ئه‌ڤرۆ باسكێت بۆلا دهۆكێ دێ بزاڤێن ڤه‌گه‌ڕیانێ بۆ نایابا ئیراقێ كه‌ت
پەروین سەلاح
چاڤه‌ڕێ دهێته كرن ئه‌ڤرۆ ب پشكدارییا شه‌ش یانه‌یان قۆناغا دووماهیێ یا خولا پلا ئێكا ئیراقێ یا باسكێت بۆلێ ده‌ربازبوون بۆ پلا نایاب ل هه‌ولێرا پایته‌خت بهێته كرن ئه‌وا شه‌ش یانه دێ شه‌ڕ بۆ سێ پلێتێن ده‌ربازبوونێ كه‌ن و یاریێن وان دێ ب شێوه‌یێ خول ئێك قۆناغ هێنه كرن، یانه‌یێن پشكدار هه‌ر ئێك ژ دهۆك، نه‌فت ئه‌لشیمال، سابیس، نه‌فت ئه‌لمیسان، ئالیات ئه‌لشورته و ئه‌لیه‌قزه، ل دۆر به‌رهه‌ڤی و هیڤیێن نوونه‌را پارێزگه‌هێ راهێنه‌رێ دهۆكێ میقداد ره‌عدی بڤی شێوه‌یی بۆ رۆژنامه‌یا ئه‌ڤرۆ ئاخفتییه.
ڕاهێنه‌رێ دهۆكێ گۆت: بۆ ڤێ قۆناغێ مه به‌رهه‌ڤیێن باش كرینه سه‌رباری ئه‌ركێ مه ب سانه‌هی نابیت به‌رانبه‌ر یانه‌یێن دی ئه‌وێن هه‌مان هیڤی و ئارمانج هه‌نه كو ده‌ستڤه‌ئینانا پلێتا ده‌ربازبوونێ بۆ نایابا ئیراقێ، مه پێنگاڤا ئێكێ یا خولا پلا دو ب سه‌ركه‌فتیانه ده‌رباز كربوو، ژ سه‌رجه‌مێ ٢٠ تیما شەش ماینه كو دبیته قۆناغا دووماهیێ یا پلا ئێك ده‌ربازبوون بۆ نایابا ئیراقێ،ل دووڤ سیسته‌مێ نوو شێوازێ خولێ دێ بیته ئێك قۆناغ هەر تیمەك دێ پینچ یاریان کەت، سێ تیم دێ سەرکەڤنه پلا نایابا ئیراقێ.
هه‌روه‌سان ناڤهاتی گۆت: هیڤییا مه ئه‌وه ئێك ژ پلێتێن ده‌ربازبوونێ وه‌ربگرین بۆ نایابێ، هه‌رچه‌نده د وه‌رزێ ئه‌ڤساله دا چو ده‌لیڤه‌یا پێشچاڤ نه‌بوو، مە یاری د خولا پلا دو كر و ئێكسه‌ر چووینه خولا پله ئێك و به‌رده‌وامبووین بێ راوه‌ستیان، هەروەسا د ئەڤ سالەدا مە ئەو نیاز هەبوو د خولا پلە ئێك دا پشكداربین و سالا بهێت خوه باشتر بەرهەڤبکەین بۆ پلا نایاب، لێ سپاس بۆ خودێ ب شیانێن كۆم گەهشتینە قۆناغا دووماهیێ، له‌وما ژی ئەم گەلەك یێن نێزیكی پلێته‌كا ده‌ربازبوونێ بووین كو بزاڤێ بكه‌ین ئێك ژ سێ تیمان بین سەربکەڤین بۆ نایابا ئیراقێ، تا راده‌یه‌کێ باش ئەم یێن ماینە دناڤا وان شەش تیمان دا لسه‌ر پلانا خوه بەردەوامین و ئارمانجامە هە ڤڕکییە و باوەرین دێ گه‌هینه ئارمانجا خوه.
