ئهم و ئهو زهیت و خهل
ئهم و ئهو
زهیت و خهل
ههڤالان.. د هندهك ژ ڤان نڤیسینان دا ئهز بهحسێ چهند تشتهكان دكهم ههتا سالا 2000 ژی ل كوردستانێ نهبوون، ههكه ههبان ژی مه ب خوه وهكو تهخا ههژار و بهلهنگازان نهدیت بوون و نهبوون.. ئێك ژ وان تشتێن مه گوهلێ دبوو و نهددیت زهیت بوو.. مه دۆهن (رووین) ددیت، ئهڤجا چ تهنهكهیێن مهزن یێن ئهلراعی یانژی قودیكێن بچووك یێن ئێك كیلۆ و دۆنهكێ هشك و زوها بوو، هندهك جاران كهڤچكێن مالان پێڤه دهاتنه شكاندن ههتا كو هندهك ژێ ئینابا دهر بۆ چێكرنا خوارنێ.. ل ئوروپا سیستهمهكێ دی یه، ناڤێ وی سیستهمی ژی زهیته.. زهیتا وانژی یا رۆنهو یا د بتلان دا نه د قودیكان دا وهكی ل دهف مه.. ههلبهت هوون دزانن كو ئێكێ وهكی من ب دۆنێ ئهلراعی مهزن بووی مهعیدێ وی یێ جهبار و قارهمان تهقهبولا زهیتێ ناكهت.. لێ پا زرۆف دزانن كا دڤێت ئهو مهعیده دۆنی ب خون یان زهیتێ؟
ل سویسرا..ههلبهت دێ زهیت بیت چونكی دۆن ههر ل سۆپهر ماركێتا نینه و ههكه ههبیت ژی مرۆڤ نانیاسیت، چونكی نه وهكی یێن مه یێن دهۆكێ و زاخو و ئامێدیێ و ئاكرێ نه!! درێژ ناكهم، رۆژهكی من ڤیا تێشتێ بۆ چێكهم، ئهز ژی ب ههمی شارهزای و سهربۆرێن خوه ل گهل دۆنی چوومه سۆپهر ماركێتهكا گهلهكا مهزن، بیست جاران هندی مازی بوو دا بۆ خوه دۆنی بكڕم و چهند هێكهكا ل گهل نانێ لوبنانیێ بێ تام و چایهكا حهفازا چێكهم..دێ باشه، من ئنیهت ئینا و چووم. ئهرێ دێ چاوا ب جهێ دۆنی كهڤم و هێشتا ژ فهرهنسیێ ب تنێ چاوانی باشی دزانم وهكی عهرهبا دهمێ فێر دبنهكوردیێ!! نێزیكی دو سهعهتهكا ما مهد سۆپهر ماركێتێ ڤه و خوه جهێ بوكورك و دهرزیكان من دیت، لێ من جهێ دۆنی نهدیت!!! ئینا نهچار بووم بچم ب ئهزمانێ خوه یێ لال بۆ خوه پسیار بكهم مهعیدهی چ حال بۆ من نههێلان هندی حر حرا ویه ژ برسا.. من تهبهقهكا هێكان یا بچووك ب دهستێن خوه گرت و چوومه دهف خاتینهكا وهكی سهمیره تهوفیق و من ئیشارهت كره هێكا و من گۆتێ من ئهو تشتك دڤێت یێ ڤان تێدا چێدكهن؟!
چاڤێن خوه زیق و پلیق كرن ل من!! من زانی من نهشیا ناما خوه ب دروستاهی بگههینمێ؟ و چونكی ئهو دو سهعهت بوون ئهز د وارا ڤه و كونج كونج ڤێ كهتم، من گۆتێ ل گهل من وهره و من بره دهف ئاغلهویكا و من ب ئیشارهتا و هێكا تێگههاند كو ئهزێ ل دۆنی دگهریێم دا هێكا تێدا بقهلینم و د دفنێن خوه دانم.. بۆ خودێ خاتینێ تهقسیری نهكر و ئهز برمه جهێ وان.. تهبعهن برایێ وه ژی پهنابهره و پهنابهر ژی فلسونه، بهری نه سهحكه مه جۆرێ زهیتێ و كوالیتا وێ، من بهرێ خوه د دایێ كا كیژ ژ ههمیان ئهرزانتره؟ منژی یا ژ ههما ئهرزانتر كری و بر گوركره ئاغلهویكێ، كر فششششش و ما وهكی ئاڤێ و هێكێن من كرینه تێدا ژی خوه، ههما ل سهر خاترا وێ زهحمهتا من بری خوه رهنگێ خوه نهگوهۆری و نهقهلیان!! دهركهفت كابرای خهلا شوونا زهیتێ كری.. من درێژكر..بهلی پا ئهڤه من بۆ ههوه ب كورتی نڤیسی، ههكه من ب تهفاسیلێن هوور بۆ ههوه نڤیسابا.. باوهر بكهن دڤێت دو ژمارێن رهبهق یێن رۆژناما ئهڤرۆ بۆ من هاتبانه تهرخان كر.. مهقسهدا من ل ڤێره ژی ئهوه كو بلا كهس شهرم ژ پسیارێ نهكهت.. تشتێ تو نهزانی پسیار بكه و ههكه بهرسڤا ب دلێ ته نهبوو، هێشتا پسیار بكه چ شهرم تێدا نینه.. بمینن ب خێر
