ئه‌ڤرۆ زاخۆ و دهۆك د دێربیێ ئاگرینا به‌هدینان دا
زاخۆ، عه‌لی حاجی:
دهێته چاڤه‌ڕێ كرن ئه‌ڤرۆ ل ده‌مژمێر 4:30ی ئێڤاری تیما یانه‌یا زاخۆ ل یاریگه‌ها نێڤده‌وله‌تی مێڤانداریا یانا دهۆكێ د یاریا دێربیێ به‌هدینان بكه‌ت پشتی ڤه‌قه‌تیانا زێده‌تری حه‌فت سالان، ژ چارچووڤێ هه‌ڤڕكیێن گه‌ڕا 11ێ ژ قۆناغا ئێكێ یا خولا پلا نایابا ئیراقێ یا ته‌پا پێی، لدور به‌رهه‌ڤیێن وان رۆژناما ئه‌ڤرۆ داخویانیێن جودان ژلایێ رێڤه‌به‌رێن هه‌ردو تیمێن به‌هدینان بڤی ره‌نگی بۆ رۆژناما ئه‌ڤرۆ وه‌رگرتینه.
حه‌مید ئسماعیل رێڤه‌به‌رێ تیما زاخۆ گۆت: به‌رهه‌ڤیێن مه گه‌هشتینه ئاسته‌كێ باش تایبه‌ت پشتی گوهۆڕینا راهێنه‌ری كو ئاستێ تیمێ به‌ر ب باشتر دچیت و هه‌موو یاریزان به‌رهه‌ڤن پشتی ڤه‌گه‌ڕیانا هێرشبه‌رێ مه فه‌رحان شه‌كۆر ئێك ژ خالێن هێزا تیمێ، ژ روویێ پشته‌ڤانیا ماددی ژی ڤه چو كێشه نینن، له‌وما ئه‌م پێدڤی ب سه‌ركه‌فتنێ نه و یاریا ئه‌ڤرۆ ل گه‌ل دهۆكێ وه‌كو هه‌ر یاریه‌كا دی ئه‌م دهژمێرین ژبه‌ركو ئه‌م پێدڤی ب سێ خالانه، لێ ژبیر نه‌كه‌ین ئه‌ڤه دێربیه تایبه‌ته و تاما خوه هه‌یه ژبه‌ركو ئه‌ڤه ده‌مه‌كێ درێژه د خولا پلا نایاب دا هه‌ردو یانه هه‌مبه‌ری ئێك نه‌بووینه ئه‌ڤچه‌نده جه‌ماوه‌رێ هه‌ردو تیما ژێ غه‌ریب بووینه، یاری بوو مه گه‌له‌ك گرنگه ژبۆ ڤه‌گه‌ڕیان به‌ر ب سه‌ركه‌فتنان، هاتنا جه‌ماوه‌ری دێ خوه‌شیه‌كا دی ده‌ته یاریێ و یا جوانتر ژی ئه‌وه پاراستنا یاریگه‌هێ یه و چو كارێن دوور ژ ره‌وشتێ وه‌رزشی نه هێنه دیتن و چو جێوازی دناڤبه‌را هه‌ردو یانه‌یان دا نینه.
ژلایێ خوه‌ڤه جاسم محه‌مه‌د حاجی رێڤه‌به‌رێ تیما دهۆكێ گۆت: ژ روویێ ئه‌نجامان ڤه تیما مه ژ یا زاخۆ باشتره و گڤاشتن گه‌له‌ك ل سه‌ر تیمێ نینن، د دێربیی دا هه‌ر تیمه‌كا بێ گڤاشتن بیت و ب هزرێ یاریێ بكه‌ن بێگۆمان ئه‌و دێ باشتر ده‌ركه‌ڤیت و جوانتر یاریێ كه‌ت، سه‌ركه‌فتنا مه ل سه‌ر سیناعه د گه‌ڕا بۆری دا ره‌وشا تیما مه گه‌له‌ك باشتر كریه ب تایبه‌تی ژ روویێ ده‌رونی ڤه، له‌وما بۆ یاریا ئه‌ڤرۆ ئه‌م به‌رهه‌ڤین و چو كێشه نینن و دێ بۆ سێ خالێن یاریێ به‌رامبه‌ری زاخۆ بین، سه‌رباری ئه‌و تیمه‌كا باشه و بتنێ پێدڤی ب سه‌ركه‌فتنه‌كێ نه، ئه‌ز ل وێ باوه‌ریێ مه هه‌كه زاخۆ سه‌ركه‌فتنێ تۆماربكه‌ت دێ ڕاگرتنا وێ یا ب زه‌حمه‌ت بیت، یاریزانێن مه د به‌رهه‌ڤن بۆ پێشكێشكرنا ئاسته‌كێ باش و مه باوه‌ری ب تیما خوه هه‌یه، سه‌باره‌ت بۆ هاتنا جه‌ماوه‌ری چو جوداهی دناڤبه‌را زاخۆ و دهۆكێ دا نینه و ئه‌ڤ یاریه دێربیێ ژێ مه دڤێت نیشا هه‌موو ئیراقێ بده‌ین كو دوور ژ ئه‌نجامنی دێربیێ براینی و نێزیكبوونا زاخۆ و دهۆكه، هه‌ر تیمه‌كا باشتر یاریێ بكه‌ت حه‌ز دكه‌ین ئه‌و سه‌ركه‌ڤیت.
