ئه‌نفالێن به‌رگارێ، كی دێ وێ دیرۆكا هه‌شفتی هه‌لشكێڤیت!
كه‌له‌كه‌ل و گه‌رمه‌گه‌رما هه‌می هاڤینا، بیرهاتنێن ته‌حل و سه‌ربۆرێن بێبه‌ڤل ل مه‌ژیێ هه‌ر كورده‌كی د هه‌لاڤێژنه‌ڤه، كاره‌سات د كاره‌ساتێ دا، مرن د مرنه‌كا بێوژداندا، گه‌ره‌م و بیابان و ترس و ڤه‌ده‌ری هه‌می دبنه دیمه‌نه‌ك، ژ دێمێ خه‌لكێ ئه‌نفالكری د په‌شن، هه‌می ژی پێكڤه د په‌یڤه‌كا ته‌حل دا خرڤه دبن، ئه‌وا دبێژنێ (ئه‌نفال).
ناحیا سه‌رسنكێ و نه‌خاسمه ده‌ڤه‌را به‌رگارێ خویكه‌كا مه‌زن ژ وان كریارا دابوو، ل رۆژا (2/9/2015) وه‌زاره‌تا شه‌هیدا بهه‌ڤكاری دگه‌ل رێكخراوا (88) مه‌راسیمه‌كێ بیرهاتنا وان ئه‌نفالا ساخكر، براستی ژی جهێ قه‌درگرتنێ بوو، چه‌ند تشته‌ك من دیتن، كو راستی دلێ مرۆڤی دئێشاندن، به‌لێ هه‌روه‌كی گه‌له‌ك تشت یێ بسه‌رڤه چووین، ئێدی لێڤه‌گه‌ریان ژی یا بزه‌حمه‌ته، ئانكو ئه‌م یێ ژ نیڤه‌كا رێكێ بۆرین، به‌لێ هه‌ر چاوابیت (هه‌ر زله‌ك و زیوانه‌ك دێ بنه نانه‌ك)، گاڤه‌ك ژ رێكخراوا (88) و وه‌زاره‌تا شه‌هیدا، گاڤه‌كا دی ژی ژ بیرهاتنێن خه‌لكێ ئه‌نفالكری، ل دویماهیێ دێ به‌ركارێ وان یێ خشكۆك و تازه و بمفا بیت. به‌لێ من پێباشه ئه‌ز ل سه‌ر چه‌ند خاله‌كا براوستم، كو چارچووڤێ ده‌ڤه‌را به‌رگارێ وه‌كی میناك وه‌ربگرم، ئه‌و ژی:
• ده‌ڤه‌را به‌رگارێ ده‌ڤه‌ره‌كا ژێك ته‌رابه‌رایه، ژلایێ ئه‌ردیڤه یا به‌رفرهه‌یه، به‌لێ خه‌لكێ وێ ژلایێ هژمارێڤه یێ كێمه، ل دویڤ داتایا (241) كه‌س دناڤ وان گوندێن بچویك دا ڤبه‌ر ئه‌نفالێ كه‌ڤتینه، پشكا مه‌زن ڤبه‌ر گوندێ گویزێ كه‌ڤتیه كو (98) كه‌س ژێ هاتبوونه ئه‌نفالكرن، گونده‌كێ بچویك و 98 كه‌س ژێ بهێنه ئه‌نفالكرن، ئه‌ڤه ڤه‌براندنا نفشێ مرۆڤایه، ل دویڤ پێزانینێن من هه‌ین كو ژ نیڤێ پتر ژ نێرێن ڤی گوندی هاتبوونه ئه‌نفالكرن.
• بۆچی ئه‌ڤ دربێ مه‌زن ڤده‌ڤه‌را به‌رگارێ كه‌ڤت، ئه‌زێ ل هزرێ كۆمه‌كا سه‌ده‌ما بۆ ڤێ چه‌ندێ هه‌بوون، ئه‌و ژی: بژلی كو هێلیڤان و حه‌وینگه‌ها شۆڕشێ بوو، ژ وان ده‌ڤه‌را بوو كو به‌ری هینگێ نه‌هاتینه ڤه‌گۆهاستن، مینا ده‌ڤه‌را به‌رواری و نێروه و رێكان كو لسالا (1976) كه‌ڤتبوونه به‌ر ئه‌نفالا ڤه‌گۆهاستنێ و ده‌ڤه‌رێن وان هاتبوونه به‌ردان، به‌لێ ده‌ڤه‌را به‌رگارێ نه‌هاتبوو به‌ردان، سپێده‌هیا رۆژا (25/8/1988) شه‌فه‌لحێ ترسێ و خوینێ كێلبێن خۆ گه‌هاندنه ڤێ ده‌ڤه‌رێ و ئه‌و مرۆڤ هه‌می بێ سێ و دو كرنه قۆربانێن كه‌ربا خۆ.
• كێم ژ تشتێن ئه‌نفالكریا هاتینه خرڤه‌كرن، تشتێ من دیتی لاندكه‌ك بوو، سه‌د چێرۆك ژ دارێ وێ یێ كه‌ڤن دهاتنه بیرا مرۆڤی، هه‌كه هه‌بن و لێ بگه‌رن ئه‌ز باوه‌ردكه‌م دێ ئه‌رشیڤه‌كێ هێژا ل سه‌ر وان كریا ل ده‌ڤه‌را به‌رگارێ بده‌ست كه‌ڤیت.
• قه‌یدكرنا وان قه‌ومینا ئه‌زێ ل هزرێ هه‌ر نه‌هاتیه كرن، هه‌كه شۆله‌ك لسه‌ر هاتبیته كرن، دێ گاڤه‌كا شه‌رمین بیت یان ژی خه‌لكه‌كی هنده‌ك تشتێن كێم لسه‌ر نڤیساینه، هه‌ر چه‌نده هنده‌ك داتا لسه‌ر هاتینه به‌لاڤكرن.
• د وێ چالاكیێ دا شكل و هژمارا ئه‌نفالكریێن به‌رگارێ هاتبوونه دیاركرن، ئه‌ڤه ژی جهێ قه‌درگرتنێ بوو، به‌لێ تشتێ بالكێش من دیتی ژ مالباته‌كێ (7) كه‌س هه‌بوون كو هاتبوونه ئه‌نفالكرن، ئه‌ڤه ژی چێرۆكێن دلئێشن كو دڤێت شۆل لسه‌ر بهێته كرن، بژلی ڤێ ژی كوره و ره‌میزاده (معوق) و پیر و جحێل و تۆلاز و سنێله ژ ددانێن ئه‌نفالێ قۆرتال نه‌بوون. زیانێن ئابووری و جڤاكی و كه‌رخین و ته‌رابه‌را بوونا خه‌لكی دڤێت مژاره‌كا دی یا هه‌لشكاڤتنا وێ كریارێ بیت.
لدویماهیێ هیڤیه جهێن شۆله‌ژێ خه‌مه‌كێ ژ وێ دیرۆكا هه‌شفتی بخون، دا بۆ به‌ربابێن بهێن دیاربیت و حه‌قێ وی خه‌لكێ ژار نه‌هێته به‌رزه‌كرن.
