ئه‌نترنێتا بێ به‌رانبه‌ر ل جهێن گشتی وه‌كو ماله‌كا بێ دیوار یا ب مه‌ترسی یه
هه‌ر ئێك ژ مه د ماوه‌كی دا ژ ژیانا خوه ئه‌نترنێتا بێ به‌رامبه‌ر ل جهه‌كی یا بكارئینایی ب هه‌ر ره‌نگه‌ك و كاودانه‌كێ هه‌بیت دا بیت، به‌لێ شاره‌زایێن وارێ ژماره‌یان ب مه‌ترسی دده‌نه زانین.
بۆ جارا گه‌له‌كه‌كێ زانایێن ژماره‌یان ئاماژه ب مه‌ترسیا ئه‌نترنێتا بێ به‌رامبه‌ر ل جهێ گشتی كر و دده‌نه زانین ئه‌و جورێ ئه‌نترنێتێ وه‌كو ماله‌كا بێ دیواره و هه‌ر كه‌سه‌ك دشێت بهێته تێدا.
ماریا ئه‌پیرادور ئێك ژ شاره‌زایێن ژماره‌یانه ل تۆڕا جڤاكی یا تیك توكی ئاماژێ ب مه‌ترسیێن وای فایێن جهێن گشتی دده‌ت و ب ماله‌كا بێ دیوار دده‌ته زانین و دبێژیت كو هه‌ر كه‌سه‌ك دشێت بچیته د ماله‌كێ بێ دیوار دا. وه‌سان ژی خودانێن وان ئه‌نترنێتێن فری دشێن ب ساناهی بگه‌هنه داتایێن ته.
ددته دیاركرن ژی كو هه‌ر ماله‌كا چو تشتێ ئێمن ل پێش نه‌بیت وه‌كو دیوار یان ده‌رگه‌هـ یان هه‌ر تشته‌كێ وێ مالێ ب پارێزیت دێ ب ساناهی تشت ژێ هێنه دزین، بابه‌تێ تۆڕێن ئه‌نترنێتێ ژی گه‌له‌ك نێزیكی ڤی بابه‌تی یه. ئه‌ڤه هندێ ناگه‌هینیت كو هه‌ر كه‌سێ بڤێت دشێت بچیته د ناڤ پێزانینێن ته دا، به‌لێ ده‌لیڤا چوونا ناڤ پێزانینێن ته گه‌له‌ك یا زێده‌یه. ئه‌ڤ كه‌سێن بزاڤێن دزینا پێزانین یان هه‌ر تشته‌كێ كه‌سێ به‌رامبه‌ر دكه‌ن مفایی ب ره‌نگه‌كێ به‌رچاڤ ژ وان ئه‌نترنێتێن بێ به‌رامبه‌ر دبینن ئه‌وێن ل كافی و خوارنگه‌هـ و فرۆكخانه و جهێن گشتی هه‌ین چونكو چوونا د ناڤ دا ب ساناهیتره ژ هه‌ر جهه‌كێ دی.
ئه‌ڤ شاره‌زایه دده‌ته دیاركرن ژی كو ل جهه‌كێ ژ ڤی ره‌نگی كه‌سه‌كێ هه‌تا راده‌كی ژی یێ باش بیت بۆ ڤان كاران دشێت ب ساناهی بگه‌هیته داتایان، پێدڤی ناكه‌ت د ڤی واری دا گه‌له‌ك یێ شاره‌زا ژی بیت. ئاماژێ ب وێ چه‌ندێ ژی دكه‌ت هه‌كه هات و ئه‌ڤ جورێ ئه‌نترنێتێ بكارئینا بلا بزاڤێ بكه‌ن نێزیكی وان مالپه‌ران نه‌بن یێن پیچه‌ك ژی جهێ گۆمانێ یان یێن سلامه‌تیا وان ب ره‌نگه‌كێ دروست نه‌یا پاراستی بیت.
شیره‌تا وێ چه‌ندێ ژی ل مه دكه‌ت كو ل جهێ ژ ڤی ره‌نگی و ل سه‌ر ڤێ ره‌نگه ئه‌نترنێتێ چو جاران ژمارێن خوه یێن به‌نكی بكارنه‌ئینن و داتایێن خوه ژی ل چ جهان دانه‌گرن. ژ به‌ر كو تو دبیه پاریه‌كێ خوه‌ش بۆ ڤان ره‌نگه مرۆڤان.
هیڤی یه تێبینیا وێ چه‌ندێ بكه‌ن كو گه‌له‌ك ژ مالپه‌ر و ئه‌پلیكه‌یشنان داتایان ب ره‌نگه‌كێ ڤه‌شارتی بكارنائینن ل ده‌مێ ڤه‌گوهاستنا وان ب ره‌نگه‌كێ دروست. ئه‌ڤه ژی كاری بۆ هێرشبه‌رێن ئه‌نترنێتێ ب ساناهی دئێخن دا كو ده‌ست ب داننه سه‌ر ناڤێن بكارئینه‌ران و ژمارێن وان یێن نهێنی و گه‌له‌ك تشتێن دی یێن پێزانینێن هه‌ستیار و ل دووماهیێ ئاریشه ژ ڤان ره‌نگه بابه‌تان دروست دبن.
گه‌له‌ك جاران ژی ل ڤان ره‌نگه جهان، هێرشكه‌ر ب خوه هێلێن ئه‌نترنێتێ یێن نه‌یێن وان جهان دروست دكه‌ن و به‌رهه‌ڤ دكه‌ن بۆ خه‌لكێ ئاسایی و ئه‌و ژی نزانن كو ئه‌و هێله نه د دروستن و ب كار دئینن، ئه‌ڤه ئكێسه‌ر و ب ره‌نگه‌كێ گه‌له‌ك ساناهی دكه‌ڤنه داڤێن وان و دبنه پاریه‌كێ ب ساناهی بۆ وان. ژ به‌ر هندێ ژی هه‌كه نه‌چار بوون ڤان تۆڕان بكاربینن ژی گه‌له‌ك د هشیار بن.
