ئه‌و نه ئه‌زم
عارف حیتۆ
خه‌مێ كوینێ خوه دانا هه‌ستا من
بێده‌نگیێ.. كراسه‌ك سپی كره به‌ر من
لیلاق ژ مژویلانكێن من شۆر بوون و
هه‌می پێنگاڤ پێش و پاشن ل سه‌ر ته‌قنێ
ل دۆر خوه زڤڕیمه خه‌یالێ و خه‌ونرۆژكان..
به‌خچه‌یێن دوور دكرنه هه‌ڤڕانێ وه‌غه‌رێ
هزره‌كێ ئه‌ز دگه‌هاندمه روویێ ستێرا و
هزره‌كا دی، خه‌ونا من ددا ده‌ڤێ كێرا
له‌شێ من یێ ل قورنه‌ته‌كی بوویه قورمك
ئه‌زا من یا د نهالێ دا دكه‌ته قێژی
ئه‌ز ئه‌زه‌كێ به‌رزه‌بوویی د تڕێنه‌كا راوه‌ستای دا
هه‌یڤا من یا برینداره ل ناڤ نڤینان
ئه‌وێ كچكا جیرانا مه…
داخواز كرمه ئاهه‌نگا ڕۆژا بوونا خوه
لێ ته‌ڤ دارێن دمن دا هشكبوویی،
هاژۆتمه سه‌ر رووباری
من دێمه‌كێ وه‌ستیایی دناڤ ئاڤێ دا دیت
لێ نه ئه‌ز بووم!
سالان كوریشك ل دۆر چاڤێن وی چاند بوون
گوڕیێ لێڤێن وی قماند بوون…
ئه‌و نه ئه‌ز بووم!
شه‌ڕڤان ژ پشت گری هاتن،
ڕه‌ڤاندمه د شكه‌فته‌كێ ڤه… تاری تاری
صه‌یه‌كێ زێره‌ڤان لێ بوو
سێ چه‌رخن وی چ نه‌خواری و
خیالێن خوه ل سه‌ر حه‌فكا من كرنه پاری!
ئه‌ز ڕه‌ڤیم و ژ خه‌ونا خوه هاتم ده‌رێ
كه‌فتم سه‌ر رێكا موغبه‌رێ
هه‌مبێزكرم كێلیه‌كا باران لێ باری
ده‌نگێ بابێ من ژ بنێ بیره‌كێ دهات..
ما من نه‌گۆت ب شه‌ڤێ خوه ل چ ئاڤان نه‌ده‌ی
ئه‌جنه دێ ته هنگێڤن!
ب پێخواسی نامێن ئاخێ بۆ بای نه‌به‌ی
ملیاكه‌ت دێ ته بشێڤن!
پێنجۆكانێ ب په‌لان نه‌كه‌ی
تیرێن ئاگری دێ، ده‌مارێن چه‌رمی ته‌لێفن!
ئه‌و نه ئه‌زم، ب خودێ ب خودێ، ئه‌و نه ئه‌زم
كه‌سه‌ك دییه دمن دا شین بووی و گازی دكه‌ت
دبێژیته خه‌لكی كو ئه‌زم.!
***
