ئهم و ئهو كوردینی قوماره
جار فایده و جار خوسارهت
گهلهك جاران من دگۆته دۆست و ههڤالان كو نهدۆست و نه دوژمن ناهێلن كوردستان سێ چار سالان ل سهر ئیك بمینیته ئارام و تهنا و خهلكێ وێ ب خۆشی بژیت، دڤێت ههر چهند سالهكا شلقهكێ لێبدهن و وهسا بۆ سهركردایهتی و مللهتێ وێ دیار بكهن كو ئهم ناهێلین هوون چ جاران ب ئارامی بژین!! سویچ؟ سهبب؟ كهسێ بهرسڤ نینه.. ههما زهوقێ وان وهسا لێددهت شۆل و كار و كهسپێ مه شهر و پێكدادان و كهربوكین و خیانهت و ههلی بابێ وی یێ هندهك كوردان بفرۆشیته ئێكێ بیانی!! ئهڤ چهندهیا بوویه عورف و عهدهت د ناڤ مه كوردان دا.. ههر ژ سهردهمێ كورد ل چیای و شهڕێ وهلاتان دكر، چ دهما دوژمنان هێرش نهكربانه سهر وان یانژی ب تشتهكێ دى ڤهمژوول ببان، دا كورد ل چیای بهربنهسهروچاڤێن ئێك و شهڕێ ئێكودو كهن!؟. پشتی ژ چیا ژی هاتینه خارێ ل سهرهلدانا سالا ١٩٩١ ێ دلێ كوردان ههمیان شاد بوو، چونكی دیت كو كورد بوونه ئێك، لێ مخابن وێ ئێكبوونا وان تهنێ سێ سالان ڤهكێشا و شهڕێ براكوژیێ دهسپێكر، لێ ل دووماهیێ ههر پێكهاتن و مللهتی سوجده بۆ خودێ برن و سوپاسیا ئهمریكا كر كو پێكئینان، لێ مخابن ئهمریكا وی دهمی باش یا ل كوردان شارهزا نهبوو و نهدزانی كو وان دهست كرنه د ناڤ دهستان دا، لێ پا ژ دلی نهدهركهفت و ئهو دلباش سافی نهبوون، سهرڤهسهرڤه خوه وهسا دیار دكر كو بوونه ئێك، لێ ژبنڤهبنڤه زۆر جوان پیلان دهاتنهگێران و ههر لایهنهكی بۆ خوه و بهرژهوهندیێن خوه كار و خزمهت دكر. ئهڤی خوهدا دگهل ڤی وهلاتی؟ یێ دی ژ كهربێت وی دا خوه دا د گهل وهلاتهكێ دی؟ ئێكی پهیوهندیهك د گهل حزبهكێ گرێدابا دا یێ بهرامبهر چیت ژ كهربادا پهیوهندیێن خوه د گهل حزبهكا ههڤدژ خورت كهت! مللهت ژی یێ مهجبۆر بوو دڤێت یان خوه بدهته د گهل ڤی یان یێ دی، ههكه دا ب دوژمن و خائین هێتهلقهلهم دان. دوژمنێن مهژی ماشاللا ب شارهزایی هێدی هێدی پانزین ب وان چریسكێن ئاگری دا دكر ههتا ئهڤرۆ بوویه ئاگرهكێ مهزن و بهری ههمیان بهربوو دههمهنێن مه ب خوه!؟ سهركردایهتیا كوردی و لایهنێن سیاسی خوه گهلهك پشتگهرمكر ب وان كهس و وهلاتێن خوه بۆ مهدایه نیشادان كو دۆستێن نێزیكێن مه و رۆژ نهبوو ئهگهر شاندهك یان كهسایهتیهكێ پلهبهرز سهرهدانا ههڤلێرێ و سلێمانیێ نهكربا و مه ژی مهحفیركێن سوور ههر ژ مالا وی ههتا گههشتبا فرۆكخانێن مه بۆ ددانا و ب چاڤان ڤه ماچی دكر و د ئێكرانێن خوهدا بهلاڤدكر، وهكو نامهك بۆ لایهنێ دی (عهبێ هاتهدهف ته؟ سهحكێ ئهڤه محۆ یێ ژ وی مهزنتر هاتهدهف من!!). ئهم مللهت ژی وهسا گهرم دبۆین و رادبووینه چهپا و حهرام ههكه مه تشتهك ژ وان سوحبهتا زانیبا! ئهم بووینه دو پارچه (ههر چهنده ب واقع ژ سالا ١٩٩٤ وهره، درهوه نهبووینه ئێك)، چونكی عینادی گههشتبوو وێ رادێ سلێمانیێ روونشتنهك یان كۆنفرانسهك ئهنجامدابا، دا ههڤلێر ژ كهربێن وێ دا دووماهى ئهنجام دهت! دهۆكێ فیستهڤالهكا سینهمای سازكربا، دا سلێمانیێ فیستهڤالهكێ و ئاهنگهكێ ساز كهت، ههتا ل سالێن دووماهیێ بوویه مۆدێل و گههشته وێ رادێ ڤێجا ههڤلێر و دهۆك خوه ب خوه ژی ههڤڕكیا ئێك دكر، ههڤلێرێ خولا عیراقێ ب فوتبۆلێ بر، دهۆكێ ژی نیڤهك مالیهتێ خوه دا یاریكهرێن بیانی و ئهوێ ژی كری، ههڤلێرێ تێدێكس سازدا؟ وهی پا دیاره ئهم ژ وان كێمترین؟ دهۆكێ ژی سازكر!! خهما سیاسهتمهداران ژی تنێ ئهو بوو ل وان چالاكیان ئامادهببن و ل رێزێن سینگی بروونن و چ جاران نهدگۆته كهسێ كا دێ وهرن رووننه خارێ ئهڤه هوون چ دكهن؟! سهر ڤی دهستوداری كوردستان برێڤهدچوو و مه بۆ خوه چ نهكر چونكی ئهم ب چڤێلیا ڤهمژوول بووین و وهكو من ل دهستپێكێ گۆتی دا ههر سێ چار سالان جارهكێ شلقهك ب كوردستانێ كهڤیت؟ جار ب هێزا دیجله و جار ب بڕینا بودچهی و جار ب داعش و ل دووماهیكێ ژی حهشدا شهعبی بۆ مهدهركهفت و ..هتد. ئانكو رهوشا كوردستانێ مینا رهوشا قومارچیهكی بوو، جار دا یێ فایده بیت و تژی پاره ههبن و جاران ژی دا یێ خوسارهت بیت!؟ ئهڤجا ژمن وهره ئێدی مه قومار بهسه و دا سیستهمهكی بۆ كوردستانێ بدانین، نوكه هندهكێن رهشبین دبێژن نهههرێ خلاس ڤێجارێ یا مه ژ بنی چوو؟ دبێژمه وان نهخێر چونكی ئهڤه نه جارا ئێكێ یه شلقهك ب كوردستانێ دكهڤن و ههر جارا یا زڤری و ل سهر پێن خوه راوهستیایی، لێ پا دڤێت ئهم بۆ خوه ژ ئهڤرۆ وێڤه د شارهزابین و تنێ پێشمهرگهی و مامۆستا بلند بكهین نه كهسێن دی!
