ئهم و ئهو عید میلاد!؟
دا ئهم یێن دراستگۆ بین ل گهل ههڤدو، كێ ژ ههوه جهژنا ژدایكبوونا خوه یان یا زارۆیهكێ خوه ههتا دووماهیا سالێن نۆتان دا ژی؟ دا نهبیته درهو، هندهكا دكر ل دهڤهرا بههدینان، بهلی پا ژ تبلین دهستان نه دبۆرین و مهیێن دی ئاهنگێن ژدایكبوون و رۆژبوونا تنێ د فلمێن مسری دا د دیتن و مهپێ دكرهكهنی و دگۆت ڤێجا ئهڤه چیه دایێ؟!! وهی عهجایب!! ل ههوه نا ڤهشێرم ژی من ب خوه ل سالا ١٩٩٦ عید میلادا كورێ خوه پهیوهندی یا ئێكێ ل مالا خالهتا وی ل شقێن گرێ باسێ كر و من نهوێریا ل مالا خوه بكهم ل بهرۆشكێ و من گهلهك كێم خهلك دهعوهت كرن، چونكی هینگی شهرمزاری بوو ئێكی عید میلادا كوڕ یان كچهكا خوه كربا.. نێ ههما ئهسلهن مه نه دزانی كا كهنگی خودێ ئهم داینه؟ ئهوا د جنسیێن مه ژی دا هاتیه نڤیسین ١/١ و ١/٧ و ١/١٠ ههمی كاتب عهدلی و ئهوێ ل بهر سجلاتێن نفۆسێ ل دووڤ زهوقێ خوه دنڤیسین!! ههكه رۆژهكێ من پسیارا دهیكا خوه كربا، دادێ خودێ ئهز كهنگی دام؟ دا بێژیت ههكو تهركێن هژیرا دپهقین یان ههكو گوندی د چوونه مازیا، یانژی ههكه گهلهكا شارهزا و كوردپهروهر با دا بێژیت، پشتی فلان شهڕێ پێشمهرگهی و كارهسات ئهو بوو نه دزانی كا شهر ل كیڤه بوو و كهنگی!! دێ ڤێجا وهره ئێخسیرۆ ل دووڤ ڤان گۆتنێن دادێ عید میلادا خوه بكه!!ب راستی مهچ ژ ڤان سهنی مهنیا نهدزانی، یاریهكا قۆسكانێ و كوركانێ بوو مه هزار و ئێك ئاهنگێن ژدایكبوونێ دئینان.. ههلكهفتا ڤێ سوحبهتێ ژی ئهوهكو بهری چهند رۆژهكا من یێ خوه كوشتی ب كهنیێ دهمێ ههڤالێ منێ نێزیك دلمان ی بۆ من بهحسێ ئێكهمین ئاهنگا عید میلادا خوه كری و كا چاوا بوو وی چكر؟ دلمان ژنووی گههشتبوو سویسرا و بۆ خوه ل شۆلهكی دگهریا هندهك خودان خێرهكا ژی بهره دهف كابرایهكی ل ئۆتێلهكا پێنچ ستێر دا شۆلی، ههیڤا ئێكێ وهكو تاقیكرن دا شۆلی و عاقلێ وان ژ كهسایهتی و شۆلێ وی بری، ئینا كره دائیمی.. سودفه پشتی چهند رۆژهكێن كێم دبیته عید میلادا دلمانی، (كو چ جاران نهكریه و نزانیت عید میلاد چیه) سپێدێ دچیته شۆلی دبینیت ناڤێ وی یێ ب تابلۆیا ئاگهداریا ڤه ل ئۆتێلێ؟ كابرا ژی وهسا تێدگههیت كو یێ هاتیه فهسلكرن ژ شۆلی و ئێكسهر دچیته دهف بهرپرسێ خوه و گینیكهكێ خهبهر و گازندا دبێژیتێ ب ئهزمانێ خوه (نه فهرهنسی دزانی و نهعهرهبی) و بێی مهرحهبا دبێژیتێ تو خاینی؟ كابرا ژی دبێژیتێ بۆ ئهز خاینم؟ دبێژیتێ ته دوهی ئهزێ تهعیین كریم و ئهڤرۆ فهسل كرم!! كابرایێ بهرپرسێ وی دمینیته حێبهتی..كورۆ چاوا مه تو فهسل كری؟ دبێژیتێ ناڤێ من یێ ب تابلۆیا ئاگههداریا ڤه؟بهرپرسێ وی ژی ئێكسهر تهلهفۆنا ژ یێ خوه مهزنتر دكهت و دبێژیتێ ههوه چاوا دلمان فهسل كر و كابرایهكێ زیرهك و شۆلكهره؟ ئهو ژی دمینیته حێبهتی و دبێژیتێ كێ فهسل كریه؟ دبێژیتێ پا ههوه بۆچی ناڤێ وی ب تابلۆیا ئاگهداڕیا ئۆتێلێ ڤهكریه؟ دبێژنێ فڕێكه دهف مه.. ههڤالێ منژی دچیته دهف وان و دبێژنێ (بۆن ئهنیڤێغسێر مسیۆ دلمان) ئانكو جهژنا ژدایكبوونا ته پیرۆز ب فهرهنسی و كارهتهكا ب 100 فرهنكا ددهنێ وهكو دیاریا وێ ههلكهفتێ، دلمانێ مه ژی هێشتا د مهسهلێ ناگههیت و دبێژیتێ ئهڤهچیه؟ دبێژنێ ئهڤرۆ عید میلادا تهیه، لهوما مه ناڤێ ته ب تابلۆیێ ڤه كر و ئهڤه ژی دیاریا ته!! بۆ زانین ئهڤه ب سهرێ من ب خوه ژی هاتبوو، لێ سوپاس بۆ خودێ من معلومات ل سهر ههبوون و ببوو ئێكهمین جار ئهز دیاریهكی ب ههلكهفتا عید میلادا خوه یا كاتب نفۆسی بۆ من دانای دكهم.. عید میلادێن وه ههمیان پیرۆز بیت.. بهلی پا ب راستی ئهم گهلهك بێ تام دكهین..
