ئه‌ڤرۆ ئافره‌تێن دهۆك و هه‌ولێر دێ یاریه‌كا چاره‌نڤیسی كه‌ن
ئه‌ڤرۆ، زنار زوبێر:
بڕیاره ئه‌ڤرۆ ل ده‌مژمێر دونیڤێ پشتی نیڤرو ل هۆلا چالاكیێن وه‌رزشی تیما فۆتسالا ئافره‌تێن دهۆك د یاریه‌كا چاره‌نڤیسی دا به‌رامبه‌ر ئافره‌تێن هه‌ولێرێ بكه‌ت ژ چارچووڤێ یاریێن گه‌را سێیێ یا قۆناغا چارگوشا زێرین یا خولا هه‌ریما كوردستانێ.
هه‌ردو تیما به‌ری نوكه دو یاریێن ڤێ قۆناغێ ئه‌نجامداینه ئه‌وا ب شێوازێ خول دو گه‌ڕ دهێنه كرن شیاینه سه‌ركه‌فتنێ ل سه‌ر یانێن دوكان و پیره‌مه‌گروون توماربكه‌ن و شه‌ش خالان رێزا ئێكێ و دویێ هه‌ڤركیا ناسناڤێ خولێ دكه‌ن.
د هه‌ڤركیێن قوناغا كوما ئێكێ ئافره‌تێن هه‌ولێر به‌ری نوكه شیابوو دو جاران سه‌ركه‌فتنێ ل سه‌ر ئافره‌تێن دهۆك توماربكه‌ت لێ بۆ ڤێ قوناغێ ئافره‌تێن دهۆك باشتر خوه به‌رهه‌ڤ كریه و چه‌ندین گوهۆڕین د پێكهاتیێ تیمێ دا كرینه پێخه‌مه‌ت دوباره پاراستنا ناسناڤێ خولێ ژوانا ئینانا یاریزانه‌كا هێرشبه‌ره یا پیشه‌كار ژ یانا قوه جه‌ویه ئه‌وژی زه‌ینه‌ب عه‌باس پشتی دوهی ئێكه‌تیا ته‌پا پێی ماف دایه هه‌ر یانه‌كێ یاریزانه‌كا دی یا پیشه‌كار ل تیمێن خوه زێده‌بكه‌ن.
ل دۆر ڤێ یاریێ عه‌باس كه‌عبی راهێنه‌رێ ئافره‌تێن دهۆك بۆ رۆژناما ئه‌ڤرۆ گۆت: هه‌تا نوكه ئاستێ تیمێ گه‌له‌ك باشتر لێهاتیه ژ قوناغا كومان و شیایمه ئاستێ هونه‌ری یێ تیمێ بگوهۆڕم بۆ یاریا ئه‌ڤرۆ ژی به‌رامبه‌ر ئافره‌تێن هه‌ولێر دێ بزاڤێ كه‌م ئه‌نجامه‌كێ دلخوشكه‌ر یاریێ ب دووماهی بینن و ئه‌و گوهۆڕین ژی د مفاداربوون و هزره‌كا باش كریه ب چو شێوه هێزا تیما هه‌ڤرك راگرین.
