ئه‌ڤرۆ د كلاسیكویا كوردستانێ دا زاخۆ دێ هه‌ولێرێ مێڤانكه‌ت
ئه‌ڤرۆ، عه‌لی حاجی:
دهێته چاڤه‌ڕێكرن ئه‌ڤرۆ ل ده‌مژمێر دو پشتی نیڤرۆ تیما ته‌پا پێی یا یانا زاخۆ مێڤانداریا یانا هه‌ولێرێ بكه‌ت كو دهێته هژمارتن كلاسیكویا كوردستانێ، ئه‌وا دێ ژ چارچووڤێ هه‌ڤڕكیێن گه‌ڕا ده‌هێ یا خولا پلا نایابا ئیراقێ ل یاریگه‌ها زاخۆ یا نێڤده‌وله‌تی هێته كرن.
خودانێن ئه‌ردی ب 15 خالان رێزا حه‌فتێ دهێت و دێ بزاڤێ كه‌ت ب پشته‌ڤانیا جه‌ماوه‌رێ خوه بشێت سێ خالێن یاریێ ب ده‌ستخوه‌ڤه بینیت ژبۆ به‌رده‌وامیا پێشڤه‌چوونێ د رێزبه‌ندیا خولێ دا، هه‌مبه‌ری وێ تیما هه‌ولێرا پایته‌خت د كاودانه‌كێ خراب دایه ژ نه‌ه یاریان حه‌فت خال كۆمكرینه و رێزا 14ێ دهێت، ئه‌ڤچه‌نده ژی نه لدووڤ حه‌ز و ئارمانجێن خودانا چار ناسناڤێن خولا ئیراقێ یه له‌ورا دێ بزاڤێ كه‌ت ب ئه‌نجامه‌كێ باش ڤه‌گه‌ڕێته پایته‌ختێ هه‌رێمێ.
لدور دووماهی به‌رهه‌ڤیێن یانا زاخۆ شڤان جه‌میل یاریزانێ تیمێ بۆ رۆژناما ئه‌ڤرۆ گوت: یاریا ل گه‌ل هه‌ولێرێ تایبه‌تمه‌ندیا خوه یه و جودایه ژ هه‌ر یاریه‌كا دی، ژبه‌ر كو هه‌ردو تیم ژ هه‌رێما كوردستانێ نه و تیمێن بهێز و جه‌ماوه‌ره‌كێ مه‌زن هه‌یه له‌ورا كلاسیكویه‌كا تایبه‌ته بیت و دێ ب شێوه‌كێ جودا ئاستێ یاریزانێن هه‌ردو تیما هێته دیتن و هه‌ڤڕكیه‌كا بهێز په‌یدابیت، سه‌ركه‌فتنا مه د ڤێ یاریێ دا هه‌مبه‌ری شه‌ش خالانه چنكو دێ ب جووداهیه‌كا كێم یا خالان مه نێزیكی رێزێن باشتر كه‌ت، له‌ورا دێ هه‌موو بزاڤا كه‌ین بتنێ بۆ سێ خالێن یاریێ بكه‌ین و ئه‌م شیاینه هه‌تا نوكه ل یاریگه‌ها خوه دا ئه‌نجامێن باش تۆماربكه‌ین.
ژلایه‌كێ دووڤه ناڤهاتی گۆت: به‌رهه‌ڤبوونا جه‌ماوه‌ری و پشته‌ڤانیا وان بۆ مه گه‌له‌ك گرنگه و دێ كلیلكا سه‌ركه‌فتنێ و هێزا مه بیت، لێ نابیت چو كێماتیێ بۆ تیما هه‌ولێرێ ب دانینن و ئه‌و دێ بزاڤێن قه‌ره‌بوویا ژ ده‌ستدانا خالان كه‌ن و دڤێت ئه‌م باش ئاماده‌بین.
