ئه‌ڤرۆ دێ چامپيۆن ليگ ياريگه‌هێن ئورۆپا گه‌رم كه‌ت
ئەڤرۆ نيوز:
وەرزێ نوو یێ قارەمانیا یانێن ئوروپا قارەمانێن خولان ئەف شەڤە دێ دەستپێکەت ھەر چەندە ل دووڤ پێشبینێت چاڤدێران دبیت وەکو بازارێ ھاڤینێ یێ کرین و فروتنا یاریکەران یێ گەرم نەبیت چونکو ئەوا دھاتە چاڤەرێکرن ل ڤی بازاری نەھاتە پێش و ھەڤبەستێن مەزن و گوھورینێن دھاتنە چاڤەرێکرن نەھاتنە کرن، لێ دبیت ھەڤرکیا ب ھێزا تولڤەکرنێ بھێتە پێش و ھەمی یاریێن ئەف شەڤە دێ ل دەمژمێر ٩:٤٥ دەستپێکەن.
دەستپێکرنا ھەڤرکیا وەرزێ نوو دێ یا ب خوشی و گرنژین بیت بو جەماوەرێ ھەردو یانێن ئایندھوڤن و مانچستەر یونایتد پشتی ل وەرزێ بوری نەشیاین ئارمانجێن خوە ب جە بینن و پلێتێن پشکداریێ ب دەستخوڤە بەن دەمێ یاریا خوە د کوما دویێ دا ل گەلێک دکەن و زێدەتر د ناڤا تیمان ژی دێ دێ خوشیەک ھەبیت ئەوژی راھێنەرێ ھولەندی یێ یانا ئێنگلیزی لویس ڤان گال دێ کەڤیتە ھەمبەر ھژمارەکا یاریکەرێن خوە یێن بەرێ و بو ڤێ یاریێ ھێرشبەرێ یانا ئێنگلیزی واین رونی پشکداریێ ناکەت ب ئەگەرا ھنگافتنێ.
ژلایەکێ دووڤە یانا مانچستەر سیتی دێ دەست ب ھەڤرکیێ کەت د ڤێ قارەمانیێ دا بو جارا پێنجێ و نوکە د رەوشەکا باش دایە پشتی دەستپێکەکا نمونەی د خولا ئێنگلیزی دا تومارکری و دێ لێگەریانا ھەڤرکیەکا مەزن کەت دژی یانێن مەزنێن ئوروپا، ھەر چەندە د پشککێشانێ دا دلوڤانی پێ نەھاتیە برن و کەفتە د کوما یوڤانتوس خودانا رێزا دویێ ل وەرزێ بوری و ئەزمونا وێ یا ئێکێ دێ ل گەل ڤێ یانێ بیت ل یاریگەھا ئێتیحاد و ب سەرکەفتنێ د ڤێ تاقیکرنا پێش وەخت دا دێ ھیڤی بو دەربازبونا وێ بو قوناغا دویێ گەشبن، ب تایبەت د دەمەکی دا کو یانا یوڤانتوس د خولا ئیتالیا دا د رەوشەکا باش دا نینە ب تنێ ئێک وەکھەڤی ل گەل سێ خوسارەتیان ھەیە، زێدەباری چونا باشترین یاریکەرێن وێ ئارتورو فیدال و کارلوس تێڤێز و بو ڤێ یاریێ دێ یا بێ باربیت ژ یاریکەرێ خوە یێ ھێلا ناڤین کلاودیو مارکیسیو ب ئەگەرا ھنگافتنێ لێ وەسا دھێتە زانین کو راھێنەرێ ڤێ یانا ئیتالی ھەست ب دو دلی و ترسێ ناکەت و راپورتێن روژنامەڤانی وەسا دەنە خویاکرن کو بەروڤاژی خولا ئیتالیا دێ ل ناڤا خولا ئوروپی ھێتە دیتن.
دوما ئێکێ دا یانا ریالمەدرید دێ یاریەکا ب ساناھی کەت ل یاریگەھا خوە سانتیاگو بێرنابیو دەمێ مێڤانداریا یانا شاختار دونیستیک یا ئوکرانی دکەت و بو ڤێ یاریێ ژی پێکھاتیێ راھێنەر رافائێل بینیتز ھەتا رادەکی دێ یێ تمام بیت ب تایبەت پشتی بەرەڤانێ وی سێرخیو راموس ڤەگەریایە راھێنانا وەکو بەرھەڤی بو ڤێ یاریێ، ھەر چەندە یێ کولومبی جیمس رودرێگز و یێ بەرازیلی دانیلو پشکدار د راھێنانێن دوھی دا نەکریە و زێدەتر گولچیێ یانێ یێ کوستاریکی کیلور نافاس د بەرھەڤی و پێشکەفتنەکا باش دایە ب تایبەت پشتی بورینا سێ یاریان ژ خولا ئسپانیا شیای پاراستنێ ل سەر تورا گولا ریال بکەت کو جارا ئێکێ یە ئەف دەستکەفتە دھێتە تومارکرن د چل سالێن بوری یێن یانێ دا. ژلایەکێ دووڤە یاریکەرێ سویدی زەلاتان ئیبراھیموڤیچ ل گەل یانا خوە پاریس سان جێرمان یا فرەنسی دێ ھەڤرکیێ ل گەل یانا خوە یا زاروکینیێ مالمو کەت ل فرەنسا، کو پشتی ڤی یاریکەری ل ٢٠٠١ یانا سویدی ب جە ھێلای دھێتە ھژمارتن ئێک ژ مەترسیتیرن ھێرشبەران د تەپا پێ یا جیھانێ دا ھەر چەندە نوکە ژیێ وی گەھشتیە ٣٣ سالیێ.
ژ یاریێن دی یێن ئەف شەڤە دێ ھێنە کرن ب ڤی رەنگی یە.
فولفسبورگ یا ئەلمانی * سیسکا موسکو روسی
ئەشبیلیا ئسپانی * بروسیا مونشن کلادباغ ئەلمانی
بنفیکا پرتوگالی * ئێف سی ئاستانا کازخستانی
گەلاتا سەرای تورکی * ئەتلەتیکو مەدرید ئسپانی
