هێلێ قه‌دغه‌یه، ب تنێ وی ده‌می نه‌بیت ده‌ما ب هه‌ولدانا به‌زاندنا وێ هێلێ ڤه دبینه ته‌رم, چه‌ندین ده‌رگه‌ه یێن هه‌ین لێ هه‌می ده‌رگه‌ه هه‌می دگرتی نه, كه‌سه‌ك نه‌شێت ده‌ربكه‌ڤیت دبیت ب تنێ كودوی شیان هه‌بن بهێـت ژۆر لێ وی ژی ئه‌م یێن راده‌ستی چاڤه‌رێ بوونێ كرین, دبیت رۆژه‌كێ دێ ده‌رگه‌هان ڤه‌كت لێ ئه‌م دێ ده‌ركه‌ڤین و ئه‌و چ جاران ناهێت, پشتی چه‌نده‌ك ژ شانوگه‌ریێ چووی ژنوی هه‌ولا ڤه‌كرنا ده‌رگه‌هان هات دان لێ یا بێ مفا بوو, چونكی ئه‌م دهێن ژیانێ و هه‌تا تێدگه‌هین ژیان چیه و چ ره‌شبینی یه‌كه ئه‌م تێدا دژین و دئێشین, ئه‌م ژنوی ده‌رگه‌هان دروست دكه‌ین بۆ ده‌ركه‌ڤتنێ، چونكی ئه‌گه‌ر ده‌رگه‌ه نه بوون ڤه‌كرن و گرتنێ چ ڕامانا خوه نابیت, لێ ئه‌گه‌ر ده‌رگه‌ه هه‌ر دێ دگرتی بن پا ل ڤێره ب هه‌بوونا وان چیه؟, كه‌واته هیچ!
دشانۆگه‌ریێ دا هات گۆتن”سه‌حكێ چه‌ند كرێت یێ مری”, لێ یا وی ڤییای بێژیت مه مرنێ ئه‌م كرێت دبینین لێ دده‌مه‌كێ ئه‌م هه‌رۆژ ب ژیانه‌كا كرێت خوه رازی دكه‌ین, ئه‌رێ گه‌لۆ ما ژ ژیان و ژیانكرنا دڤی سه‌رده‌می دا كرێتر هه‌یه؟!
تشته‌كێ دی یێ گرنگ من تێدا دیت و من دگه‌له‌ك نڤیسینێن خوه ژی دا گۆت یه؛ هه‌ر ئێك ژ مه مرۆڤان هنده‌ك خوه‌لی هه‌یه, تێرا خوه ژیانێ پیس دكت, كه‌واته ئه‌م هه‌می هه‌ڤكارین دكاڤلكرن و پیسكرن و وێرانكرنا ژیانا ئێك و دو دا, د جیهانێ ژی دا, ئه‌م هه‌می یێن ل هیڤیا رزگاركه‌ره‌كی نه ژیانێ بۆ مه جاردی دروست بكه‌ت ڤه, تژی جوانی و سرۆشته‌كێ جوان بكه‌ت, بێ ئه‌م بێژین هه‌ر تشت یێ جوان بوو به‌ری ئه‌م هه‌ولا جوانكرنێ بده‌ین, كه‌واته مه دڤییا كل بده‌ین مه یا كۆره كری, و د هه‌مانده‌م دا گازنده‌یان دكه‌ین كێ كۆره‌كر, بێ گۆمان مه بخوه, ئه‌م هه‌می ده‌سته چه‌پین و كه‌س ژ مه یێ دروستكرنێ نینه، ب كریار ب تنێ ده‌ڤێ مه یێ به‌شه و گازنده‌یان ژ وان خرابكاریان دكه‌ین یێن ئه‌م بخوه دكه‌ین, بێ داپێدانێ بكه‌ین مه بخوه یێن كرین, ل ڤێره ئه‌م فریشته یێ مافدار بوو ده‌ما دگۆتی وان”ما هه‌می تشتان ئه‌م دێ بو هه‌وه كه‌ین”, د وێ شانۆگه‌ریێ دا تشته‌كێ دی ژی یێ پێش چاڤ هه‌بوو ل سه‌ر مه مرۆڤان, ئه‌ز و تو برایێن ئێكین و حه‌ز ژته‌دكم و تو ژی هه‌ر وه‌سا, لێ ب مه‌رجه‌كێ تو نه دژی من بی به‌لكو دگه‌ل من د وێرانیێ دا به‌شدار بی, و بێ هه‌ول بده‌ی ره‌نگێ سپی ل وی دیواری بده‌ی یێ من پیسكری.
بۆچوونا من؛ شانۆگه‌ریه‌ك سه‌ركه‌ڤتی و ئاست بلند بوو, و جڤاكی پێدڤی ب جه‌كۆچان هه‌یه ژ بۆ هندێ مێشكێن ره‌ق بهێن شكاندن, دبیت هیڤیه‌ك هه‌بیت تۆڤه‌ك دناڤ دا هه‌بیت و شوین ببیت, دا ٍئه‌م بخوه كارێن خوه بكه‌ن و رٍِامانه‌كێ بده‌ین ژیانێ بێ چاڤه‌رێ هاتنا كودوی بین, یان ژی چاڤه‌رێ بین هه‌ر تشتێ ئه‌م ب ده‌ستێ خوه وێران بكه‌ین هنده‌ك بۆ مه دروست بكه‌ن دا ئه‌م وێران بكه‌ین ڤه.
