ئه‌م هه‌می فه‌رمانبه‌رین!
فه‌رمانبه‌ر: ئانكو ئه‌و كه‌سه‌كه ئه‌ڤێ لبن (فه‌رمانێ)! تنێ دێ فه‌رمانێ برێڤه به‌ت، یا دورست ئه‌وه ئه‌ڤ په‌یڤه تنێ ل ده‌زگه‌هێن له‌شكه‌ری بكارهاتبا و نه‌ك ل هه‌موو دام و ده‌زگه‌هاندا ، رامانا ڤێ په‌یڤێ ئه‌وه كو فه‌رمانبه‌ر تنێ دێ فه‌رمانێ بجه بینیت و نابیت هیچ ده‌ستكاری یان زێده‌ی ژده‌ڤ خوه په‌یدا كه‌ت!، بكورتی ئه‌م هه‌موو فه‌رمانبه‌رین، ئانكو ته هزره‌ك هه‌بیت، یان پێشنیازه‌ك، بخێرا خوه ئاقلی نه فرۆشه. مافێن فه‌رمانبه‌ری ژی یێن هه‌ین، ژبلی كو نه‌ساخ ببیت و توشی كاودانه‌كێ تایبه‌ت بیت، ئه‌م نزانین كو فه‌رمانبه‌ری ژی مافێ بریارێ ژی یێ هه‌ی. د رۆژانێت كاری دا ئه‌م هه‌موو هه‌ڤالێت خوه پتر ژ ده‌یكا زارۆكا دبینین و ده‌مێ رۆژێ ژی هه‌موو دگه‌ل هه‌ڤالێت كاری ده‌ربازدبیت. بڤی ره‌نگی جهێ كاری دبیته مالا ئێكێ، و قوَناغا نه‌خوه‌ش مالا مه‌یه. هه‌لبه‌ت په‌یوه‌ندی دگه‌ل رێڤه‌به‌ری لسه‌ر هه‌ڤالینیێ و مرۆڤكانێ و ب عه‌شیره‌تكانێ برێڤه دچیت به‌ری رێنما و قانونا كاری. هه‌ڤالینی و مرۆڤانی ژ جوانترین په‌یوه‌ندیانه د هه‌بۆونێ دا، لێ لده‌ڤ مه ئه‌ڤ هه‌ردوو په‌یوه‌ندیه پێ ل قانونێ و یاسا و دستوری و هه‌موو رێنما و مه‌رجێن كاری دانیت! سیسته‌مێ مه مرۆڤێ هه‌لبژارتیێ خودان شیان و هێز دكاریدا وه‌رناگریت، و بۆچی ل هه‌موو جهان ده‌ستێ راستێ یێ رێڤه‌به‌ری له‌گله‌گترین كه‌سه؟ ئه‌و كه‌سه ئه‌ڤێ چ ژ رێزگرتنێ نزانیت! كه‌تی و گه‌له‌ك وه‌كی به‌كروَكا یه و كێم زانینه. ده‌ستێ راستێ و جهێ باوه‌ریێ بۆ هه‌ر رێڤه‌به‌ره‌كی ئه‌و كه‌سه ئه‌ڤێ هندی رێڤه‌به‌ری دزانیت یان پیچه‌كێ كێمتر!،نیاسینا كه‌سایه‌تی و شیانێن علم و زانینا مرۆڤی ب چاڤێ رێڤه‌به‌ری ناهێته دیتن! ره‌شه‌كێ رێڤه‌به‌ری (سی ڤی) یا مرۆڤی دنڤیسیت بكه‌یفا خوه و پێشكێشی رێڤه‌به‌ری دكه‌ت! دبیت مرۆڤی بكه‌ته (گوه درێژ، سه، مه‌یمون، مارحلیسك، یان كێزگڵوَلك). ده‌ستێ راستێ و جهێ باوه‌رییا رێڤه‌به‌ری یێ دبێژیت: سه‌یدا بكێر چ ناهێت و نه چ كه‌سه و دبیت كورسیكا ته ژ ته بستینیت! رێڤه‌به‌ر دێ چه‌وا باوه‌ریێ ب كه‌سه‌كی هینیت و ده‌ستێ وی یێ راستێ یێ دایه نیاسین وه‌ك (جوَبرگ)!؟. لدویڤ دوویڤچوونا خوه و ئه‌گه‌رێن ه‌ه‌بۆونا كه‌سانێن كه‌تی د پلێن به‌رز دا، ئه‌ز ڤه‌دگه‌رینم بۆ ژیانا مه‌یا كۆمه‌لایه‌تی ئه‌ڤا مه وه‌رگرتی ژ (موَختاری) و (ره‌شه‌كی)!، نوكه دبێژنێ رێڤه‌به‌ر و جێگر!. ل كوردستانێ مرۆڤ بشیان و توانایێن خوه یێن عه‌قلی پێش ناكه‌ڤیت و نابلند بیته چ پلێن بلندتر د كاری دا، ژبه‌ر كو ئه‌م دڤێت فه‌رمانبه‌ربین.
