ئه‌ڤرۆ زاخۆییان سه‌ركه‌فتن دڤێت ژبۆ بده‌ستڤه ئینانا سه‌رێ لیستێ
عەلی حاجی:
چاڤه‌ڕێ دهێته كرن ئه‌ڤرۆ دو یاریێن مایی ژ هه‌ڤڕكیێن گه‌ڕا هه‌شتێ یا قۆناغا ئێكێ یا خولا ستێرێن ئیراقێ بۆ یارییا فوتبۆلێ دێ هێنه كرن، یانه‌یا زاخۆ دێ ل باژێرێ به‌سرا بیته مێڤانا یانه‌یا مینا و كه‌ربلا دێ مێڤاندارییا دیالا كه‌ت و یارییا دهۆكێ دگه‌ل ئه‌لقاسم یا ڤێ گه‌ڕێ هاتبوو پاشئێخستن.
كوڕێن خابۆری دێ بۆ سه‌ڕێ لیستێ شه‌ڕی كه‌ن
پشته‌ڤانێن یانه‌یا زاخۆ ئه‌ڤرۆ ل ده‌مژمێر دو یێ پشتی نیڤرۆ چاڤه‌ڕێ یارییه‌كا گرنگن و دێ بیته یا دیرۆكی بۆ تیما وان ده‌مێ ل یاریگه‌ها میسان دبیته مێڤانا یانه‌یا مینا یا به‌سرایی دا، كوڕێن خابووری د نوكه دا 12 خال هه‌نه رێزا چارێ دهێن ژ سێ سه‌ركه‌فتن، سێ وه‌كهه‌ڤی و خوساره‌تیه‌ك، د به‌رانبه‌ر دا یانه‌یا مینا خودانا حه‌فت خالانه ل رێزا 16ێ دهێت، دبیت ئه‌ركێ زاخۆییان ب سانه‌هی نه‌بیت لێ هه‌كه سه‌ركه‌فتن ئینا ب رێژه‌یا هه‌ره بلند پێشڤه بهێته سه‌رێ لیستێ ب شێوه‌یێ به‌روه‌خت، ژبه‌ركو هه‌ردو یانه‌یێن كه‌رمه و زه‌وار ئه‌وێن رێزێن دویێ و سێیێ دهێن د یارییا خوه یا ڤێ گه‌ڕێ دا وه‌كهه‌ڤبوون و هه‌رئێك خالێن وان گه‌هشتنه 14 خالان، هه‌روه‌سان خودانا سه‌رێ لیستێ یانه‌یا شورته 14 خال هه‌نه لێ یارییا وێ یا ڤێ گه‌رێ یا پاشئێخستییه ژبه‌ر پشكدارییا وێ د چامپیۆنزا ئاسیا دا، له‌وما ژی هه‌كه زاخۆ سه‌ركه‌فت ده‌لیڤه‌كا زێرین یا به‌رده‌ست هه‌یه ئه‌وژی پێشڤه بهێته سه‌رێ لیستێ و ببیته رۆژه‌كا دیرۆكی بۆ پشته‌ڤانێن زاخۆ.
لدور یاریێ هشیار شەهباز سکرتێرێ یانەیا زاخۆ بۆ رۆژنامەیا ئەڤرۆ دیار کر پشتی ڕاوەستیانا خولێ بۆ دەما ٢٠ رۆژان، ڕاهێنەرێ مە یێ قەتەری پلانەکا تایبەت داناڤ، کەمپێ نافخۆی بۆ دەما ١٤ رۆژان بەردەوام بوو و دو یاریێن هەڤالینی هاتنە ئەنجامدان، داکو یاریزان ژ کەش و هەوایێ یاریێ دوور نەکەڤن، تیما مینا یا بهێزە و یارییەکا ب زەحمەته لێ بۆ سێ خالێن یاریێ هاتینە یاریگەها میسان، بەرهەڤیەکا باش بۆ ڤێ یاریێ هاتییه‌کرن یارییەکا گرنگه سەرکەڤتن ل سەر مینا دێ زێدەتر بەرەڤ رێزێن پێشیێ ڤە چین.
ژلایێ خوه‌ڤه یاریزانێ تیمێ سیپان سەدیق گۆت: ل سەر ڕێیەکا دروست دچین و هەتا نوکە ئاست و ئەنجامێن باش پێشکێش دکه‌ین و ئارمانجا مە بەرەڤ رێزێن پێشیێ یە ژبەر هندێ پێدڤیە بۆ هەموو یاریان خوە ب باشترین شێوە ئامادە بکەین، هەموو ئامادەکاری ژی هاتینە کرن و ئەم دێ هەمی شیانان مەزێخین کو بشێن باشترین ئاستێ خوە پێشکێش بکەین و سێ خالێن ب دەست خوەڤەبینن،هەر چەندە یارییەکا ب زەحمەتە ژی لێ ئەم ژی تیمەکا ب ساناهی نینن بۆ تیما مینا.
