ئه‌وێن ترێنێ هێلاین
فازل عومه‌ر
گه‌ر وه‌غه‌را ژیانا هه‌می مرۆڤان، وه‌كو نفشه‌كێ ئاڤاكه‌ر، ب وه‌غه‌را ترێنێ بشبهینین، هه‌رده‌م هنده‌ك كه‌س ناگه‌هنه ترێنێ؛ گیرۆنه، د جه دا دمینن. د جه دا مان، هه‌م جهكیه، هه‌م ده‌مكى.. و ڤێڕا، ژ هه‌مى گوهه‌ڕینا ل جهى و ده‌مى ڕووداى، گیرۆ دبن. ب گۆتنه‌كا دى، ئه‌و كه‌سێن ل ترێنێ سوار بووین ل جهه‌كى و ده‌مه‌كینه و ئه‌وێن سوار نه‌بووین، ل جهێ خوه و سه‌رده‌مێ چۆی و بۆرى، پیاسه‌یه‌كا به‌ندۆلانى دكه‌ن.
ئه‌ڤه بۆ كه‌سان و بۆ گه‌لان ژى دروسته. هنده‌ك ل سه‌رده‌مێ خوه دژین و هنده‌ك نه‌شێن ل ئه‌ڤى زه‌مانێ مرۆڤانیێ بژین. سه‌رێن خوه دكه‌نه د مێژوویێ ڕا و بزاڤێ دكه‌ن، زه‌مانى ل جه و وه‌خته‌كیى راوه‌ستینن
كۆمارا ئیسلامیا ئیرانێ، نموونه‌یه‌كێ زیندیه ژ ئه‌و ده‌وله‌تێن نه‌ڤێن ل ترێنا پێشكه‌فتنێ سوار ببن و رێزێ ل ژیانێ و پێكڤه‌ژیانێ و مافێن مرۆڤى و جوداهیان بگرت. كۆمار ب هۆشمه‌ندیا سه‌دسالێن ناڤین ل سه‌دسالا بیست و ئێكێ دژیت؛ زه‌مانێ ده‌وله‌تێن دینى نه‌مایه، ئه‌و نه به‌س ده‌وله‌ته‌كا دینیه، ده‌وله‌ته‌كا ئایینگه‌ریه. ل جیهانێ، سه‌را تاوانێن مه‌زن، سێداره‌دان به‌ره‌ڤ نه‌مانێیه، ئه‌و سه‌را هزرێن جودا و زمانى و ده‌رسووكێ رۆژانه مرۆڤان دكوژت. ل سه‌رده‌مێ ئنته‌رنێتێ و ته‌كنۆلۆجیا نوو، نهێنى ل هه‌مى جیهانێ ده‌گمه‌نن، ئه‌و سه‌را جه‌هسووسیێ، رۆژانه كه‌سان زیندان دكه‌ت و ل سێداره‌یێ دده‌ت. ل سه‌رده‌مێ جیهانیبوونێ، بزاڤ دهێنه‌كرن سینۆر لاواز ببن و هه‌ڤبه‌ندیێن مرۆڤانى و ئابۆرى و ره‌وشه‌نبیرى ل هه‌مى جیهانێ، بكه‌ڤنه پێش سیاسه‌تێ. ئانكو پرێن ئاشتێى ل ناڤ گه‌لان و ده‌وله‌تان بهێنه ئاڤاكرنێ، لێ كۆمار پرێن كوشتنێ و فه‌رته‌نه و جه‌نگان رادكێشت و ده‌ڤه‌ر هه‌مى یا راكێشایه شه‌ڕه‌كیى ئه‌نجام نه‌دیار.
ئه‌ڤ كۆمارا ژ به‌رپه‌ڕێن مێژوویێ ده‌ركه‌فتى و دڤێت ل ئه‌ڤى سه‌رده‌مى بژیت و خه‌لكى نه‌چار بكه‌ت وه‌كى وێ بژین، گه‌فان ل مه تنێ ناكه‌ت، گه‌فان ل پاشه‌ڕۆژا هه‌مى ده‌ڤه‌رێ و خه‌لكێ وێ دكه‌ت، له‌و راوه‌ستاندنا ئه‌ڤێ شه‌ڕخوازیا ژ مێژوویێ ڤه‌ژیاى، ئه‌ركێ مه هه‌میانه، به‌لكی ب ترێنا مرۆڤاتیێ ڕا بگه‌هین و بشێین ل ئه‌ڤى سه‌رده‌مى بژین.
تاوانا كۆمارێ، ته‌نها، كوشتنا زاڕۆكان نینه، تاوانا مه‌زنتر كوشتنا پاشه‌ڕۆژا گه‌لێن ده‌ڤه‌رێیه.
داكو ئه‌ز نه‌هێمه گونه‌هباركرن ب ته‌كبینیێ، ئه‌وا من بۆ كۆمارێ گۆتى، ب ره‌نگه‌كى نه ب یێ دى، ژ به‌غدا و دیمه‌شقێ و ئه‌نقه‌ره و گه‌له‌ك جهێن دى ژى دگرت.. هه‌رئێك ژ وان، ب ته‌رزه‌كێ جودا، د مێژوویێ دا به‌ند بوویه و نه‌شێت ل ئیرۆ بژیت.
ل دوماهیێ، من دڤێت ببێژم: ئه‌وا ل ده‌ڤه‌را مه روودده‌ت، جۆره‌كێ نه‌ساخبوونێیه ب مێژوویێ، هه‌كه‌ر نه‌بێژم په‌نجه‌شێرا مێژوویه و هه‌می په‌نجه‌شێر مرۆڤكوژ؛ چ زوو چ دره‌نگ.
