ئه‌ندامه‌كێ په‌رله‌مانێ كوردستانێ:گرتنا ده‌رگه‌هێن قوتابخانا بۆ ده‌مێ شه‌ش رۆژان كاریگه‌ری ل سه‌ر پڕۆسا خواندنێ هه‌بوو
هه‌ولێر، قائید میرۆ
رێڤه‌چوونا پڕۆسا هه‌لبژارتنان و درێژاهیا ده‌مێ بانگه‌شێ كاریگه‌ری لسه‌ر كه‌رتێ په‌روه‌ردێ هه‌بوویه و ئه‌ندامه‌كێ لیژنا په‌روه‌ردێ ژی ئاشكراكر، هه‌گه‌ر ئاسته‌نگ بۆ كه‌رتێ په‌روه‌ردێ بهێنه چێكرن ئه‌ڤه مینا دو سالێن بۆری دێ كاریگه‌ریێن زۆر خراپ هه‌بن لسه‌ر كه‌رتێ په‌روه‌ردێ و ئاستێ زانستیێ قوتابیان.
مامۆستا هه‌یبه‌ت محه‌مه‌د، بۆ رۆژناما ئه‌ڤرۆ دیاركر” ژبه‌ر درێژیا ده‌مێ بانگه‌شه‌یا هه‌لبژارتنان ئه‌ڤساله هه‌ر ده‌ستپێكا ده‌واما قوتابخانان بانگه‌شه‌یا لایه‌نێن پشكدار د هه‌لبژارتنان هاتنه ده‌ستپێكرن و كاریگه‌ریێن زۆر خراپ هه‌بوون لسه‌ر ده‌روونێ قوتابی، چونكه ئه‌م وه‌لاته‌كێ پێشكه‌فتی نینه و زارۆكژی پشكداربووینه د بانگه‌شه‌یا هه‌لبژارتنان، ل هه‌رێما كوردستانێ بانگه‌شه بشێوه‌یه‌كیه كاریگه‌ری لسه‌ر هه‌موو تاكه‌كی هه‌یه، قوتابی ب رێیا تۆڕێن كۆمه‌لایه‌تی و كه‌نالێن راگه‌هاندنێ و هنده‌ك جاران بشێوه‌یه‌كێ راسته‌وخۆ پشكداربوویه د هه‌وا بانگه‌شه‌یێ، بێگومان ئه‌ڤێ چه‌ندێ كاریگه‌ری هه‌بوویه لسه‌ر ده‌روونێ قوتابی و هاتینه ڤه‌قه‌تیان ل پڕۆسا په‌روه‌ردێ و ژینگه‌ها قوتابخانێ، ئه‌ڤێ چه‌ندێ زیانێن خۆ هه‌نه بۆ په‌روه‌ردێ، نابیت بابه‌تێ خواندنێ دگه‌ل پرسێن سیاسی بهێته تێكه‌لكرن.
موسلم عه‌بدولا، ئه‌ندامێ لیژنا په‌روه‌ردێ لپه‌رله‌مانێ كوردستانێ بۆ رۆژناما ئه‌ڤرۆ گۆت” ده‌ستپێكا پڕۆسا خواندنێ ئه‌ڤساله بشێوه‌یه‌كێ ئاسایی بڕێڤه‌چوو، به‌لێ گرتنا ده‌رگه‌هێن قوتابخانا بۆ ده‌مێ شه‌ش رۆژان ب ئه‌گه‌رێ رێڤه‌چوونا هه‌لبژارتنان كاریگه‌ری هه‌بو لسه‌ر پڕۆسا خواندنێ و دووركه‌فتنا قوتابی ل قوتابخانێ، ئه‌ز باوه‌رم هه‌لبژارتن دده‌مێ گونجای نه‌بوون بۆ پڕۆسا په‌روه‌ردێ، چونكه هێشا كاریگه‌ریێن دو سالێن بۆری مابوون لسه‌ر قوتابی و مامۆستا، ئه‌گه‌ر بهێت و ژێبڕینا مووچه‌ی بهێته ده‌ستپێكرن و ڤایرۆسا كۆرۆنایێ زێده‌تر ببیت ئه‌ڤه بێگمان دێ پڕۆسا په‌روه‌ردێ دیسان تووشی شكه‌ستن بیت و زیانێن ڤێجارێ دێ زۆر مه‌زنتربن ل دو سالێن بۆری، هه‌روه‌سا پێدڤیه چو بهێنڤه‌دانێن دی نه‌هێنه راگه‌هاندن بۆ كه‌رتێ په‌روه‌ردێ و ده‌لیڤێ بده‌نه قوتابی و مامۆستا بشێن ئه‌ڤساله پرۆگرامێن قوتابخانێ بته‌مامی بخوینن.
موسلم عه‌بدولای ئاشكراكر” پڕۆسا په‌روه‌ردێ ئه‌ڤساله دبن تاقیكرنانه و دڤێت هه‌موولایه‌ك ئاگه‌هداربیت ئاستێ زانستیێ قوتابیان یێ به‌ره‌ف لاوازیێ دچیت، ئه‌ف ئاسته‌نگێن بۆ كه‌رتێ په‌روه‌ردێ تێنه چێكرن هۆكارێن سه‌ره‌كینه بۆ پاشڤه‌چوونا كه‌رتێ په‌روه‌ردێ، نابیت ب چو شێوه‌یه‌كی ئاسته‌نگ بۆ كه‌رتێ په‌روه‌ردێ بهێنه چێكرن و ده‌وام بشێوه‌یه‌كی ئاسایی بهێته‌كرن، نه‌ك هه‌ر جارێ ب به‌هانه‌یه‌كێ ده‌رگه‌هێ قوتابخانان بهێته گرتن و چه‌ند رۆژه‌كا بكه‌نه بهێنڤه‌دان، ئه‌ڤساله چو ده‌لیڤه نینه و كه‌رتێ په‌روه‌ردێ د قۆناغه‌كا هه‌ستاردایه بۆ كوردستانێ، چونكه مه‌دیت دده‌مێ دو سالێن بۆری چه‌ند ئاریشه و ئاسته‌نگ بۆ كه‌رتێ په‌روه‌ردێ په‌یدابوون و باجا په‌روه‌ردێ زۆر یا دژواره بۆ جڤاكێ مه بگشتی و بۆ قوتابیان بتایبه‌تی، نابیت په‌روه‌ردێ بهێته پشتگوهاڤێتن و دڤێت كاره‌كێ وه‌سا بهێته‌كرن قه‌ره‌بوویا دو سالێن بۆری ژی بهێته‌كرن، كه‌سێن بسپۆر و شاره‌زا كار بكه‌ن بۆڤه‌دیتنا رێكێن نوو گرنگیدان ب كه‌رتێ په‌روه‌ردێ، لاوازیا كه‌رتێ په‌روه‌ردێ دده‌مێ نوكه‌دا دێ بۆ پاشه‌رۆژێ دیاربیت چه‌ند زیان هه‌نه.
