ئه‌ورێن تاڕی
شه‌هره‌زاد مزویری
هه‌رێ ئه‌ورۆ
ئه‌ورێ تاری
نه تو بۆری نه تو باری
سالا ئه‌ڤ ساله سه‌رسه‌رێ مه
چه‌ندێ هاری و یێ دژواری
عه‌گید و خوه‌شمێرا
ژ ناڤ مه باركر!
خاترخواستن … زه‌ری و په‌ریا
وان ژی ئه‌ڤرۆ ل سه‌حارا
له‌زه‌ك كر و خوه به‌رزه‌كر
به‌ختێ خوه ل مه
خراب كر .. هیڤی.. خوه‌زی دانه د ڕێ دا
خوه رزگار كر
هه‌رێ ئه‌ورۆ، ئه‌ورێ تاری
چه‌ندێ هاری و دژواری
مێرگه درێژێ یا گازی دكه‌ت
وا بهار هات..
سه‌یرانیا پا هوون كانێ؟
ل بناڤا دارێ كوچك مایه
خوه‌لی سار بوو
كه‌س لێ نه‌ما.. ئاگری بكه‌نێ
ل ئاقاره‌كێ گوندێ مه
گیا هار بوو تۆلك شین بوو
خاتوونا مالا بابێ من
سالا ئه‌ڤ ساله سه‌رێ خوه دانا
و كه‌فته خه‌وێ
بارێ دارا سه‌ر ملێن خوه
تو بدانه یێ گرانه
چیاكێ دوده‌ره‌شێ چه‌ند بلنده
هێش ب عشقه
مۆركێن ڕستكا گه‌رده‌نا ته
یێن كۆمكرین
ته‌ڤنی بینه وه‌ره رێزكه
هه‌رێ ئه‌ورۆ ئه‌ورێ تاری
چه‌ندێ هاری یێ دژواری!
تو نه‌خۆڕه
پۆڕ و عه‌بدال ل چه‌مكی
ل به‌ر رووباری…
ژ مێژه وه‌ره جوان دخوینن
تو نه‌خۆڕه و یێ بێده‌نگ به
بایه‌ك هات و ژ كویستانا چه‌ندی ساڕه
نه جه‌رگێ مه هوین كر
نه نێرگزێن مه شین كر
بیرهاتنا ئه‌ز دوور برم
به‌فر و ئاگر تێكه‌ل كرن
هزر نه‌مان دگه‌ل وندا بووم!
جاره‌كا دی بۆ هۆزانا په‌یڤا برێسم
ل وارێ مه، ئه‌ورێ ره‌شۆ
ئه‌گه‌ر نه‌باری
تو دوور باربكه
ل جهێ بارانا ته
ژ چاڤا رۆندك دپه‌شن.
