ئه‌ڤرۆ دهۆك د تاقیكرنه‌كا بهێز دایه
چاڤه‌رێ یه ئه‌ڤرۆ تیما ته‌پا پێی یا یانا دهۆكێ یاریا خوه یا گه‌ڕا هه‌شتێ ژ خولا پلا ئێكا ئیراقێ ژ ده‌رڤه‌یی یاریگه‌ها خوه ئه‌نجامبده‌ت ده‌مێ ببیته مێڤانا یانا سیناعه یا به‌غدایی ئێك ژ بهێزترین یاریێن ڤێ گه‌ڕێ ئه‌وا دێ ل ده‌مژمێر چار ونیڤێ ئێڤاری هێته كرن.
نوونه‌را پارێزگه‌هێ پشتی د یاریا بوری دا و ل یاریگه‌ها خوه سه‌ركه‌فتنه‌كا باش ل سه‌ر مێڤانا خوه میسان ئینابوو ب سێ گۆلێن پاقژ و ب12 خالان پاشڤه هاته رێزا پێنچێ و هیڤیێن خوه بۆ هه‌ڤركیا ئێك ژ پلێتێن ده‌ربازبوونێ بۆ پلا نایاب گه‌شتر لێكرینه، هه‌مبه‌ری وێ خودانێ ئه‌ردی یانا سیناعه سه‌رێ لیستا خولێ دهێت ب 19 خالان كو بهێزترین هه‌ڤڕكا دهۆكێ یه و مه‌زنترین ئاسته‌نگا وێ یه.
لدور به‌رهه‌ڤیێن تیما دهۆكێ بۆ ڤێ یاریێ عادل ناسر د داخویانیه‌كێدا بۆ رۆژناما ئه‌ڤرۆ گوت: یاری بۆ یاری گڤاشتنێن ده‌رونی و ئاستی ل سه‌ر یاریزانان په‌یدا دبن و مه چو بژارده نینن دڤێت بێی خال نه ڤه‌گه‌ڕێن ژبۆ به‌رده‌وامیا هه‌ڤڕكیێ هه‌رچه‌نده هه‌موو یاری بوو مه ب هێز و دیسا كێماتیێ بۆ چو تیمان نا دانین لێ یاریا ئه‌ڤرۆ بهێزترینه و دڤێت سه‌ره‌ده‌ریه‌كا باش بۆ بهێته كرن ژبه‌ركو ژ ده‌ستدانانا هه‌ر خاله‌كێ دێ رێزبه‌ندیا مه پاشڤه به‌ت و هیڤیێن مه لاواز كه‌ت، پلان و راهێنانێن مه ب شێوه‌كێ باش هاتینه كرن و هه‌موو هیڤیێن مه سه‌ركه‌فتنه و ئه‌ڤچه‌نده دڤێت یاریزان ژی دناڤ یاریگه‌هێ دا پلانێن مه بكه‌ته كریار.
ژ یاریێن دی یێن ئه‌ڤرۆ دێ هێنه كرن: روومادی- پ. سلێمانی، به‌حری- سلیخ، دیالا- ناسریه، میسان – مرور، ئه‌كه‌د سامرا.
بۆ زانین سیناعه ب 19 خالان سه‌رێ لیستێ یه، سامرا 15 خال، به‌حری 14 خال، رومادی 12 خال، دهۆك 12 خال،ناسریه 10 خال، مرور نه‌ه خال رێزێن دویێ هه‌تا حه‌فتێ دهێن، پێشمه‌رگا سلێمانی و دیالا ب هه‌ڤپشكی ب هه‌شت خالان رێزێن هه‌شت و نه‌هێ، دیالا و ئتیفاق ب شه‌ش خالان رێزێن ده‌هێ و 11ێ دهێن، ئه‌كه‌د چار خالان رێزا 12ێ و هه‌ردو یانێن بابل و میسان ب سێ خالان رێزێن 13ێ و دووماهیێ دهێن.
