ئه‌و مه‌ترسیا ژ هه‌میان خرابتر!!
ژ مێژه‌یه گه‌لێ كورد د دیرۆكا خوه دا تووشی چه‌ندین ده‌رده‌سه‌ریێن بێ سنۆر بوویه و ئه‌گه‌رێ سه‌ره‌كی ژی ژبلی كو دوژمنێن مه بهێزبوونه، لێ یا ژ وێ سه‌ره‌كیتر ئه‌وه كو به‌رده‌وام ئه‌م د ناڤخوه‌یا خوه دا ملله‌ته‌كێ نه ئێكگرتی بووینه و به‌رده‌وام نه‌ڤیان د ناڤبه‌را مه‌دا هه‌بوویه، ئه‌ڤجا نه ئێكگرتن د ناڤبه‌را پارچێن كوردستانێ دا و پاشی د ناڤبه‌را زاراڤێن كوردی سۆرانی و بادینی و زازاكی و لۆری و هه‌ورامی دا هتد.. .. و پاشی د ناڤبه‌را فلان ده‌ڤه‌رێ و بێڤان ده‌ڤه‌رێ و فلان عه‌شیره‌تێ و عه‌شیره‌تا دی و یا ژ هه‌میان نه‌خۆشتر ژی یا كو كاره‌ساتێن مه‌زن ژێ په‌یدابووین و بووینه ئه‌گه‌رێ ژ ده‌ستدانا ده‌ستكه‌فتیێن نه‌ته‌وه‌یی د دیرۆكێ دا ئه‌وه یا د ناڤبه‌ران فلان پارتێ و پارتا دی هه‌روه‌ك مه هه‌میان ب چاڤێن خوه دیتی به‌ری چه‌ند سالان چ كاره‌سات په‌یدابوون د ناڤبه‌را پارتێن سیاسی دا كو ژ بلی شه‌هیدبوونا چه‌ندین گه‌نج و لاوێن وه‌لاتێ مه چاوا بوو ئه‌گه‌رێ ژده‌ستدانا ناڤوده‌نگ و شووناسێ مه و چاوا بوو ئه‌گه‌ر كو دوژمنێن مه پێ دلخۆش ببن، مخابن نها ژی هێشتا دل و ده‌روونێ هنده‌ك كه‌سان د ناڤا جڤاكێ مه دا ته‌نا نه‌بوویه و نها ژی ئه‌گه‌ر ب وان بیت، دیسا دێ په‌نایێ به‌نه ده‌رده‌سه‌ریێن مه یێن دیرۆكی كو ب دیتنا وان یا به‌رته‌نگ ب تنێ ئه‌وه باشترین رێیه ژ بۆ چاره‌سه‌ركرنا پرسێن هه‌ڤركیێ!! زۆر جاران ژی ئه‌ڤ ئاماژه‌یه كو ژ بلی د ناڤ لایه‌نێن سیاسی دا رۆن و ئاشكرا دبیت د ناڤ هه‌لویستێ رایا گشتی ژی دا دیار و به‌رچاڤ دبیت هه‌ر وه‌ك د ده‌زگه‌هێن راگه‌هاندنێ دا و ل تۆڕێن كۆمه‌لایه‌تی یێن فیسبووك و توویته‌ری هتد.. . ئه‌م هه‌ست پێ دكه‌ین و دبینین كو هه‌وله‌ك هه‌یه ژ بۆ دوباره دروستكرنا ناكۆكیێن ناوچه‌یی و سیاسی كو ب راستی ژی زۆر جاران مرۆڤ هزر دكه‌ت ل بیرا ملله‌تێ مه چوویه ئه‌و ده‌رده‌سه‌ریێن مه‌دیتین د قووناغێن جودا جودا یێن دیرۆكێ دا! ئه‌ڤجا د قووناغه‌كا وه‌كی ئه‌ڤرۆ دا كو ئه‌م نها د شه‌ره‌كێ گه‌له‌ك گران و چاره‌نڤیساز داینه دبینین كو رۆژ بۆ رۆژێ ئه‌ڤ هه‌ڤركی یا د ناڤبه‌را لایه‌نێن سیاسی و د ناڤبه‌را ناوچه‌یێن كو به‌ری نوكه ب حوكمه‌ت دهاته نیاسین توندتر لێ هاتی یه كو ب راستی ژی كه‌لتووره‌ك و هه‌وله‌كا مه‌ترسیدارتره ژ وی شه‌رێ نها د گه‌ل تیرۆرستێن داعشێ دا دهێته‌كرن، چونكی كێمترین ده‌رز بكه‌ڤیته ناڤ رێزێن هه‌رێما كوردستانێ دا دێ مه‌زنترین كاره‌سات لێ په‌یدا بن و دێ بیته ئه‌گه‌رێ ژ ده‌ستدانا هه‌می ده‌ستكه‌فتیێن گه‌لێ كورد نه ب تنێ ل باشۆر به‌لكو ل هه‌ر چار پارچێن كوردستانێ له‌وما گرنكه راگه‌هاندنا كوردی و پارتێن كوردستانی ئاگه‌هداربن ل سه‌ر هه‌ر لێدوانه‌ك و بابه‌ته‌كێ ببیته ئه‌گه‌رێ ئازراندنا رایا گشتی یا خه‌لكێ كوردستانێ ژبه‌ر كو سه‌رئه‌نجام ب تنێ دوژمنێن مه دێ مفاداربن و وه‌كی گه‌له‌ك جارێن دی هه‌ر ئه‌م دێ زه‌ره‌رمه‌ندبینن، ئه‌م دبینین هنده‌ك جاران ل سه‌ر لێدوانه‌كێ گه‌نج و لاوێن مه دكه‌ڤنه به‌ر هێرشكرنه‌كا دژوار یا هه‌ڤدو ب رێیا گۆتنێن نه‌جوان و تومه‌تباركرنا هه‌ڤدو ب ناوچه‌گه‌ریێ و ب سیاسیكرنێ كو ب راستی ژی ئه‌ڤه مه‌ترسیه و پێدڤی ب سه‌ر راوه‌ستاندنێ هه‌یه، ب تایبه‌تی ژی د ناڤ ته‌خا گه‌نج و لاوان دا كو نابیت ئێدی كار بهێته كرن بۆ دوباره زڤراندنا دیرۆكا مه تژی مه‌رگه‌سات و براكوژی و هه‌می كه‌سه‌ك ب بهێنفره‌هی و ب مێشكه‌كێ سه‌رده‌میانه و ب شێوازێن دیمۆكراتی سه‌ره‌ده‌ریێ د گه‌ل ڤان جۆره بابه‌تان بكه‌ت و نه ژ بۆ خوین رشتن.
