ئه‌ڤرۆ ئافره‌تێن دهۆك و هه‌ولێر دێ دێربیا فۆتسالا كوردستانێ كه‌ن
ئه‌ڤرۆ، زنار زوبێر:
چاڤه‌رێ دهێته‌كرن ئه‌ڤرۆ یاریێن گه‌را چارێ ژ قۆناغا دویێ یا خولا هه‌رێما كوردستانێ یا فۆتسالا كچان بهێته كرن و د ڤێ گه‌رێ دا هه‌موو چاڤ دێ بۆ یاریا دێربی دناڤبه‌را ئافره‌تێن دهۆك و هه‌ولێر دا چن ئه‌وا دێ ل هۆلا چالاكیێن وه‌رزشی یا دهۆك ل ده‌مژمێر دو نیڤێ پشتی نیڤرۆ هێته ئه‌نجامدان.
ئافره‌تێن هه‌ولێر سه‌ركێشا كوما ئێكێ یه ب 24 خالان و یێن دهۆك رێزا دویێ ب 21 خالان دهێت پشتی د یاریا چونێ دا هه‌مبه‌ری ئافره‌تێن هه‌ولێر تووشی خوساره‌تیێ بووی ب دو گۆلان بێ به‌رامبه‌ر، لێ بۆ یاریا ئه‌ڤرۆ ئافره‌تێن دهۆك باشتر خوه ئاماده‌كریه و پیشه‌كاره‌كا مسری ژی ل تیما خوه زێده‌كریه بۆ بهێزكرنا رێزێن تیمێ.
ل دۆر ڤێ یاریێ زینه جه‌میل هاریكارا راهێنه‌را ئافره‌تێن دهۆك بۆ رۆژناما ئه‌ڤرۆ گۆت: ئه‌ڤ یاریه گه‌له‌ك دێ یا بهێز بیت و هه‌تا راده‌یه‌كێ مه‌زن دێ چاره‌نڤیسێ هێزا تیما مه بۆ قوناغا چارگوشا زێرین دیاركه‌ت و بۆ ڤێ جارێ مه یاریزانه‌كا پیشه‌كارا مسری بۆ تیما خوه زێده‌كریه و ل وێ باوه‌ریێ نه دێ شێین ئاسته‌كێ باش پێشكێش كه‌ین ژبه‌ركو چو كێماسی د پێكهاتیێ تیمێ دا نینن و هه‌موو یاریزانان سوزدایه ب هه‌موو شیانێن خوه بۆ سه‌ركه‌فتنێ مه‌زێخن.
ژلایه‌كێ دی ڤه مه‌زن محه‌مه‌د راهێنه‌رێ ئافره‌تێن هه‌ولێر بۆ رۆژناما ئه‌ڤرۆ گۆت: بێگومان كرنا یاریێ به‌رامبه‌ر تیمه‌كا بهێز وه‌ك ئافره‌تێن دهۆك پێدڤی ب هێز و شیان و پلانه‌كا موكمه ژبه‌ر هه‌بوونا هژماره‌كا یاریزانێن ستێر لێ سه‌ركه‌فتنا تیما مه د یاریا بوری دا ئه‌و مورالا یاریزانێن مه بلندكریه بشێن دوباره سه‌ركه‌فتنێ ل سه‌ر ئافره‌تێن دهۆك بینن و به‌رده‌وامیێ بده‌ینه كاروانێ ئه‌نجامێن خوه یێن باش و پاراستنا سه‌ركێشا ڤێ كومێ.
ژلایه‌كێ دووڤه و دێربیێ پارێزگه‌هێ دا هه‌ردو یانێن شێخان و گاره ژی دێ هه‌مبه‌ری ئێك یاریێ كه‌ن و ئه‌نجامێ ڤێ یاریێ چو كارتێكرنا خوه ل هه‌لوه‌ستێ ڤان تیمان ناكه‌ت ژبه‌ركو هه‌موو تشت د ڤێ كومێ دا ئێكلا بووینه.
