ئه‌ندام په‌رله‌مانه‌كێ ئه‌لمانیا ئاگه‌هدارى ره‌وشا ئاوارێن دهۆكێ دبیت
ئه‌ڤرۆ، رێوار مزیرى:
شانده‌كێ په‌رله‌مانتار و زه‌لامێن ئولى یێن وه‌لاتێ ئه‌لمانیا ئه‌ڤرۆ رۆژا دووشه‌مبى 13/4/2015 ژ بۆ ژ نێزیك هایداربوون ژ ره‌وشا ئاواره و په‌نابه‌رێن ئاكنجى دكه‌مپاندا ل پارێزگه‌ها دهوكێ سه‌ره‌دانا پارێزگه‌ها دهوكێ و كه‌مپێن كه‌به‌رتو یا ئاواران و دومیز یا په‌ناران دا.
سالم سه‌عید به‌رپرسێ په‌یوه‌ندى و راگه‌هاندنێ ل كه‌مپا دۆمیز یا په‌نابه‌رێن رۆژئاڤا بۆ ئه‌ڤرۆ نیۆز گۆت: شاندێ په‌رله‌مانتار و زه‌لامێن ئاینى یێن ئه‌لمان یێ پێكهاتبوو ژ (كارل سشوارلینك) ئه‌ندامێ په‌رله‌مانێ ئه‌لمانیا و (جوشن به‌یدى گێلد) نوینه‌رێ كاسولیكێن ئه‌لمانى، و (هولگه‌ر تیلمان) نوینه‌رێ كونسولخانا ئه‌لمانیى ل هه‌ولێرێ، و (نێجات بوزان) نوونه‌رێ كومیته‌یا ئێزدییان ل ئه‌لمانیا سه‌را كه‌مپا كه‌به‌رتو دا یا كو ئاوارێن وێ ژ شنگالێ و ده‌ڤه‌رێن دى یێن عیراقێ هاتین و ژ نێزیك هایدار بوو ل ره‌وشا وه‌لاتیێن موسلمان و مه‌سیحى و ئێزدى یێن ئاواره‌یى پارێزگه‌ها دهوكێ بووین.
هه‌روه‌سا ناڤهاتى گۆت: پاشان شاندى سه‌ره‌دانا كه‌مپا دۆمیز كر و ژلایێ (ئه‌ندازیار ادریس نبى صالح) رێڤه‌به‌رێ كه‌مپێن په‌نابه‌ر و ئاواره‌یان و خانم (لیلان محمد صالح) رێڤه‌به‌را كه‌مپا دۆمیز هاتنه پێشوازیكرن و د روونشتنێ دا باس ل ئاریشه و ئاسته‌نگێن په‌نابه‌ر و ئاواران هاتنه كرن دا كو هایدارى وان كاران ببن یێن كو رێكخراوێن ئه‌لمانى ل پارێزگه‌ها دهوكێ ئه‌نجام دده‌ن و باس ل هه‌ڤالینیا حكومه‌تا هه‌رێما كوردستانێ و یا وه‌لاتێ ئه‌لمانى یا كرن.
ل دووماهیێ سالم د بێژیت: دووڤ دا شاندێ ناڤبرى سه‌ره‌دانه‌كا مه‌یدانى دناڤ كه‌مپا دومیز دا كر و ژ نێزێك ته‌ماشه‌یى ره‌وشا په‌نابه‌ران و ب تایبه‌ت بوارێن خواندن و ساخله‌میێ كرن و د روینشتنه‌كا تایبه‌تدا دگه‌ل ماموستایان ئاماژه ب رولێ بلندێ حكومه‌تا هه‌رێما كوردستانێ كر، و شاندێ په‌رله‌مانتار و زه‌لامێن ئاینى دگه‌ل ماموستایێن په‌نابه‌رێن رۆژئاڤا، كومبوو و گوهدارییا ئاسته‌نگێن وان كرن و سوزدان كو داخازیێن وان بگه‌هیینه حكومه‌تا ئه‌لمانیا، داكو یا پێدڤى بو په‌نابه‌ران بهێته كرن و شاندێ ئه‌لمان بۆ ماموستایان گوت سه‌ره‌رایى هه‌موو كێشه‌ییان لێ یا كو دشیانێت حكومه‌تا هه‌رێما كوردستانێ دا هه‌یى پێشكێشى وه‌كریه و ژلایێ خوڤه ئه‌ندازیار (ادریس نبى صالح) رێڤه‌به‌رێ كه‌مپێن ئاواره و په‌نابه‌ران ل پارێزگه‌ها دهوكێ سوپاسییا حكومه‌تا ئه‌لمانى یا كر، ژبو پویته پێدانا وان ب ئاواره و په‌نابه‌رێن ل پارێزگه‌ها دهوكێ و ئه‌و كارو خزمه‌تگوزاریێن رێكخراوێن وان ل پارێزگه‌ها دهوكێ ئه‌نجام داین.