ئه‌و ئالایێ هه‌رده‌م به‌رز و بلند
خۆیایه هه‌ر نه‌ته‌وه‌ك یان گه‌له‌ك ب هێما و ئالایێ خوه یێ ناڤداره و ب وان ره‌نگێن ل سه‌ر پارچه قوماشی هاتی چێكرن كو ئێكسه‌ر و ب ساناهی دهێت ناسكرن كو مرۆڤ دزانت یا كیژ وه‌لاتی یه و ره‌نگێن ئالایێ كوردستانێ ژی سۆر و سپی و زه‌ر و كه‌سكه و تیرۆژكێن هه‌تاڤێ ل سه‌ر بیست و ئێكن ژ به‌ر جه‌ژنا نه‌ورۆزا كوردان هاتی یه خه‌ملاندن و هه‌ر كه‌سه‌ك ئه‌ڤرۆ دزانیت یا كیژ وه‌لاتی یه. ده‌مێ دیرۆكا كوردستانێ دخوینین لاپه‌رێن وێ هه‌می داستان و شۆره‌ش و به‌رخوه‌دانن ژ بۆ ئازادی و ئاشتیێ خه‌بات دكرن و ئه‌ڤه‌پشتی خه‌لكێ مه هه‌ست ب كۆله‌داری و زولم و زۆرداریا به‌رده‌وام دكر ل دووڤرا هه‌ستا نه‌ته‌وه‌یی به‌رز دبوو و زۆرداری نه‌دهاته قه‌بوولكرن و شۆره‌ش و سه‌رهلدان ده‌ستپێكر و دیرۆك شاهدێ ڤێ چه‌ندێ یه و پێشمه‌رگێن قاره‌مان هاتنه شه‌هیدكرن ژ بۆ ئازادی و ته‌ناهی و سه‌ربه‌خوبوون و رزگاركرنا وه‌لاتی گیانێن خوه دكرنه خه‌لات و دا زارۆیێن وان ب سه‌ربه‌ستی ژیانێ تام بكه‌ن و هه‌تا ئازادی ب كێم ده‌می هاته پێش و راگه‌هاندنا كۆمارا مهاباد ب سه‌رۆكاتیا قازی محه‌مه‌د هاته راگه‌هاندن لێ دووم نه‌كر و بریارا سیداره‌دانێ بۆ ده‌ركه‌فت ل رێكه‌فتی 16/12/1946ی و ژبه‌ر زیره‌كی و دلسۆزی و وه‌فاداریا بارزانیێ نه‌مر بۆ رێبازا كورداتیێ. . قاره‌مان (قازی محه‌مه‌د رابوو ئالایێ كوردستانێ دایه ده‌ستێ بارزانیێ نه‌مر وه‌ك ئه‌مانه‌ت بپارێزیت و به‌ره‌ڤانیێ ژ ئاخا پیرۆزا كوردستانێ بكه‌ت، لێ پشتی سێداره‌دانا قاره‌مان قازی محه‌مه‌د، پتر ئاگرێ شۆره‌شێ هه‌لبوو و گه‌نج و لاوێن كوردستانێ ب سه‌ركێشیا رێبه‌رێ نه‌ته‌وا مه بارزانیێ نه‌مر د چه‌په‌رێن به‌رخوه‌دانێ دا چه‌ك هه‌لگرتن ژ بۆ به‌ره‌ڤانیكرنێ و ئازادیێ گیانێن خوه دكرن قوربان و په‌یاما خوه دخواندن یان كوردستان یان نه‌مان ده‌نگ بلند دبوو و د ناڤ گوند و باژێر و چیاندا و سروودا نه‌ته‌وه‌یی دگۆتن (ئه‌ی ره‌قیب هه‌ر مایه قه‌ومی كورد زمان. .. .. ناشكێو دانایێ تۆپی زه‌مان.. . كه‌س نه‌بێ كورد دمرن. . كورد زیندبن. .. زیندبێ قه‌د ناكه‌ڤێ ئالا كوردان)
شۆره‌شا ئیلۆن و گولانێ به‌رده‌وام بوو دژی فاشستان هه‌تا سه‌هلدانا 1991ێ و رامالینا رژێما عه‌فله‌قی ژ كوردستانێ و دانانا حوكمه‌ت و په‌رله‌مانێ كوردستانێ و دامه‌زراندنا داموده‌زگه‌هێن حكومی و حزبی و ده‌رخستنا بریارا بلند كرنا ئالایێ كوردستانێ ل سه‌ر هه‌می داموده‌زگه‌هین حكومی و نه حكومی و چه‌ندین هۆزانڤان و ره‌وشه‌نبیر و سترانبێژان ب نڤێسین و ده‌نگێن خوه ب جوانیا سروشتێ وه‌لاتی و ئالایێ كوردستانێ ڤه‌هاندینه و ب پیرۆزی نیشادده‌ن و ئه‌و هه‌ر چار ره‌نگێن ل سه‌ر نیشانا هه‌بوون و مان و به‌رخوه‌دان و سروشت و پاقژی و خوینا شه‌هیدان ده‌ت و هه‌ر كورده‌كی ل ناڤ كوردستانێ و ده‌رڤه‌ی كوردستانێ شانازیێ ب ئالا خوه دبن و سه‌رۆك مسعوود بارزانی د په‌یڤه‌كا خوه دا دبێژت ((ئه‌ز ل ژ ێر ڤی ئالایی ژ دایك بوومه و ئاماده‌مه بۆ ڤی ئالایێ ژی بمرم.. . )).
وه‌لاتێ مه ژی ماف هه‌یه به‌ره‌ڤانیێ ژێ بكین چونكو ئه‌و جهی بابوكالێن مه نه و وارێ مه كوردایه و نه‌هێلین داگیركه‌ر بهوسته‌ك ئاخا مه بۆ خوه ببن و یاریان ب سامان و هه‌بوون و كلتوورێ مه بكن و بلا جاڤێن مه هه‌میان بۆ وه‌لاتی ڤه‌كری بن و دبێژم، ب هاتنا روَژا 17/12 بۆ هه‌ر سال فه‌ره نه‌ب تنێ بۆ رۆژه‌كێ رێزێ ل ئالایێ كوردستانێ بگرین به‌لكو هه‌می ده‌ما بپارێزین و پاقژ راگرین چونكو ئه‌ڤ ئالایه نیشانا گه‌لێ مه یه و دلسۆزیا مه هه‌میان د ئه‌رك و كاراندا وه‌فاداریه بۆ خوینا هزاره‌ها شه‌هیدان ئه‌وێن جانێن خوه كرین قوربان و هه‌تا ئه‌ڤرۆ ژی پێشمه‌رگێن قاره‌مان د سه‌نگه‌راندا به‌ره‌ڤانیێ ژ ده‌ستكه‌فت و هه‌بوونا سنۆرێن وه‌لاتی دگرن ب شه‌ڤ و رۆژ د چه‌په‌راندا ئاماده‌نه جانێ خوه بكه‌ن خه‌لات بۆ ئاخ و ئاڤاكرن و ئازادیا كوردستانێ لێ گه‌له‌ك جاران ب مخابنی ڤه چاڤێن مرۆڤی ل ئالایێ كوردستانێ دكه‌ڤیت ئه‌وێن ل سه‌ر بانێن هنده‌ك جه و داموده‌زگه‌ه و باره‌گایێن حكومی و له‌شكری و زانستی و جه‌ماوه‌ری و هۆتێل و موتێلان یێن بێ سه‌روبه‌ر بووین و هه‌تاڤێ یێ سۆتین و ئه‌و ره‌نگێن دورست یێن تێكداییێن و په‌رۆك ژی یێن تێكچوویی و قه‌تیایی و دلێ مرۆڤی بۆ دسۆژیت و هزار ئاخ و مخابنیا پێڤه دڤه‌هینیت و د گه‌ل خوه‌دا دبێژت خۆزیكا لیژنه‌یه‌كا تایبه‌ت بۆ ڤێ چه‌ندێ هه‌با و خه‌لكێ مه ژی هشیاریا نه‌ته‌وه‌یی به‌رزراگرتبا و ب رێز و ڤیان به‌رێخودابانه ئالایێ كوردستانێ چونكو ل هه‌می جیهانێ كورد پێ دهێت ناسكرن، ئه‌ڤه ژی یا بوی ناسناما گه‌لێ مه ل جیهانی، ل دووماهیێ جوانترین پیرۆزباهیا ئاراسته‌ی خه‌لكێ خوه هێژا و گشت قوتابی و مامۆستایێن خوه دكین و سه‌رێ رێز و نه‌وازشێ دچه‌مینین بۆ شه‌هیدێن كوردستانێ و هه‌ر به‌رز و بلند بت ئالایی كوردو كوردستانێ
