ئه‌و كارێ ئه‌م دكه‌ین پاره‌ی ژ به‌ریكا خوه دمه‌زێخین
هه‌له‌بجه، عه‌زیز هه‌ورامی:
په‌یكه‌رسازێ به‌رنیاس (وشیار په‌مۆ) د دیداره‌كێ دا بۆ رۆژناما ئه‌ڤرۆ دیاركر كو ل ڤێ دووماهیێ وی بۆ سالڤه‌گه‌ڕا هه‌له‌بجه په‌یكه‌ره‌ك ژ به‌ری چێكربوو، گرانیا وی (21) كیلۆنه و هه‌تا نوكه ل چه‌ندین پێشانگه‌هان هاتیه نیشادان.
په‌مۆی گۆت: نێزیكی دو هه‌یڤان من ل سه‌ر وی په‌یكه‌ری كاردكر هه‌تا ب دووماهی هاتی و سوپاس بۆ خودێ ل دووف دلێ من هات، بۆ زانین ئه‌ز د سێ وارێن هونه‌ری دا كاردكه‌م ( په‌یكه‌ر، شێوه‌كاری، باشنڤیسی) به‌لێ یێ ژهه‌موویان گرنگتر ل ده‌ف من چێكرنا په‌یكه‌ران و ل ده‌مێ چێكرنێ زۆر یێ ئارامم، چنكو ئه‌ز ل وێ باوه‌ریێ مه هونه‌ر بگشتی و په‌یكه‌ر ب تایبه‌تی ناسناما گه‌لانه، له‌ورا ئه‌م ژی دشیێن ب رێیا هونه‌ری به‌حسێ كاره‌ساتێن ب سه‌رێ ملله‌تێ مه هاتین بكه‌ین، بۆ نموونه ئه‌و په‌یكه‌رێ من بۆ هه‌له‌بجه چێكری دێ بیته ناسناما گه‌لێ مه، لێ هه‌رده‌م ئاریشا مه ئه‌وه كو حكومه‌ت هاریكاریا هونه‌رمه‌ندان ناكه‌ت و ئه‌و كارێ پتریا مه دكه‌ن پاره‌ی ژ به‌ریكا خوه دمه‌زێخین.
