ئه‌ڤرۆ سالڤه‌گه‌ڕا كاره‌ساتا گوندێ كوچۆ یه
دهۆك، له‌زگین جوقی:
ئێك ژ دیده‌ڤانێن كاره‌ساتا گوندێ كوچۆ دیار كر كو ئه‌ڤرۆ 15/8/2021ێ سالڤه‌گه‌ڕا كاره‌ساتا گوندێ كوچۆ یه كو تیرۆرستێن داعش زه‌لامێن گوندی د ناڤ 17 گۆرێن ب كۆم دا گولله‌بارانكرین و كچ و ژن و زارۆ ژی ره‌ڤاندین و ل بازارێ مووسل و ره‌قه كڕین و فرۆتن پێ دهاته كرن.
كچی كۆچو، ئێك ژ دیده‌ڤانێن كاره‌ساتا گوندێ كوچۆ كو ئه‌و ب خوه ژی ب برینداری ژ ناڤ گۆره‌كێ ب كۆم دا رزگاربوویه بۆ ئه‌ڤرۆ ئاشكرا كر، وه‌كو ئه‌ڤرۆكه ل رۆژا 15/8/2014ێ تیرۆرستێن داعش هه‌موو خه‌لكێ گوندێ كوچۆ كچ و ژن و زارۆ و زه‌لام د ناڤ قوتابخانا گوندی دا كۆمكرن و گۆت: “پاشی ده‌ست ب جوداكرنا كچ و ژن و زارۆیان كرن و زه‌لام ژی ب شێوه‌كێ گرۆپ ل ترۆمبێلان سواركرن و برنه ب ره‌خ گوندی ڤه و گولله‌بارانكرن، ب تنێ ئه‌م 19 كه‌س ب برینداری ژ ناڤ 17 گۆرێن ب كۆم رزگاربووینه”.
گۆتژی: “نێزیكی هزار و 750 كه‌سان د ناڤ گوندی دا دژیان، ژ وان ژی نێزیكی هزار و 250 كه‌سان ژلایێ تیرۆرستێن داعش ڤه هاتنه ده‌سته‌سه‌ركرن”.
مه‌حما خه‌لیل، قایمقامێ قه‌زا شنگالێ بۆ خانی نیوز گۆت:” قه‌ده‌را ئێزدیانه تووشی كاره‌ساتان بن، ئه‌م دخوازین حكومه‌تا عیراقێ دانپێدانێ ب جینۆسایدا ئێزدیان ل شنگالێ بكه‌ت، داكو خه‌لكێ شنگالێ ژ كاره‌سات و فه‌رمانان بهێته پاراستن، هه‌روه‌سا هه‌تا نوكه ب هزاره‌ها كه‌س ژ خه‌لكێ گوندێ كوچۆ دیار نینن”.
