ئه‌نفالبوون ل بیابانا سه‌فه‌رێ
تێكسته‌كێ ئه‌ده‌بی
دلدار محه‌مه‌د
به‌ری كو سه‌فه‌ر بكه‌ت به‌ر ب نه‌دیاری و هندابوون وی د ناڤ له‌پێن خوه دا بكه‌ته به‌نده‌یێ هه‌لامه‌تێن ترسێ یێن نه‌بوونا ئاماژیێن ڤه‌گه‌رێ كاغه‌زه‌كا گلڤجی ژ به‌ریكا ساكۆیێ خوه یا چه‌پێ ئیناده‌ر و ل سه‌ر نڤیسی: ئه‌و پرتێن پێنڤیسی یێ ل به‌ر پیێن خوه راكه چانتا خوه تژی بكه ژ بیرهاتنێن زارۆكینیا بێ زارۆكینی دوهیا تام و ره‌نگ ئه‌ڤرۆ، تژی بكه ژ بیرهاتنێن خویه‌كێ پیربووی به‌ری گه‌نج ببیت، مری به‌ری بژیت و هه‌تا دوماهیك خالا دووریێ دوور هه‌ڕه، ئه‌ی ئه‌ڤرۆ تو كه‌نگی بوویه هه‌ڤالجێمكا دۆزه‌خێ؟! ئێدی چ خودیك د ڤه‌گوهاستنا وێنه‌یێ سه‌روچاڤان دا دراستگۆ نینن، هه‌ر تشت د ره‌نگیێ دا ئالۆده‌بوو، سپێده‌یان به‌ژن و بالا خوه ب كراسێ دره‌نگه ئێڤاران نخافت، دبێژن چركه‌یێن دهێن ژی هه‌ڤ شێوه‌نه ژ چركه‌یێن نها یێن د بێزاریێ دا نقوم بووین ل خالا خاتر خواستنێ ده‌ستێ خوه دا ده‌ستێ خوه تێر خوه هه‌مبێزكر گۆته خوه نها به‌ری چۆنێ ژ خوه خه‌ریبم، ژ كۆلانێن زارۆكاتیێ خه‌ریبم، لێ دڤێت بچم ب ڤیانه‌كا تژی نه‌ڤیان ببۆره، كو من خاتر ژ دۆزه‌خێ خواستی ئه‌و دۆزه‌خا من هه‌رده‌م وه‌ك به‌هه‌شته‌ك دیتی و ئه‌وێ هه‌می بزاڤێن دۆزه‌خبوونا خوه كرین.
