ئه‌ندازیارێ دیپلۆماسیا توركیا، پێدڤیه پێنگاڤێن ب له‌زتر بهاڤێژیت
ده‌وله‌تا كوردی گه‌ره‌نتیا ته‌ناهیا كوردستانێ و هه‌رێمێ و جیهانێ و سه‌روه‌ریا مرۆڤاتیێ یه، هه‌كه گه‌لێ كوردستانێ ده‌وله‌تا خوه یا نیشتمانی ئاڤا بكه‌ت، دێ سه‌روه‌ریا گه‌لان و هه‌موو گه‌ل و نه‌ته‌وه و پێكهاتێن عیراق و ئیران و تورك و سووریا هێته دابینكرن، به‌روڤاژی داخویانی و ئاخافتنا سه‌رۆك وه‌زیرێن توركیا به‌رێز ئه‌حمه‌د داود ئۆغلۆ سه‌رۆك وه‌زیرێن توركیا و سه‌رۆكێ توخم په‌رستیا مه‌هه‌پێ ده‌وله‌ت باخچه‌لی ئێك ژ وان دبێژیت سه‌روه‌ریا كوردستانێ و قه‌واره‌كێ سه‌ربه‌خوه و ئازاد و دیموكرات و ده‌وله‌تا كوردی ب مه‌ترسیه بۆ هه‌رێمێ و ئێكێ دی دبێژیت ئه‌گه‌ر ئه‌ز بوومه ده‌ستهه‌لاتدار دێ ئالایێ توركیا ل سه‌ر چیایێ قه‌ندیلێ بلند كه‌م، ئه‌ڤ هه‌ردو داخویانیه گه‌له‌ك مه‌ترسی نه بۆ چاره‌نڤیسێ هه‌موو گه‌ل و نه‌ته‌وه و پێكهاتێن ده‌ڤه‌رێ و جیهانێ، ئه‌ڤ بۆچوونێن ڤه‌مایی و هشك باوه‌ر بنگه‌هێ نه ئاراماهیا جیهانێ نه، دڤێت ده‌ستهه‌لاتدارێن توركیا ڤێ چه‌ندێ ب ئاوایه‌كێ زانستی و دۆرهیلی و ژیرانه به‌رچاڤ بگرن و دوور ژ هه‌ست و نێرینێن توخم په‌رستیێ، چونكو گه‌له‌ك رۆن و زه‌لاله كو ئه‌ڤ نێرێن وان خزمه‌تا توركیا ناكه‌ت و دبێژمه به‌رێز داود ئۆغلۆ ب ژیرانه و زیره‌كانه و وێره‌كانه هه‌لویستێ خوه دیار بكه بۆ چاره‌كرنا دۆزا كوردی و نه‌خشه‌رێیه‌كا دروست بۆ چاره‌كرنا پرسا كوردی بكاربینه، كو ئه‌ڤ نه‌خشه‌رێیه دێ ته‌ناهی و سه‌روه‌ریێ بۆ هه‌موو ده‌ڤه‌رێ دابین كه‌ت، به‌رێز داود ئۆغلۆ ده‌وله‌تا كوردستانێ دێ كنار و په‌راڤێن ته‌ناهی و ئارامیێ بۆ توركیا و سووریا و عیراق و ئیرانێ دابین كه‌ت، به‌رێز ئۆغلۆ ئه‌گه‌ر تو ئه‌ندازیارێ دیپلۆماسیا توركیا بی، هه‌ول و بزاڤێ بكه ل سه‌ر ئاستێ ئیران و توركیا و عیراق و سووریا جڤینه‌كێ پێكڤه بكه و بزاڤێ بكه بۆ دیاركرنا چاره‌نڤیسێ گه‌لێ كوردستانێ و مافێن وان بده‌یێ و دانپێدانێ ب مافێن وان بكه، ڤێ پێنگاڤا دیرۆكی بهاڤێژه دا ته‌ناهی و ئارامی هه‌موو ده‌ڤه‌رێ و رۆژهه‌لاتا ناڤه‌راست ڤه‌گریت، نه‌كو داخۆیانیێن ئاگری بده‌ی ژبه‌ر كو ده‌وله‌تا كوردی نه مه‌ترسیه بۆ ده‌ڤه‌رێ، دڤێت ئۆغلۆ ئه‌ندازیارێ دپلۆماسیه‌تا توركیا ئه‌ڤ ئاخافتنه نه‌كربا، ژ به‌ر كو ئه‌ڤ گۆتنه د چه‌رخێ 21 دا نابیت بهێته گۆتن، دڤێت هه‌ر چار ده‌وله‌ت، توركیا، ئیران، عیراق، سووریا، كێشا كوردی چاره بكه‌ن داكو خه‌لك و ده‌ڤه‌ر بكه‌ڤیته د خۆشی و ته‌ناهیێ دا، ژبه‌ر كو دێ بینی ل ڤان هه‌ر چار وه‌لاتان به‌رده‌وام خه‌لك یێ نه‌رازی یه و نه‌دیمۆكراسیه‌ت یێ هه‌ی و په‌ڤچوون یێ دروست دبن و ئازادی ب خه‌لكێ وێ ناهێته دان، به‌روڤاژی نه‌چاره‌كرنا پرسا كوردی چ قازانج و مفا و سه‌روه‌ری بۆ هه‌ر چار ده‌وله‌تێن كوردستان پارچه پارچه‌كری نینه، دڤێت ل دووڤ قانوونێ ره‌فتارێ ل گه‌ل مافێن زه‌لال و ره‌وا یێن گه‌لێ كورد بكه‌ن و پرسگرێكا كوردان چاره بكه‌ن، داكو گه‌لێ كورد ژی مافێ وێ چاره‌نڤیس بهێته دابینكرن وه‌ك هه‌موو گه‌ل و نه‌ته‌وه و پێكهاتێن دی یێن جیهانێ، دڤێت ئێكدو قه‌بوول بكه‌ین و ب هشیاری و زانابوون ل چاره‌سه‌ریا بگه‌رین نه‌ك ئالوزیان دروست بكه‌ین و بگه‌هنه وێ باوه‌ریێ كو چاره‌كرنا دۆزا كوردی دێ ته‌ناهی و ئاشتی ل ده‌ڤه‌رێ په‌یدا بیت و مفا دێ بۆ هه‌موو لایه‌كێ بیت.
