ئه‌ندامه‌كێ هه‌ڤپه‌یمانیا سیاده: چارچۆڤێ هه‌ماهه‌نگیێ نه‌شێت ببیته مه‌زنترین فراكسیۆن
ئه‌ڤرۆ:
ئه‌ندامه‌كێ جڤاتا نوونه‌رێن ئیراقێ ژ هه‌ڤپه‌یمانیا سیاده راگه‌هاند، هه‌ڤپه‌یمانیا چارچۆڤێ هه‌ماهه‌نگیێ ب هیچ شێوه‌كی نه‌شێت ببیته مه‌زنترین فراكسیۆنا جڤاتا نوونه‌ران و سه‌رۆك كۆماری دیار بكه‌ت.
مه‌شعان جبووری، ئه‌ندامێ هه‌ڤپه‌یمانیا سیاده یا سوننی گۆت” هیچ ده‌مه‌كێ دیاركری بۆ هه‌لبژارتنا سه‌رۆك كۆماری نینه، چونكه پێشتر ژڤانێ هه‌لبژارتنا سه‌رۆك كۆماری هاتیه درێژكرن، د دستووری دا ئێك هه‌یڤ بۆ هه‌لبژارتنا سه‌رۆك كۆماری هاتیه دیاركرن و ئالیێن سیاسی د سه‌ركه‌فتی نه‌بوون د هه‌لبژارتنا سه‌رۆك كۆماری دا”.
جبووری گۆت ژی” هه‌ڤپه‌یمانیا چارچۆڤێ هه‌ماهه‌نگیێ ب هیچ شێوه‌كی نه‌شێت ببیته مه‌زنترین فراكسیۆنا جڤاتا نوونه‌ران و سه‌رۆك كۆماری هه‌لبژێریت، مه‌به‌ستا موقته‌دا سه‌در ئه‌وه بۆ گه‌لێ ئیراقێ دیار بكه تكو چارچۆڤێ هه‌ماهه‌نگیێ ئاسته‌نگ بۆ پرۆسا سیاسی دروستكریه”.
ناڤبری به‌حس ل وێ چه‌ندێ دكه‌ت كو ئه‌و وه‌كو هه‌ڤپه‌یمانیا رزگاركرنا نیشتمانی هیچ كێشه ل گه‌ل مسته‌فا كازمی، سه‌رۆك وه‌زیرێن نوكه یێ ئیراقێ نینه، به‌لێ چارچۆڤێ هه‌ماهه‌نگیێ ناخوازیت كازمی د پۆستێ خوه دا به‌رده‌وام بیت.
رۆژا پێنجشه‌مبیا بۆری 31 ئادارا 2022 موقته‌دا سه‌در، رێبه‌رێ ره‌وتێ سه‌دری د تویته‌كی دا راگه‌هاند، یێن شیاین ببنه سه‌ركه‌فتی د هه‌لبژارتنان دا و مه‌زنترین فراكسیۆنا شیعی یه كو دشیان دایه كه‌سه‌كی به‌ربژار كه‌ن بۆ پۆستێ سه‌رۆك وه‌زیران كو ل ده‌ف هه‌موویان یێ په‌سه‌نده.
موقته‌دا سه‌در گۆت ژی، پێكئینانا هه‌ڤپه‌یمانیا مه هنده‌ك یێن بێزاركرین كو ئاسته‌نگان دروست دكه‌ن و نوكه ژی د دروستكرنا به‌ربه‌ستان د به‌رده‌وامن.
رێبه‌رێ ره‌وتێ سه‌دری دیاركر ژی، بۆ وێ چه‌ندێ ئیراق بێ حوكمه‌ت نه‌مینیت و ره‌وشا ئه‌منی و ئابووری و خزمه‌تگوزاری خراب نه‌بیت، ده‌لیڤێ دده‌مه سێكا په‌كخه‌ر بۆ وێ چه‌ندێ دانوستاندنان ل گه‌ل هه‌موو فراكسیۆنان بكه‌ن بێ جوداهی بۆ پێكئینانا حوكمه‌تا زۆرینه‌یا نیشتمانی، بێ فراكسیۆنا سه‌دری هه‌ر ژ ئێكێ هه‌یڤا ره‌مه‌زانێ و بۆ ده‌مێ 40 رۆژان.
ل 26 و 30 ئادارا 2022 جڤاتا نوونه‌رێن ئیراقێ نه‌شیا سه‌رۆك كومارێ نوو هه‌لبژێریت، ل نیڤ 41 به‌ربژاران دا ژ ئه‌گه‌رێ بایكۆتكرنا كۆمبوونێ ژ ئالیێ هه‌ڤپه‌یمانیا چارچۆڤێ هه‌ماهه‌نگیێ و چه‌ند فراكسیۆنێن دی كو زێده‌تر ژ سێكا تێكرایێ هه‌ژمارا ئه‌ندامێن جڤاتا نوونه‌ران پێك دئینن.
موقته‌دا سه‌در كو فراكسیۆنا وی خودان 73 ئه‌ندامێن جڤاتا نوونه‌ریچن ئیراقێ یه، داخواز ژ په‌رله‌مانتارێن ره‌وتێ خوه كریه ده‌ست د وێ پرسێ دا نه‌ده‌ن، نه ب باشی و نه ب خرابی.
