ئه‌و پێنگاڤێن پێدڤیه پشتی گوتارا سه‌رۆك بارزانی پارتی و گۆڕان بهاڤێژن
پشتی ده‌ركرنا بزاڤا گۆڕان ژ په‌رله‌مان و حوكمه‌تا هه‌رێما كوردستانێ، په‌یوه‌ندیێن د ناڤبه‌را پارتی دیموكراتی كوردستان و بزاڤا گۆڕان تێكچوون و تێكچوونا ڤان په‌یوه‌ندیان ژی درێژ ڤه‌كێشا، له‌وما پشتی گوتارا سه‌رۆك بارزانی ب هه‌لكه‌فتا سه‌رێ سالا زاینی، گه‌له‌ك تشت زه‌لالتر لێ كرن كو هه‌موو پێنگاڤ ئه‌و بن، ره‌وشا هه‌رێمێ ئاسایی ببیت، له‌وما ده‌م هات ئێدی بزاڤا گۆڕان و پارتی دیموكراتی كوردستا هه‌موو كێشێن د ناڤبه‌را خوه دا ئێكلا بكه‌ن و جاره‌كادی ل سه‌ر مێزا دانوستاندنان روونن و وه‌لات و نیشتمانی به‌ره‌ڤ په‌راڤێن ته‌ناهیێ ببه‌ن و تێكوشین و بزاڤا نه‌ته‌وی به‌ر ب پێشڤه ببه‌ن، ژبه‌ر كو رێكخستنا ناڤ مالا كوردی گره‌نتی و ده‌سته‌به‌ركرنا سه‌ربه‌خۆبوون و سه‌روه‌ری و سه‌رداریا كوردستانێ یه و رێكخستنا ناڤ مالا كوردی ژی د مفایێ هه‌موو تاكه‌كی وه‌لاتی دایه.
بۆ سه‌رخستن و لێكنێزیبوونا پارتی و گۆڕان دڤێت پارت و لایه‌نێن دی یێن كوردستانی ژی رۆلێ خوه بگێڕن ژبه‌ر كو به‌رده‌وامیا ڤێ ره‌وشا ئاڵوَز به‌رپرسایه‌تیا وێ دكه‌ڤته سه‌ر ملێ هه‌موو لایه‌نه‌كی، هندی زووتر په‌یوه‌ندیێن د ناڤبه‌را پارتی و گۆڕان ئاسایی ببنه‌ڤه و جاره‌كادی په‌رله‌مانێ كوردستانێ ده‌ست ب كاربیته‌ڤه مفایێ وێ بۆ پروَسا دیموَكراسیا كوردستانێ یه و ل هه‌ڤهاتنا ڤان دوو پارتان ژی دێ ئارمانجێن هه‌موو نه‌حه‌ز و دوژمنێن مه هێنه بن ئاخ كرن و ل هه‌ڤهاتنا وان ژی پشته‌ڤانیه بۆ به‌رخوه‌دان و قاره‌مانیا هێزا پێشمه‌رگێ قاره‌مان كو نوكه روی ب روی شه‌ره‌كێ دژوارێ تیروَرێ بوویه، و پێشمه‌رگه ژی پێدڤی ب كوردستانه‌كا ئارام و ته‌نایه و هه‌موو ئارمانجێن وان ژی سه‌رخستنا ڤێ پروَسه‌یا سیاسی یه.
ب نێرینا من بۆ ئاسایی كرنا ڤێ ره‌وشێ باشتره د دانوستاندنان دا، پارتی و گۆڕان ل دووڤ ئێك به‌رده‌ن و بۆ ڤێ قوَناغێ پێكهاتا ده‌ستهه‌لاتا كوردستانێ وه‌كو خوه بمینیت، ئانكو پێكهاتا سه‌رۆكایه‌تیا په‌رله‌مانی و سه‌رۆكایه‌تیا حوكمه‌تێ و سه‌رۆكایه‌تیا هه‌رێمێ وه‌ك خوه بمینیت داكو چ ڤالاتیێن قانوونی د پروسه‌یا هه‌رێمێ دا دروست نه‌بن هه‌تا هه‌لبژارتنێن سالا 2017 كو زوَر نه‌مایه جاره‌كادی دێ هه‌لبژارتن بهێنه كرن و گه‌ل جاره‌كادی بڕیارا خوه ده‌ت، ئه‌گه‌ر كه‌سێن نوونه‌راتیا پارتی دیموَكراتی كوردستان و بزاڤا گۆڕان دكه‌ن نه‌شیان رێكبكه‌ڤن، باشتره سه‌رۆك بارزانی و نه‌وشیروان مسته‌فا راسته راست كوَم ببن و ئاریشێن د ناڤبه‌را پارتی و گۆڕان دا چاره بكه‌ن و باشتره بۆ ڤێ قوَناغێ ل دووڤ وێ پێكهاتنێ بچن یا كو سه‌رۆكایه‌تیا حوكمه‌ت و په‌رله‌مانی پێ هاتیه ئاڤاكرن كو هه‌ر پوَستێ سه‌رۆكێ په‌رله‌مانی بۆ گۆڕان بیت و وه‌زیرێن وان ژی جاره‌كادی ڤه‌گه‌رنه د حوكمه‌تێ دا، كو سه‌رگرتنا ڤێ پێنگاڤێ ژی و ب تایبه‌ت د ڤێ قوَناغا نازك دا كو ( ره‌وشا دارایی یا هه‌رێمێ زێده یا ئاڵوَزه و خه‌ڵك زێده ب ڤان پرسێن سیاسی ڤه ماندیبوویه) دێ په‌یامه‌كا دلخوه‌شكه‌ر بیت بۆ خه‌لكێ كوردستانێ ژبه‌ر كو خه‌لك ژی ئێدی خوه ل به‌ر ڤان ئاریشان ناگریت و بلا ژبیر نه‌كه‌ین ژی كو دڤێت سه‌ركردێن ڤان لایه‌ن و پارتێن سیاسی یێن كوردستانێ لاپه‌رێن دیرۆكا ملله‌تێ كورد ڤه‌ده‌ن و بۆ خوه سه‌ربۆرا ژێ وه‌رگرن ژبه‌ر كو ل سه‌ر ده‌مێ میرگه‌هێن كوردان و ژ ئه‌نجامێ دژبه‌ریا ڤان مێرگه‌هێن كوردی بۆ ئێك و دوو و دابه‌شبوونا وان ل سه‌ر ئیمپراتوریه‌تێن سه‌فه‌وی و عوسمانی چ ئه‌نجامه‌ك ژێ په‌یدانه‌بوو، نوكه ژی كاركرنا پارتان بۆ به‌رژه‌وه‌ندیێن ئیران و توركیا چ ئه‌نجامه‌كێ دلخوه‌شكه‌ر ناده‌ته گه‌لێ كوردستانێ، له‌وما ل سه‌ر سه‌ركردایه‌تیا كوردستانێ پێدڤیه به‌رده‌وام ستراتیژیه‌كا زه‌لال هه‌بیت و هه‌موو كار و خه‌باتا وان ئه‌و بیت كو كوردستانا ئارام و سه‌ربه‌خوه به‌رهه‌م بهێت.
