ئهو قهنجیا پارتى ل گهل ئێكهتیێ كرى!
كارزان فهقى
ههر چهنده د مهدیا خوه دا، ئێكهتى گهلهك خوه تووڕه و بریندار نیشان ددهت، لێ د ههمان دهم دا ل سهر ئاستێ لێدوانێن فهرمى یێن بهرپرسێن ئێكهتیێ، جۆره بێدهنگیهك دهێتهدیتن كو ئاماژهیهكه بۆ هندێ نها ئاریشا ئێكهتێ ئهو نینه روونشتنا پهرلهمانێ كوردستانێ بێ وان هاتیه كرن، چونكى ههر بخوه ژى ئهوا ل پهرلهمانێ كوردستانێ ل 18 شوباتێ هاتیهكرن، هیچ خال و پێنگاڤهكا وێ دژى خواست و حهزا ئێكهتێ نهبوویه و ئهو دهستهیا هاتیه پێكئینان ژى، دهمكیه ههردهما ئێكهتێ د ناڤ خوهدا رێكهفت (نهك ل گهل پارتى)، وى دهمى دكاریت بێ چ ئاریشه پۆستێ سهرۆكێ پهرلهمانێ كوردستانێ وهرگریتهڤه، چما مه گۆت د ناڤ خوه؟ بخوه ئاریشا مهزن یا ئێكهتیێ ئهڤهیه.
ئێكهتى چ ئاریشه ههیه؟
ئێكهتى ههر ژ رۆژا بێ سكرتێرێ گشتى یه، ژبلى كو دهمێ رێكهفتنا وێ ل گهل حزبێن دى گهلهك بهردهوام نابیت؛ بهردهوام ژى بالهكێ دژى رێكهفتنێ د ناڤ وێ دا ههیه، بۆ قووناغا نها ژى د پرسێن گرێداى ل گهل پارتى، بالهك ههیه دخوازیت ئێكهتى ژ ههژموونا گرۆپێن بۆیهرا 16 ئوكتۆبهرێ قورتال ببیت پتر خوه نێزیكى پارتى بكهت، ژ وان ژى مهلا بهخیتار و هێرۆ ئیبراهیم ئهحمهد، كو ئهڤه ههردو خوهدان ئاخفتن و كاریگهرن، لێ ل دهمێ بۆرى دژى هندهك پێنگاڤێن گرۆپێ ناڤهاتى بوون و ههتا سهر ههستى دژاتیا خوه بۆ ڤهگهراندنا دكتۆر بهرههمى راگههاندن و ل گهر بهربژاركرنا وى بۆ پۆستێ سهرۆك كۆمارى نهبوو، بهیانناما هیرۆ ئیبراهیم ئهحمهد و داخۆیانیێن مهلابهخیتارى بهلگهیێ ڤێ چهندێنه.
مهلا بهختیار و هیرۆ ئیبراهیم ئهحمهد؟
پێشتر بالێ ناڤهندا بریار و بالێ مهكتهبا سیاسى ههبوو، (بهحسى بهرى وى دهمى و جودابوونا بزاڤا گۆرانێ ناكهین)، نها ژى ب ههمان شێوهیێ بهرێ لێ ل ژێر ناڤونیشانهكێ دى، نها ژبۆ بالێ بنهمالا كۆسرهتى و بالێ بنهمالا تالهبانى هاتیه گوهۆرین، بێوژدانیهكا مهزنه ئهگهر ئهم باوهربكهین كو ئێكهتى ژ بهر پۆستێ پارێزگارێ كهركووكێ ل گهل پارتى رێك نهكهفتیه، چونكى ئهگهر ژ بۆ ئێكهتى ئهو پۆست گرنگ با، 16 ئوكتۆبهر روونهددا و ئێكهتێ خوه ل كهركووكێ نهدكره قهچاخ، لێ كۆمبوونێن درێژێن ئێكهتیێ ئاماژهیێ ئاریشهكا مهزنتر ددهنهمه، ئهو ژى د ناڤبهرا كۆسرهت رهسوول عهلى و پاڤێل و ههڤالێن وى یه، ددهمهكى دا نه پاڤێل تالهبانى و نه لاهوور شێخ جهنگى و نه ئاراس شێخ جهنگى، هیچ پۆستهكێ حزبى د ئێكهتێ دا نینه و بهردهوام پشكدارى كۆمبوونا مهكتهبا سیاسى و جڤاتا سهركردایهتیێ دبن، ئهڤه ل دهف كۆسرهت رهسوول ب زهحمهت دهێته ههرهسهكرن، سهرهراى كو ژ بۆ پۆستێ سهرۆكاتیا پهرلهمانى و جێگرێ سهرۆكێ حوكمهتێ وان ههردو بالان بهربژارێن خوه ههنه.
ئاریشا ئێكهتێ ل گهل ئێكهتى بخوهیه یان ل گهل پارتى؟
ئهو دو پۆستێ گرنگێن كو ئێكهتى حهتا نها نهشیایه بهربژاران بۆ دهست نیشان بكهت، پۆستێ سهرۆكێ پهرلهمانێ كوردستانێ و جێگرێ سهرۆكێ حوكمهتێ یه، ل ڤێرێ ههردو بالێن ئێكهتیێ بهربژار ههنه، ل گۆرى زانیاریان د كۆمبوونا بۆرى دا یا مهكتهبا سیاسى یا ئێكهتیێ كۆسرهت رهسوول ب ههردو كاندیدێن پاڤێل تالهبانى رازى نهبوویه كو بێگهرد تالهبانى پۆستێ سهرۆكا پهرلهمانى وهگریت ههروهسا قوباد تالهبانى ژى پۆستێ جێگرێ سهرۆكێ حوكمهتێ دوباره وهرگریتهڤه، دووماهى ئاخفتنا كۆسرهت رهسوولى ئهو بوویه، ههكه قوباد تالهبانى پۆستێ جێگرێ سهرۆكێ حوكمهتێ وهربگریت، پێدڤیه پۆستێ سهرۆكێ پهرلهمانى بۆ كاندیدێ بنهمالا كۆسرهتى بیت كو ئهو ژى رێواز فایهقه، و بهروڤاژى ئهگهر پۆستێ سهرۆكا پهرلهمانى بۆ بێگهرد تالهبانى بیت كو كاندیدێ بنهمالا تالهبانى و گرۆپا 16 ئوكتۆبهرێ یه، ل ههمبهر دا دڤێت پۆستێ جێگرێ سهرۆكێ حوكمهتێ ژ بۆ دهرباز كۆسرهت رهسوولى بیت. ئهو تشتێ نها دهمێ ئێكهتێ دكوژیت ئهڤ گهنگهشهیه و هند بهحس ل رێكهفتنا ل گهل پارتى و پۆستێ پارێزگارێ كهركووكێ ناهێته كرن.
ئهو قهنجیا پارتى ل گهل ئێكهتیێ كرى!!
ب روونشتنا پهرلهمانێ كوردستانێ و ههلبژارتنا دهستهیا سهرۆكاتیێ؛ پارتى باشیهك ل گهل ئێكهتیێ كر و دهمهكێ درێژتر پێ بهخشى كو ئێكه ل گهل خوه رێك بكهڤیت، چونكى نهبوونا دهمى چێدبیت جاردن ببا ئهگهرێ پهقینا ئاریشهیا دى یا مهزنتر كو نه سازانا ههردو بالێن بنهمالا كۆسرهتى و تالهبانیه، ههر ژبهر هندێ ژى نها داخۆیانى ژ ئهندامێن جڤاتا سهركرداتیا ئێكهتیێ و ئهندامێن مهكتهبا سیاسى هاتیه قهدهغهكرن، ژبۆى كو ئاریشهیا ناڤا كۆمبوونێ دزه نهكهنه ژ دهرڤه و گڤاشا جهماوهرێ ئێكهتى ژى ل سهر وان زێده نهبیت، لهورا ئێكهتى ئهگهر نانهكێ بخۆت، گرنگه دوونانان ژ بۆ مریێن پارتى بكهته خێر، چونكى پارتى ههم روونشتنا پهرلهمانى كر، ههم ژى سهرۆكهكێ دهمكى ژ لیستا خوه ههلبژارت ههتا ئێكهتى ب دروستى ژ ڤێ ئاریشا ناڤخوه دا دهرباز دبیت، كهواته پارتى بارهكێ گران ل سهر ملێ ئێمهتى راكر، ژبیر نهكهین پارتى ژى باش دزانیت ئێكهتى چ ئاریشه ههیه ژ بهرهندێ ئهو دژاتیا د مهدیا ئێكهتیێ دا بۆ وێ روونشتنا پهرلهمانى هاتهكرن، ژ لایێ پارتى ڤه بهرسڤدان نهبوو، ههروهسا گهفێن دو ئێدارهیێ ژى بێ بهرسڤا پارتى دهربازبوو.
كیژان پێنگاڤ نه بهرپرسانه بوو؟
ل شهڤا 18 شوباتێ مهكتهبا سیاسى یا ئێكهتێ بهیاننامهیهك ل دۆر روونشتنا پهرلهمانێ كوردستانێ بهلاڤكر و ئهو بریارا روونشتنا پهرلهمانێ كوردستانێ ب بریارهكا نه بهرپرسانه بناڤكر، ل ههمبهردا راگههاندبوو كو ئێكهتى رژده ل سهر دانانا پارێزگهرهكێ ئێكهتێ بۆ كهركووكێ، ب ئێك پاكێجیا حوكمهتا نوو و بهغدا و كهركووك نهبیت، ئهو رازى نابن، كهواته دڤێت ئهم بزانین كیژان پێنگاڤ نهبهرپرسانهیه، روونشتنا یاسایا پهرلهمانێ كوردستانێ یان 16 ئكتۆبهرێ و ژ دهست دانا كهركووكێ؟ كورد ل پارێزگهههكێ دهستههلاتدار و خوهدان مال بن، پاشان ب رێكهفتنهكێ وی پارێزگههێ ب حهسهن پلایس و ئهبۆ عزرائیل بفرۆشن؛ بریارهكا نه بهرپرسانهیه یان روونشتنا پهرلهمانێ كوردستانێ كو پترى چار مههانه خهلكێ ههرێما كوردستانێ دهنگ بۆ داى و هێشتا بهرههمێ دهنگێ خوه نهدیتی، لهورا خهلك بهرههمى ڤان ههردو بریاران باش دبینیت و دزانیت ل 16 ئكتۆبهرا 2017 چ چێبوو و ل 18 شوباتا 2019 چ روودا؟
